2 —Kꞌmanxa cye aj Israel tuꞌn tjaw cychmoꞌn oyaj te weye. Cjawil cychmoꞌne cyxol cycyakil keju cyaj tuꞌn ttzaj cykꞌoꞌn tuꞌn cyex cygan ex tuꞌn tcyakil cyanmi. 3 Akeju oyaj cjawil cychmoꞌne, atzun ke jlu: Kꞌan pwak, sak pwak, kꞌan cꞌuxbil, 4 xbalun ẍkꞌilun queꞌyin, xbalun ẍjulin queꞌyin, xbalun cyak queꞌyin, tbanil xbalun lino, ttzmal chip, 5 ttzꞌumal ẍneꞌl toc tcꞌaꞌ cyak queꞌyin, tzꞌuꞌm tbanilxix, tzeꞌ chꞌiꞌx acacia, 6 aseyt tuꞌn tajben cyuj candil, t-samel at tcꞌocꞌjal tuꞌn tcuꞌx kꞌot tuj aseyt aju in ajben oc toc toclen jun xjal, ex tuꞌn tajben te tcꞌocꞌjal storac, 7 ke tal abj ónice ex txkantl tal abj tbanil, tuꞌn toc kꞌot tiꞌj capiẍay nnoꞌc tkꞌoꞌn tnejel pal, ex tiꞌj tal xbalun nnoꞌc ten ttzi t-xuꞌc. 8 Kꞌmanxa cye tuꞌn cybinchante jun ja xbalun te weye, tuꞌn nnajane cyxol. 9 Cjawil cybinchaꞌne aju ja lu ex cycyakil ke macbil che tel tuj, ic tzaꞌnxix cxel nyecꞌune teya.

10 Binchama jun cax tiꞌj tzeꞌ chꞌiꞌx acacia, te jun var tucꞌil jun xcꞌachub tnukbil, ox xcꞌachub twitz, ex ox xcꞌachub twaꞌl. 11 Loꞌtzin oca kꞌan pwak tbanilxix tujile ex tiꞌjele, ex binchan jawa jun adorn kꞌan pwak ttxꞌotxꞌil ttziꞌyile. 12 Ax icx binchama cyaje argoy kꞌan pwak cytxꞌotxꞌil, ex kꞌon oca ke cyiꞌj cycyajil tkan cax, cabe jun pacꞌ ex cabetl juntl pacꞌ. 13 Ax icx binchama cabe tzeꞌ tolin cyiꞌj, tiꞌj tzeꞌ chꞌiꞌx acacia, ex loꞌtzin oca kꞌan pwak cyiꞌj. 14 Kꞌon extzuna ke tzeꞌ lu cyuj ke argoy ateꞌc ttxlaj cax, tuꞌn cyajben tuꞌn t-xi tanut cax. 15 Ax che cyjel ten ke tzeꞌ cyuj ke argoy cyoc tiꞌj cax, miꞌn che etz kꞌit. 16 Tujtzun cax lu cbelex tkꞌoꞌna aju ley cxel nkꞌoꞌne teya.

17 Binchama jun tmaksil cax kꞌan pwak tbanilxix ttxꞌotxꞌil, jatum tuꞌn tnajset cyil xjal, te jun var tucꞌil jun xcꞌachub tnukbil ex ox xcꞌachub twitz. 18 Ax icx binchama cabe tilbilal querubín kꞌan pwak cytxꞌotxꞌil txꞌinoꞌn tuꞌn martiy, ex che bel tkꞌoꞌna cyibaj cycabil pacꞌ ttxaꞌn tmaksil cax. 19 Jun cbel ten tibaj jun pacꞌ ttxaꞌn tmaksil cax ex jun tibaj juntl pacꞌ. Junx piẍ cꞌelel tmaksil cyucꞌil ke cabe tilbilal querubín. 20 Che jawil cylicꞌun cyxicꞌ tuꞌn ttxayit tmaksil cax. Ctel twitz jun tumlal twitz juntl, ex cyjaꞌ cbel cyqueꞌyin tibaj tmaksil. 21 Cbelex tkꞌoꞌna tuj cax aju ley cxel nkꞌoꞌne teya, ex cbel tkꞌoꞌna tmaksil cax. 22 Atzun cꞌoquel ncꞌulban wibe tucꞌila tibaj tmaksil cax ex cyxol ke cabe tilbilal querubín, akeju cycubsaꞌn tibaj cax cꞌubl nleye. Atzun cxel nmaꞌne teya tcyakil aju waje tuꞌn t-xi tmaꞌna cye aj Israel.

23 Binchama jun mes tiꞌj tzeꞌ chꞌiꞌx acacia, jun var tnukbil, cabe xcꞌachub twitz, ex ox xcꞌachub twaꞌl. 24 Loꞌtzin oca kꞌan pwak tbanilxix tiꞌjele, ex binchan jawa jun adorn kꞌan pwak ttxꞌotxꞌil ttxaꞌnile mes. 25 Ax icx binchama jun tmakel ttxaꞌnile tjakꞌ mes, cyaje kꞌab twaꞌl, ex loꞌtzin oca jun adorn kꞌan pwak ttxꞌotxꞌil tiꞌjele. 26 Binchama cyaje argoy kꞌan pwak cytxꞌotxꞌil, ex kꞌon oca ke cyiꞌj cycyajil pacꞌ ttxaꞌn mes, cyumlal ke tkan. 27 Che oquel ten ke argoy lu tjakꞌ tmakel mes tuꞌn cyocx ke tzeꞌ tolin cyiꞌj tuꞌn cyajben tuꞌn t-xi tanut mes. 28 Binchama ke cabe tzeꞌ lu tiꞌj tzeꞌ chꞌiꞌx acacia, ex loꞌtzin oca kꞌan pwak cyiꞌj, porque cyiꞌjtzun cxel tanut mes. 29 Ax icx binchama tiꞌj kꞌan pwak tbanilxix, ke lak, ke pacꞌ, ke xar ex ke vas ma tij, tuꞌn cyajben te kobl oyaj tiꞌj taꞌl twitz uva. 30 Cucx che bel cykꞌoꞌne tibaj mes lu ke pan in che cub kꞌoꞌn nwitze.

31 Ax icx binchama jun cycubil candil kꞌan pwak ttxꞌotxꞌil txꞌinoꞌn tuꞌn martiy. Te junx cꞌelel aju tkꞌukbil, tkan, ke tcopa, ke tilbilal xwaquin cyten, ex ke tilbilal bech. 32 Che elel kak tkꞌab tiꞌj tcꞌuꞌj; ox tuj jun pacꞌ ex ox tuj juntl pacꞌ. 33 Tiꞌj teyle junjun tkꞌab cꞌelel tiꞌj tcꞌuꞌj, che tel ox tilbilal bech tjakꞌxi, ic ctel binchben cye ic tzaꞌn t-xmacal tzeꞌ almendro; ax icx ctel ox tilbilal xwaquin cyten tucꞌix cycopa. Iclex ctelba cyiꞌj ke kak tkꞌab. 34 Tiꞌj ju tkan tuj tmij cycubil candil, che tel cyaje tilbilal bech tjakꞌxi, ic ctel binchben cye ic tzaꞌn tilbilal t-xmacal tzeꞌ almendro; ax icx ctel cyaje tilbilal xwaquin cyten tucꞌix cycopa. 35 Tiꞌj teyle junjun moj tkꞌab cꞌelel tiꞌj tcꞌuꞌj, cyjel kꞌot jun tilbilal bech tjakꞌxi. 36 Ke tilbilal bech ex ke tkꞌab che elel tiꞌj junx piẍ kꞌan pwak tbanilxix ex txꞌinoꞌn tuꞌn martiy. 37 Ax icx binchama wuk candil, akeju che oquel cytxakoꞌne tuꞌn cykꞌonte spicꞌun tetz twitzx, 38 ex ke matzbil cywi mech cyucꞌix ke tal tcubil ttzaꞌjil mech, ax icx kꞌan pwak cytxꞌotxꞌil. 39 Cꞌajbel 75 libr kꞌan pwak tbanilxix cyuꞌne tuꞌn tbant aju cycubil candil ex cycyakil ke macbil che ajbel tucꞌil. 40 Cybinchame jlu ic tzaꞌnx tilbilal xi nyecꞌune teya twi witz.