2 Ax icx cub binchaꞌn aju capiẍay tiꞌj kꞌan pwak, tiꞌj nokꞌ ẍkꞌilun queꞌyin, ẍjulin queꞌyin, cyak queꞌyin ex nokꞌ lino. 3 Baj txꞌinoꞌn kꞌan pwak tuꞌn martiy, xaxj oc wen, ex cub kesin tuꞌn toc ic tzaꞌn nokꞌ, tuꞌn t-xiꞌ chꞌin te ttzeꞌyil xbalun ẍkꞌilun queꞌyin, ẍjulin queꞌyin, cyak queꞌyin ex lino; tbanil binchben te. 4 E cub binchaꞌn ke twi semil, tuꞌn cymojeꞌ ke cycabil ttxaꞌn capiẍay cywi semil. 5 Aju cꞌalbil cꞌuꞌjbaj xiꞌyni tiꞌjxi capiẍay, tiklix tib tucꞌil ex ax binchben te; ajben kꞌan pwak tiꞌj, tucꞌix nokꞌ ẍkꞌilun queꞌyin, ẍjulin queꞌyin, cyak queꞌyin ex lino chubemaj, ic tzaꞌn otok tzaj tmaꞌn Kman te Moisés.

6 E baj binchaꞌn ke abj ónice, e cuꞌx kꞌoꞌn cyuj cykꞌukbil kꞌan pwak cytxꞌotxꞌil, ex jatz cꞌochin tuꞌn cycyaj ten cybi ke tcyꞌajal Israel cywitz, ic tzaꞌn twitz jun sey, 7 ex e cub tkꞌoꞌn Bezaleel cyibaj ke twi t-semil capiẍay. Cyuꞌntzun ke abj lu in che tzaj naꞌn ke tcyꞌajal Israel, ic tzaꞌn otok tzaj tmaꞌn Kman te Moisés.

8 Ax icx cub binchaꞌn aju tal xbalun nnoꞌc ten ttzi xuꞌcbaj, tbanil binchbente, ex ax ttzeꞌyil ic tzaꞌn te capiẍay; ajben kꞌan pwak tiꞌj, tucꞌix nokꞌ ẍkꞌilun queꞌyin, ẍjulun queꞌyin, cyak queꞌyin ex lino chubemaj. 9 Mejetzꞌin tten twitz ex junx cyaj tnukbil tucꞌil twitz; jun xcꞌachub tnukbil ex jun xcꞌachub twitz. 10 E oc kꞌoꞌn cyaje txol tal abj tbanilxix tiꞌj. Tuj tnejel txol oc kꞌoꞌn jun tal abj sardio, jun topacio ex jun carbunclo. 11 Tuj tcabin txol oc kꞌoꞌn jun tal abj esmeralda, jun zafiro ex jun diamante. 12 Tuj toxin txol oc kꞌoꞌn jun tal abj jacinto, jun ágata ex jun amatista. 13 Ex tuj tcyajin txol oc kꞌoꞌn jun tal abj berilo, jun ónice ex jun jaspe. Cycyakil ke tal abj lu kꞌukl cycub tibaj cykꞌukbil kꞌan pwak cytxꞌotxꞌil. 14 Ax cyajlal ke tal abj ic tzaꞌn cyajlal ke tcyꞌajal Israel, cablaj cybet. Ic tzaꞌn twitz jun sey jatz cꞌochin, tuꞌn tcyaj ten tbi jun cꞌloj tiyjil Israel twitz teyle junjun abj.

15 Tiꞌj tal xbalun nnoꞌc ten ttzi xuꞌcbaj e cub binchaꞌn ke caden kꞌan pwak tbanilxix cytxꞌotxꞌil, ex xpaltxꞌiꞌn cyten; 16 ax icx e cub binchaꞌn cabe cykꞌukbil argoy, ex cab argoy kꞌan pwak cytxꞌotxꞌil, ex e oc kꞌoꞌn ke cab argoy cyiꞌj cycabil ttxaꞌn tal xbalun. 17 E oc kꞌoꞌn cycabil ttxaꞌn caden kꞌan pwak cytxꞌotxꞌil cyuj argoy e oc ten cyiꞌj cycabil tbutxꞌ tal xbalun, 18 ex e oc kꞌoꞌn cabetl cytxaꞌn caden cyiꞌj ke cykꞌukbil kꞌan pwak cytxꞌotxꞌil cyocsaꞌn cyiꞌj ke cabe twi t-semil twitz capiẍay. 19 E cub binchaꞌntl cab argoy kꞌan pwak cytxꞌotxꞌil ex e oc kꞌoꞌn cyiꞌj cycabil tbutxꞌ tal xbalun tjakꞌxi, aju toc twitz capiẍay. 20 Ax icx e cub binchaꞌn cabetl argoy kꞌan pwak cytxꞌotxꞌil, ex e oc kꞌoꞌn tiꞌj cycabil pacꞌ capiẍay, nikayin ttxlaj slapbil te ex tibaj cꞌalbil tcꞌuꞌj capiẍay. 21 Tuꞌn jun cꞌalbil ẍkꞌilun queꞌyin e oc cꞌaloꞌn ke argoy cyoc tiꞌj tbutxꞌ tal xbalun, cyucꞌil keju argoy cyoc tiꞌj capiẍay, tuꞌntzun tcyaj ten tal xbalun tibaj cꞌalbil tcꞌuꞌj capiẍay ex tuꞌn miꞌn tel tpaꞌn tib tal xbalun tiꞌj capiẍay, ic tzaꞌn otok tzaj tmaꞌn Kman te Moisés.

22 Ax icx cuꞌtz tchmoꞌn aju xbalun nnoꞌc tujxi capiẍay tiꞌj nokꞌ ẍkꞌilun queꞌyin, 23 ex cyaj tkꞌoꞌn jun toyꞌ tuj tmij tuꞌn tjax wibaj tuj. Cub slapun jun tkul ttziꞌyile toyꞌ lu, ic tzaꞌn cyten ke chicyet tzꞌuꞌm, tuꞌntzun miꞌn t-xi tzakj. 24 Ttxaꞌnile xbalun lu e cub binchaꞌn tilbilal carnad ẍokꞌ, tiꞌj nokꞌ ẍkꞌilun queꞌyin, ẍjulin queꞌyin, cyak queꞌyin ex lino chubemaj. 25 E cub binchaꞌn tal campan kꞌan pwak tbanilxix cytxꞌotxꞌil, ex e ocx kꞌoꞌn cyxol tilbilal carnad ẍokꞌ ttxaꞌnile xbalun; 26 jun tal campan ex jun carnad ẍokꞌ, juntl tal campan ex juntl carnad ẍokꞌ, iclex tten ttxaꞌnile t-xbalun Aarón oc tajben tuj takꞌun te pal, ic tzaꞌn otok tzaj tmaꞌn Kman te Moisés.

27 Ax icx e cuꞌtz chmoꞌn ke ẍjoꞌw tiꞌj nokꞌ lino, tuꞌn cyajben te Aarón ex cye tcyꞌajal, 28 tucꞌix ju potzbil twiꞌ tnejel pal cuꞌtz chmoꞌn tiꞌj nokꞌ lino tbanilxix, ex ke potzbil wibaj tbanilxix cye mastl pal, ex ke calsonsiy e cuꞌtz chmoꞌn tiꞌj nokꞌ lino chubemaj, 29 tucꞌix cꞌalbil cꞌuꞌjbaj cuꞌtz chmon tiꞌj lino chubemaj, tiꞌj nokꞌ ẍkꞌilun queꞌyin, ẍjulin queꞌyin ex cyak queꞌyin, ic tzaꞌn otok tzaj tmaꞌn Kman te Moisés.

30 Cub binchaꞌn aju tal tzꞌlom xjan tiꞌj kꞌan pwak tbanilxix, ex jatz cꞌochin twitz ic tzaꞌn jun sey, tuꞌn cycyaj ten ke yol lu tiꞌj: XJANSAMAJ TE JLU TE KMAN. 31 Oc kꞌoꞌn jun takꞌal tal tzꞌlom ẍkꞌilun queꞌyin, tuꞌn toc kꞌot tiꞌj potzbil wibaj, ic tzaꞌn otok tzaj tmaꞌn Kman te Moisés.

32 Cyjaꞌtzun tten jupet akꞌuntl tiꞌj tja Dios, aju ja xbalun te mojbabl tibil. O cybincha aj Israel tcyakil ic tzaꞌn otok tzaj tmaꞌn Kman te Moisés. 33 Ultzun cyiꞌn tja Dios tuj tcwent Moisés. Ul cyiꞌn aju ja xbalun te mojbabl tibil, cyucꞌix ke macbil in che ajben tiꞌj: Ke ganch, ke tzꞌlom, ke tzeꞌ te tkꞌeꞌlil, ke tkan ex ke cykꞌukbil tkan; 34 aju maksibl te ja xbalun binchamaj tiꞌj ttzꞌumal ẍneꞌl toc tcꞌaꞌ cyak queꞌyin, aju maksibl binchamaj tiꞌj tzꞌuꞌm tbanilxix, aju xbalun te makbil tetz twitz cax; 35 aju cax cꞌubl tley Dios cyucꞌix ke tzeꞌ te tanubl te ex aju tmaksil; 36 aju mes cyucꞌix cycyakil ke macbil in che ajben tiꞌj ex ke pan in che cub kꞌoꞌn twitz Kman; 37 aju cycubil candil kꞌan pwak tbanilxix ttxꞌotxꞌil, cyucꞌix ke candil akeju txolin cyten, ex cycyakil ke macbil in che ajben tiꞌj, tucꞌix ju aseyt tuꞌn tkꞌonte spicꞌun; 38 aju altar kꞌan pwak ttxꞌotxꞌil, aju aseyt tuꞌn tajben oc toc toclen jun xjal, aju storac tbanilxix tcꞌocꞌjal, aju xbalun te makbil tuꞌn toc ttzi ja xbalun, 39 aju altar kꞌan cꞌuxbil ttxꞌotxꞌil tucꞌix ju kꞌan cꞌuxbil xawcꞌin toyꞌ in cyaj tjakꞌ chojbil oc tcub patit, ke tzeꞌ te tanubl te, cyucꞌix cycyakil ke macbil in che ajben tiꞌj, aju tcubil aꞌ tucꞌix tkꞌukbil, 40 ke xbalun te makbil tiꞌjele peꞌn, ke tkan, ke cykꞌukbil tkan, aju xbalun te makbil tuꞌn toc ttzi peꞌn, ke cꞌalbil tkan peꞌn, ke stac, ex cycyakil ke tiꞌxti in che ajben tiꞌj tja Dios aju ja xbalun te mojbabl tibil, 41 ke xbalun tuꞌn toc cykꞌoꞌn pal oc cyajben tuj tja Dios, ke xbalun xjansamaj tuꞌn tajben te pal Aarón ex ke cyxbalun tcyꞌajal oc cyajben te pal. 42 O cybincha aj Israel tcyakil akꞌuntl ic tzaꞌn otok tzaj tmaꞌn Kman te Moisés.

43 O til Moisés tcyakil akꞌuntl otok cybincha, otok bant cyuꞌn ic tzaꞌnx otok tzaj tmaꞌn Kman, ex e cub tcyꞌiwlaꞌn.