Cyuwsabl tyol Dios cyucꞌil aj Israel
24
Tzaj tmaꞌntl Kman te Moisés cyjaꞌ: Tjatza tzalu wucꞌile, tucꞌix Aarón, Nadab, Abiú ex 70 tij xjal cyxol aj Israel, ex che mocꞌecuye najchakyin. 2 Oꞌcx teya ctzajel lakꞌeꞌ wucꞌile; atzun cye txkantl, miꞌn che tzaj lakꞌeꞌ, ex miꞌn che jatz ke xjal tucꞌila, chi Kman.3 Cubiltzun Moisés ex xi ttxꞌolbaꞌn cye xjal tcyakil tyol Kman, cyucꞌix cycyakil ke ley; atzun cye tnam xjal xi cytzakꞌweꞌn cycyakil junx cyjaꞌ:
—Cbantel kuꞌne tcyakilju ma tma Kman, che chi.
4 Cub ttzꞌiban Moisés tcyakil yol tzaj tmaꞌn Kman te. Tej tjaw weꞌ te prim tuj juntl kꞌij, jaw tbinchaꞌn jun altar t-xe witz, ex e cub twalbaꞌn cablaj abj ic tzaꞌnx cablaj cꞌloj cyiyjil aj Israel. 5 E jeꞌx t-samaꞌn Moisés txkan cuꞌxun aj Israel, cub cybyoꞌn txkan tal tor ex cub cypatun te chojbil ex te oyaj te mojbabl tibil tucꞌil Kman. 6 Tzajtzun tiꞌn Moisés mij chicꞌ ex cuꞌx tkꞌoꞌn cyuj matij lak; atzun mijtl chicꞌ cub ttxꞌitoꞌn tibaj altar. 7 Te tibajxi jlu, tzaj tiꞌn Moisés aju uꞌj jatum tzꞌibantok yol otok cyaj bant tiꞌj tuꞌn Dios cyucꞌil, ex jaw t-schꞌiꞌn cywitz xjal. Atzun cye xjal cyma cyjaꞌ:
—Cbantel kuꞌne tcyakilju ma tma Kman, ex cxel knimane, che chi.
8 Tzajtzun tiꞌn Moisés chicꞌ, xi ttxꞌitoꞌn cyibaj xjal ex tma: Aju chicꞌ lu, atzun cyuwsabl te yol ma cyaj bant tiꞌj tuꞌn Kman cyucꞌile, ic tzaꞌn in tmaꞌn tcyakil yol lu.
9 Jaxtzun Moisés twi witz tucꞌix Aarón, Nadab, Abiú ex 70 tij xjal cyxol aj Israel, 10 ex o cyil aju Cydios aj Israel. Tcubtok jun waꞌlbil tjakꞌ tkan ic queꞌyin ic tzaꞌn abj zafiro, ex ictok queꞌyin ic tzaꞌn twitz cyaꞌj oc mintiꞌ muj. 11 Pero mintiꞌ baj cyiꞌj ke nejenel cye aj Israel tuꞌn Dios masque o ilwaj Dios cyuꞌn. E waꞌntzun ex e cꞌan.
Jax Moisés twi witz Sinaí
12 Tzajtzun tmaꞌn Kman te Moisés cyjaꞌ: Tjaxa wucꞌile twi witz ex ayona wiꞌje ma chixin. Che xel nkꞌoꞌne ke tzꞌlom abj teya jatum tzꞌibamaj ley ex ke mandamyent wuꞌne, tuꞌn tajben te xnakꞌtzbil cyeye.
13 Jawtzun weꞌ Moisés tucꞌix Josué aju onil te, ex cub be cyuꞌn tuꞌn cyjax twi witz te Dios. 14 Xi tmaꞌn cye tij xjal cyxol aj Israel cyjaꞌ: Che ayone kiꞌje tzalu ocxi kcubile cyucꞌile. Cyjel ten Aarón ex Hur cyucꞌile, ex ka at jun ma baj cyxol xjal, cykꞌmanxe cye.
15 Jaxtzun Moisés twi witz Sinaí, cub juqueꞌ muj twi witz, 16 ex atzun cub ten tajwalil Kman. Kak kꞌij o ten aju muj twi witz. Tujtzun twukin kꞌij o txocl Moisés tuꞌn Dios tuj tmij muj. 17 Aju tajwalil Kman twi witz ic queꞌyin tuj cywitz aj Israel ic tzaꞌn kꞌakꞌ in baj tzꞌeꞌy tcyakil tuꞌn. 18 Ocxtzun Moisés tuj tmij muj ex jax twi witz. 40 kꞌij ex 40 konicꞌan o ten Moisés twi witz.