Tej tcub binchet altar kꞌan cꞌuxbil ttxꞌotxꞌil
38
Ax icx tbincha Bezaleel aju altar tiꞌj tzeꞌ chꞌiꞌx acacia, jun var cyucꞌil cab xcꞌachub twaꞌl, cab var cyucꞌil cab xcꞌachub tnukbil ex cab var cyucꞌil cab xcꞌachub twitz; junx cyaj echbil te twitz tucꞌil tnukbil. 2 Tbincha cyaje tcach, jun tiꞌj teyle junjun tbutxꞌ, ax in che el tiꞌj altar; ex oc tloꞌtzin kꞌan cꞌuxbil tiꞌj. 3 Kꞌan cꞌuxbil cytxꞌotxꞌil cycyakil ke macbil te altar; ke tcubil tzaꞌj, ke jocbil tzaꞌj, ke lak matij, ke jacul twitz chibj ex ke tcubil xkꞌaꞌl. 4 Tiꞌj kꞌan cꞌuxbil tbincha jun cꞌuxbil xawcꞌin toyꞌ, aju in cyaj tjakꞌ chojbil oc tcub patit. Cuꞌx tkꞌoꞌn cꞌuxbil lu tuj tpeꞌn altar tuꞌn tcyaj ten ax tuj tmij. 5 Ax icx cub tbinchaꞌn cyaje argoy tuꞌn cyoc ten cyiꞌj tcyajil t-scyin ju kꞌan cꞌuxbil xawcꞌin toyꞌ, tuꞌntzun cyocx keju tzeꞌ cyuj. 6 Tbincha ke tzeꞌ tolin cyiꞌj tiꞌj tzeꞌ chꞌiꞌx acacia ex oc tloꞌtzin kꞌan cꞌuxbil cyiꞌj. 7 E ex tkꞌoꞌn ke tzeꞌ lu cyuj ke argoy cyocsaꞌn tiꞌj tcꞌuꞌj altar tuꞌn t-xi tanut. Tzꞌlom altar bant tuꞌn ex catl tuj tcꞌuꞌj.Tej tcub binchet tcubil aꞌ kꞌan cꞌuxbil ttxꞌotxꞌil
8 Cyiꞌj respej kꞌan cꞌuxbil cytxꞌotxꞌil cye ke xuꞌj in che ajbentok ttzi ja xbalun te mojbabl tibil, o tbincha Bezaleel aju tcubil aꞌ, tucꞌix tkꞌukbil.
Tej tcub binchet ttxaꞌn tpeꞌn tja Dios
9 Ax icx tbincha aju ttxaꞌn tpeꞌn ja xbalun. Tuj jun pacꞌ ttxaꞌn peꞌn lu, tuj tumlal tnayaj kꞌij tbincha xbalun te makbil tiꞌj tbanil nokꞌ lino chubemaj. Aju pacꞌ lu 50 var tnukbil. 10 Tbincha winkin tkan ex winkin cykꞌukbil tkan kꞌan cꞌuxbil cytxꞌotxꞌil, ex sak pwak cytxꞌotxꞌil ke ganch ex ke argoy. 11 Ax icx 50 var tnukbil pacꞌ ttxaꞌn peꞌn tuj tumlal tbankꞌab kꞌij, ex tbincha xbalun te makbil, tucꞌix winkin tkan ex winkin cykꞌukbil tkan kꞌan cꞌuxbil cytxꞌotxꞌil, ex sak pwak cytxꞌotxꞌil ke ganch ex ke argoy. 12 Tuj juntl pacꞌ tuj tumlal telex kꞌij, tbincha xbalun te makbil cyucꞌix laj tkan ex laj cykꞌukbil tkan. Aju pacꞌ lu 25 var tnukbil. 13 Tuj pacꞌ tuj tumlal tjawitz kꞌij tbincha xbalun te makbil, ax 25 var tnukbil. 14 Ttxlaj ttzi peꞌn jatum in che ocx xjal, tbincha xbalun te makbil te wuk var cyucꞌil cab xcꞌachub tnukbil, ex ateꞌc ox tkan ex ox cykꞌukbil tkan. 15 Tuj juntl ttxlaj ttzi peꞌn, tbincha xbalun te makbil te wuk var cyucꞌil cab xcꞌachub tnukbil, ex ateꞌc ox tkan ex ox cykꞌukbil tkan. 16 Cycyakil ke xbalun tocsaꞌn tiꞌjele peꞌn banimaj tiꞌj nokꞌ lino chubemaj. 17 Kꞌan cꞌuxbil cytxꞌotxꞌil cykꞌukbil tkan, ex sak pwak cytxꞌotxꞌil ke argoy ex ke ganch cyucꞌix ke adorn cyjax cyuj cywiꞌ ke tkan. Cycyakil ke argoy cyoc cyiꞌj ke tkan ateꞌc tiꞌjele peꞌn, sak pwak cytxꞌotxꞌil.
18 Aju xbalun te makbil ttzi peꞌn jatum in che ocx xjal, chmoꞌmaj tiꞌj nokꞌ ẍkꞌilun queꞌyin, ẍjulun queꞌyin, cyak queꞌyin ex lino chubemaj. Aju xbalun lu, laj var tnukbil ex cab var tucꞌil cab xcꞌachub twitz, ex ka aju twaꞌl, ax ic tzaꞌnx ke xbalun te makbil tiꞌjele peꞌn. 19 Cyaje tkan ex cyaje cykꞌukbil tkan kꞌan cꞌuxbil cytxꞌotxꞌil. Sak pwak cytxꞌotxꞌil ke ganch ex ke adorn cyjax tuj cywiꞌ ke tkan, ax icx ke argoy. 20 Kꞌan cꞌuxbil cytxꞌotxꞌil cycyakil ke stac in che ajben te tzinbil xbalun tiꞌj ja xbalun, ex ke stac in che ajben cyiꞌj tkan peꞌn.
Aju cyalil cꞌuxbil e ajben tiꞌj tja Dios
21 Tuꞌn orden tuꞌn Moisés, jaw cyiꞌn aj Leví jun tajlal cyiꞌj ke cꞌuxbil o che ajben tuꞌn tbant tja Dios, jatum tuꞌn tocx ten ju cax cꞌubl tley Dios; ex a Itamar tcyꞌajal pal Aarón oc te nejenel cye tiꞌj jlu.
22 Ate Bezaleel aju tcyꞌajal Uri, tal tchman Hur ex tiyjil Judá, tbincha tcyakilju otok tzaj tmaꞌn Kman te Moisés tuꞌn tbant, 23 ex o onin Aholiab tiꞌj, aju tcyꞌajal Ahisamac ex tiyjil Dan. Ate jlu baꞌn ximan ex mejor binchan tcyakil txcaj akꞌuntl; baꞌn chmon xbalun tucꞌix twitz tiꞌj nokꞌ ẍkꞌilun queꞌyin, ẍjulin queꞌyin, cyak queꞌyin ex lino tbanilxix.
24 Tcyakil kꞌan pwak ajben tuꞌn tbant tcyakil akꞌuntl tiꞌj tja Dios, oyaj jlu pon kꞌiꞌn, ex japun 21 quintal talil tuꞌn tcyakil, ic tzaꞌnx malbil in ajben tuj tja Dios.
25 Aju sak pwak jaw chmet cyxol xjal, japun 75 quintal tucꞌ 45 libr talil tuꞌn tcyakil, ic tzaꞌnx malbil in ajben tuj tja Dios. 26 Cycyakil keju otok jaw cyajlal, tzaj keꞌ cyiꞌj keju otok che japun twiꞌ winkin abkꞌi, o japun 603,550 cyajlal xinak tuꞌn tcyakil; ex teyle junjun cye xi tkꞌoꞌn jun tal sak pwak chꞌixmi mey ons talil ic tzaꞌnx malbil in ajben tuj tja Dios. 27 Ax icx xi tiꞌn 75 quintal sak pwak tuꞌn cybant ke cykꞌukbil tkan tja Dios ex ke cykꞌukbil tkan xbalun te makbil. Tcyakil sak pwak lu ajben tuꞌn cybinchet 100 cykꞌukbil tkan ja, ex teyle junjun tkꞌukbil xi tiꞌn 75 libr sak pwak. 28 Tiꞌj ju 45 libr sak pwak jaw chmet cyxol cycyakil xjal, e baj tbinchaꞌn Bezaleel ke ganch, ke argoy ex ke adorn cyjax tuj cywiꞌ ke tkan.
29 Aju kꞌan cꞌuxbil xi kꞌoꞌn te oyaj, japun 50 quintal tuꞌn tcyakil. 30 Tiꞌjtzun kꞌan cꞌuxbil lu, e baj binchaꞌn ke tkꞌukbil ttzi ja xbalun te mojbabl tibil, tucꞌix altar kꞌan cꞌuxbil ttxꞌotxꞌil, ex aju cꞌuxbil xawcꞌin toyꞌ tuꞌn tcyaj ten tjakꞌ chojbil oc tcub patit, ex cycyakil ke macbil in che ajben tiꞌj altar, 31 cyucꞌix ke cykꞌukbil tkan tiꞌjele peꞌn, ke cykꞌukbil tkan ttzi ttxaꞌn peꞌn, cycyakil ke stac in che ajben tiꞌj ja xbalun, ex ke stac in che ajben cyiꞌj ttxaꞌn peꞌn.