2 Miꞌn che oc lpeꞌye tiꞌj tnimal xjal tuꞌn cybinchanteye aju mya baꞌn.

Oc cyocxe cywitz jwes te testiw, miꞌn txi cykꞌoꞌne cywiꞌye cyiꞌj tnimal xjal tuꞌn tbant aju mya tuj tumel, 3 ax icx miꞌn che coline cyiꞌj ke meba xjal ka at cyil.

4 Ka ma txi tzpet twacẍ ex ka tbur jun aj kꞌoj tiꞌja, ex ka ma tzꞌoc noja tiꞌj, kꞌon aja te. 5 Ka at jun xjal nneꞌl icꞌunte teya, ex ka ma tila ma cub tzꞌak tbur tjakꞌ tikatz, miꞌn nok tzꞌoc tqueꞌyina, cꞌonila tiꞌj tuꞌn tjaw weꞌ tbur.

6 Mya tuꞌnju meba jun xjal miꞌn txi cybinchaꞌne tiꞌj oc tpon twitz ley.

7 Cypaꞌmil cyibe tiꞌj nicꞌaj yol ex miꞌn cub cybyoꞌne jun xjal mintiꞌ til ex tzꞌaklxix, porque mlay tzꞌoc nkꞌoꞌne te tzꞌaklxix aju xjal at til.

8 Miꞌn tzaj cycꞌmoꞌne pwak in cykꞌoꞌn binchal mya baꞌn, porque tuꞌnju pwak lu in moẍix cywitz ke xjal tuꞌn miꞌn tel cynicꞌ tiꞌj ju tzꞌaklxix, ex in baj tchꞌexpuꞌn cyyol keju xjal tzꞌaklxix.

9 Miꞌn baj cyyajlaꞌne ke stranjer xjal, tuꞌnju ojtzkiꞌn cyuꞌne tzaꞌn tten tchwinklal jun stranjer xjal, porque icx cyeye o che tene te stranjer xjal tuj txꞌotxꞌ Ejipt.

10 Kak abkꞌi che awale twitz txꞌotxꞌ ex cjawil cychmoꞌne twitz cyawale; 11 Atzun tuj twukin abkꞌi miꞌn cuꞌx cyawaꞌne awal tuj txꞌotxꞌ, tuꞌntzun cywaꞌn ke meba, akeju najl tuj cytxꞌotxꞌe, tiꞌj t-xpokꞌil awal; atzunju cyjel ten cxel cywaꞌn ke txcup te tjakꞌ cꞌul. Ax icx cybinchame jlu tiꞌj tkan uva ex tkan olivo.

12 Kak kꞌij che akꞌnale, atzun tuj twukin kꞌij che ojlale tuꞌntzun cyojlan cywacẍe ex cyburre, ex tuꞌn toc t-xel cyipun ke cyal cymajene xuꞌj ex ke stranjer xjal.

13 Japunx cyuꞌne tcyakilju ma txi nmaꞌne cyeye. Miꞌn tzaj cynaꞌne cybi junxitl dios, ex miꞌn che yoline cyiꞌj.

14 Teyle junjun abkꞌi cbel cyicꞌsaꞌne ox ninkꞌij te nimbil weye. 15 Cbel cyicꞌsaꞌne aju ninkꞌij tuꞌn cywaꞌne pan mintiꞌ t-samel tuj tuꞌn tjaw mal tcꞌuꞌj. Wuk kꞌij che waꞌle pan mintiꞌ t-samel tuj, ic tzaꞌn o nmaye cyeye. Oc cybinchaꞌye jlu tuj tkꞌijlalil banimaj tiꞌj tuj xjaw Abib, porque tuj xjaw lu e jeꞌtze tuj Ejipt. Mi jun tuꞌn tul nwitze ka mintiꞌ kꞌiꞌn tuꞌn.

16 Ax icx cbel cyicꞌsaꞌne aju ninkꞌij cyiꞌj tnejel twitz cyawale otok cuꞌx cyawaꞌne tuj cojbil, ax icx aju ninkꞌij oc tjaw cychmoꞌne tcyakil twitz cyawale oc tbaj abkꞌi.

17 Ox maj tuj abkꞌi che pol cycyakil xinak yecꞌulte cyib nwitze, akine Cymane.

18 Oc ttzaj cykꞌoꞌne jun alumaj te chojbil weye, miꞌn tzaj cykꞌoꞌne tchcꞌel junx tucꞌil pan at t-samel tuj tuꞌn tjaw mal tcꞌuꞌj, ex miꞌn txi cycꞌuꞌne t-sebyil te juntl kꞌij.

19 Ctzajel cyiꞌne tuj njaye aju tbanilxix tiꞌj tnejel twitz cyawale ctzajel tuj cytxꞌotxꞌe. Akine Cymane ex Cydiose.

Miꞌn jax cytxcoꞌne tal chip tujx taꞌl tim ttxuꞌ.

20 Cybintze, cxel nsamaꞌne n-anjele tuꞌn tcub nej cywitze, tuꞌn cyoc cwentine tuꞌn tuj be, ex tuꞌn cyxi kꞌiꞌne tuꞌn tuj txꞌotxꞌ banimaj wuꞌne te cyeye. 21 Ten tchiylal cyeye, cynimanxe, ex miꞌn che oque chcyinwiꞌ. Mlay cub tnajsaꞌn cyile, porque akine samalte te. 22 Ka axix toc ma txi cybiꞌne tyol ex ka ma cybinchaye tcyakilju in xi nmaꞌne cyeye, chin oqueltzune aj kꞌoj cyiꞌj ke aj kꞌoj cyiꞌje, ex che bajel nyajlaꞌne keju che yajlalte cyeye. 23 Cbeltzun nej n-anjele cywitze, ex che xel kꞌiꞌne tuꞌn tuj cytxꞌotxꞌ aj Amorrey, aj Hetey, aj Ferezey, aj Cananey, aj Hevey ex aj Jebusey, porque biꞌx che najel ke jlu wuꞌne. 24 Miꞌn che cub ẍmejeꞌye cywitz cydios ex miꞌn che cꞌulune cye. Miꞌn cybinchaye ic tzaꞌn cye in cybinchaꞌn. Nok oꞌcx che bajel cybuchine ke tilbilal ex ke abj nnoꞌc cykꞌoꞌn te xjan. 25 Che cꞌulune weye, akine Cymane ex Cydiose, ex ctzajeltzun nkꞌoꞌne cywaye ex cycꞌaye aꞌ, ex cꞌelel wiꞌne yabil cyiꞌje. 26 Mi jun xuꞌj ctel cyxole miban alin ex mi jun nok cucx cꞌelel tal. Mlay che cyime ka naꞌnxtok cytijine.

27 Cxel nsamaꞌne xobsabl cyibaj nasyon jatum che oquexe, biꞌx cnajel cynabl wuꞌne ex che eleltzun ok ke aj kꞌoj cyiꞌje. 28 Che xel nsamaꞌne ttxu sichil cywitze tuꞌn cyex cylajoꞌn ke aj Hevey, ke aj Cananey ex ke aj Hetey. 29 Mya tuj junx abkꞌi che elex nlajoꞌne ke xjal lu cywitze, tuꞌntzun miꞌn tcyaj ten txꞌotxꞌ mi aꞌl xjal tuj, ex tuꞌn miꞌn cychmet txcup te tjakꞌ cꞌul tuj tuꞌn cybinchante mya baꞌn cyiꞌje. 30 Cheba che elex baj ke xjal lu wuꞌne ocxi tchmet mas cybaje, ex ocxi cyoque tajwil txꞌotxꞌ. 31 Aju tmojonil cytxꞌotxꞌe cyjel nkꞌoꞌne, atzun jlu: Cxel keꞌ ttzi Mar Cyak Queꞌyin ex cpol baj ttzi mar cye aj Filistey. Cxel keꞌtl tiꞌj tzkij txꞌotxꞌ ex cpol baj ttzi nima Éufrates. Che xel nkꞌoꞌne tuj cykꞌabe ke xjal najl tuj txꞌotxꞌ lu, ex che elex cylajoꞌne cywitze.

32 Miꞌn cyaj bant tiꞌj jun cyyole cyucꞌil, mi cyucꞌil ke cydios. 33 Miꞌn cyakꞌe ambil tuꞌn cynajan ke xjal lu tuj cytxꞌotxꞌe, tuꞌntzun miꞌn cybinchane il nwitze oc cycꞌulune cywitz cydios, porque ka ma cybinchaye jlu che najele, chi Dios.