Tej tcub binchet cax cꞌubl tley Dios
37
Ax icx tbincha Bezaleel aju cax tiꞌj tzeꞌ chꞌiꞌx acacia, te jun var tucꞌil jun xcꞌachub tnukbil, ox xcꞌachub twitz ex ox xcꞌachub twaꞌl. 2 Oc tloꞌtzin kꞌan pwak tbanilxix tujile ex tiꞌjele ex cub tkꞌoꞌn jun adorn ttxaꞌnile, kꞌan pwak ttxꞌotxꞌil. 3 Ax icx e cub tbinchaꞌn cyaje argoy kꞌan pwak cytxꞌotxꞌil, ex e oc tkꞌoꞌn cyiꞌj cycyajil tkan cax, cabe jun pacꞌ ex cabetl juntl pacꞌ. 4 Ax icx tbincha cabe tzeꞌ tolin cyiꞌj tiꞌj tzeꞌ chꞌiꞌx acacia, ex oc tloꞌtzin kꞌan pwak cyiꞌj. 5 Extzun tkꞌoꞌn ke jlu cyuj ke argoy ateꞌc ttxlaj cax, tuꞌn t-xi tanut cax cyiꞌj. 6 Baj tbinchaꞌn aju tmaksil kꞌan pwak tbanilxix ttxꞌotxꞌil, te jun var tucꞌil jun xcꞌachub tnukbil ex ox xcꞌachub twitz. 7 Ax icx baj tbinchaꞌn cabe tilbilal querubín kꞌan pwak cytxꞌotxꞌil txꞌinoꞌn ke tuꞌn martiy, ex e cub tkꞌoꞌn cyibaj cycabil pacꞌ ttxaꞌn tmaksil cax. 8 Jun tcub tibaj jun pacꞌ ttxaꞌn tmaksil ex jun tibaj juntl pacꞌ. Te junx piẍ el aju tmaksil ex ke cabe tilbilal querubín. 9 Licꞌun tten cyxicꞌ tuꞌn ttxayit tmaksil cax, cyjaꞌtzun aju twitz jun cub ten twitz juntl, ex cyjaꞌ in cub cyqueꞌyin tibaj tmaksil.Tej tcub binchet mes tuꞌn cycub ten pan tibaj
10 Baj tbinchaꞌn mes tiꞌj tzeꞌ chꞌiꞌx acacia, jun var tnukbil, cab xcꞌachub twitz ex ox xcꞌachub twaꞌl. 11 Oc tloꞌtzin kꞌan pwak tbanilxix tiꞌj, ex cub tkꞌoꞌn jun adorn ttxaꞌnile kꞌan pwak ttxꞌotxꞌil. 12 Ax icx tbincha jun tmakel ttxaꞌnile mes, cyaje kꞌab twaꞌl ex oc tkꞌoꞌn jun adorn ttxaꞌnile kꞌan pwak ttxꞌotxꞌil. 13 Tbincha cyaje argoy kꞌan pwak cytxꞌotxꞌil, ex e oc tkꞌoꞌn cyiꞌj cycyajil pacꞌ ttxaꞌn mes cyiꞌj tkan. 14 Atzun ateꞌc ke argoy lu tjakꞌ tmakel, tuꞌn cyocx ke tzeꞌ tolin cyiꞌj cyuj, tuꞌn t-xi tanut mes.
15 Tbincha ke tzeꞌ tiꞌj tzeꞌ chꞌiꞌx acacia, tuꞌn t-xi tanut mes cyiꞌj, ex oc tloꞌtzin kꞌan pwak cyiꞌj. 16 Ax icx tbincha ke macbil in che ajben tibaj mes, kꞌan pwak tbanilxix cytxꞌotxꞌil: Ke lak, ke pacꞌ, ke xar ex ke matij vas in che ajben te kobl oyaj tiꞌj taꞌl twitz uva.
Tej tcub binchet cycubil candil kꞌan pwak ttxꞌotxꞌil
17 Ax icx tbincha jun cycubil candil, kꞌan pwak tbanilxix ttxꞌotxꞌil txꞌinoꞌn tuꞌn martiy. Te junx el aju tkꞌukbil, aju tkan, ke tcopa, ke tilbilal xwaquin cyten ex ke tilbilal bech. 18 In che el kak tkꞌab tiꞌj tcꞌuꞌj, ox tuj jun pacꞌ ex ox tuj juntl pacꞌ. 19 Tiꞌj teyle junjun tkꞌab nneꞌl tiꞌj tcꞌuꞌj ateꞌc ox tilbilal bech tjakꞌxi, ic tten binchben cye ic tzaꞌn t-xmacal tzeꞌ almendro. 20 Tiꞌj ju tkan, tuj tmij cycubil candil ateꞌc cyaje tilbilal bech tjakꞌxi, ic tten binchben cye ic tzaꞌn t-xmacal tzeꞌ almendro; 21 tjakꞌ teyle junjun moj tkꞌab nneꞌl tiꞌj tcꞌuꞌj at jun tilbilal bech tjakꞌxi, ic tten binchben cye ic tzaꞌn t-xmacal tzeꞌ almendro. 22 Ke tilbilal bech ex ke tkꞌab e jeꞌl tiꞌj junx piẍ kꞌan pwak tbanilxix, ex txꞌinoꞌn tuꞌn martiy. 23 Ax icx tbincha wuk candil tiꞌj kꞌan pwak tbanilxix, cyucꞌil matzbil twi mech ex ke tal tcubil ttzaꞌjil mech. 24 Ajben 75 libr kꞌan pwak tbanilxix tuꞌn tuꞌn tbant aju cycubil candil ex cycyakil ke macbil in che ajben tiꞌj.
Tej tcub binchet altar tuꞌn tcub patit storac
25 Ax icx tbincha aju altar tuꞌn tcub patit storac tibaj. Tbincha tiꞌj tzeꞌ chꞌiꞌx acacia, cab xcꞌachub twitz, cab xcꞌachub tnukbil ex jun var twaꞌl; junx cyaj twitz tucꞌil tnukbil ex cyiklix cyib ke tcach tiꞌj. 26 Oc tloꞌtzin kꞌan pwak tbanilxix cyiꞌjele cycyajil pacꞌ ttxlaj, tucꞌix tibaj ex cyiꞌj ke tcach, ex cub tkꞌoꞌn jun adorn ttxaꞌnile te tibaj, kꞌan pwak ttxꞌotxꞌil. 27 Cyiꞌj cabe tbutxꞌ te jun pacꞌ tjakꞌxi adorn, e oc tkꞌoꞌn cab argoy kꞌan pwak cytxꞌotxꞌil, ex cabe cyiꞌj cabetl tbutxꞌ tiꞌj juntl pacꞌ, tuꞌntzun cyex ke tzeꞌ tolin cyiꞌj cyuj, akeju in che ajben tuꞌn t-xi tanut. 28 Tbincha ke tzeꞌ lu tiꞌj tzeꞌ chꞌiꞌx acacia ex oc tloꞌtzin kꞌan pwak cyiꞌj.
Tej tcub binchet storac tucꞌix aseyt, aju cꞌajbel oc toc toclen jun xjal
29 Ax icx tbincha aju aseyt tuꞌn tjax ket tuj twiꞌ jun xjal oc toc toclen, ex aju storac tbanilxix at tcꞌocꞌjal, ic tzaꞌn in bant cyuꞌn xjal binchal perjum.