Ke ninkꞌij tuꞌn cyicꞌset teyle junjun abkꞌi
16
Oc tul canun xjaw Abib, cyicꞌsan cube aju Xjan Kꞌij te nimbil te Kman Dios, porque tuj jun konicꞌan te xjaw lu e jetz kꞌiꞌne tuj Ejipt tuꞌn Kman Dios. 2 Tuj Xjan Kꞌij cbel cybyoꞌne wacẍ ex ka ẍneꞌl te chojbil te Kman Dios tuj lugar cjawil t-scꞌoꞌn te nabl tbi.3 Cxel cychyoꞌne tucꞌil pan mintiꞌ t-samel tuj tuꞌn tjaw mal tcꞌuꞌj. Wuk kꞌij che waꞌle pan mintiꞌ t-samel tuj tuꞌn tjaw mal tcꞌuꞌj; pan te bis cꞌoquel tbi, porque nok elacyim e jeꞌtze tuj Ejipt. Acux itzꞌ keye tzalu twitz txꞌotxꞌ cynaꞌntze aju kꞌij tej cyetze tuj Ejipt. 4 Cyuj wuk kꞌij lu mintiꞌ tuꞌn tten t-samel pan tuꞌn tjaw mal tcꞌuꞌj tuj tcyakil cytanmi, ex miꞌn cyaj cykꞌoꞌne tuj juntl kꞌij chꞌintl tchibjal alumaj otok txi cykꞌoꞌne te chojbil te kale tuj tnejel kꞌij. 5 Miꞌn txi cykꞌoꞌne chojbil tuj Xjan Kꞌij nok tuj alcyechakx tnam ctzajel tkꞌoꞌn Kman Dios cyeye, 6 nok oꞌcx tuj lugar cjawil t-scꞌoꞌn te nabl tbi, ex atzun cxel cykꞌoꞌne chojbil ocxi tex kꞌij, porque atzun or lu tej cyetze tuj Ejipt. 7 Cꞌoquex cytxoꞌne alumaj twitz kꞌakꞌ ex cxel cychyoꞌne tuj lugar cjawil t-scꞌoꞌn Kman Dios, ex te prim tuj juntl kꞌij che ajel meltzꞌaje cyjaye. 8 Cyuj kak kꞌij che waꞌle pan mintiꞌ t-samel tuj tuꞌn tjaw mal tcꞌuꞌj, ex tuj twukin kꞌij cꞌoquel jun buyj tibil tbanilxix cyuꞌne te nimbil te Kman Dios; tuj kꞌij lu mintiꞌ akꞌuntl cbantel cyuꞌne.
9 Cbel cyajlaꞌne wuk seman, ctzajel keꞌ tajlet tuj kꞌij oc ttzyet tuꞌn tjaw chmet twitz triw, 10 cbeltzun cyicꞌsaꞌne jun ninkꞌij te nimbil te Kman Dios oc cyjapun baj ke wuk seman, ex che xeꞌl cykꞌoꞌne cyoyaje tuꞌn cyexe cygan, ic tzaꞌnx tcyꞌiwbil Kman Dios otok cycꞌame. 11 Che tzalajele twitz Kman Dios tuj lugar otok jaw t-scꞌoꞌn te nabl tbi, junx cyucꞌil ke cycyꞌajale, ke cymeꞌjele, ke cymajene xinak, ke cymajene xuꞌj, cyucꞌix ke aj Leví, ke stranjer xjal, ke cꞌwaꞌl mintiꞌ cyman ex cytxuꞌ, ex ke meba xuꞌj najl tuj cytanmiye. 12 Cynaꞌntze, icx cyeye o che tene te majen tuj Ejipt; tuꞌntzun jlu japunx cyuꞌne cycyakil ke ley lu.
13 Octzun tbaj cychmoꞌne twitz triw ex oc tbaj cyyatzꞌoꞌne taꞌl twitz uva, cbel cyicꞌsaꞌne wuk kꞌij ninkꞌij cyuj ke tal ja t-xak tzeꞌyin cywiꞌ. 14 Che tzalajxe tuj ninkꞌij lu junx cyucꞌil ke cycyꞌajale, ke cymeꞌjele, ke cymajene xinak, ke cymajene xuꞌj, cyucꞌix ke aj Leví, ke stranjer xjal, ke cꞌwaꞌl mintiꞌ cyman ex cytxuꞌ, ex ke meba xuꞌj najl tuj cytanmiye. 15 Wuk kꞌij cbel cyicꞌsaꞌne ninkꞌij lu te nimbil te Kman Dios tuj lugar cjawil t-scꞌoꞌn; porque che bel cyꞌiwlaꞌne tuꞌn Kman Dios cyiꞌj cycyakil cywitz cyawale ex cyiꞌj cycyakil cyakꞌunbene, ex che tzalajelxixe wen.
16 Ox maj tuj abkꞌi tuꞌn cypon cycyakil xinak aj Israel twitz Kman Dios tuj lugar cjawil t-scꞌoꞌn. Atzun tuꞌn cypon cyuj ke ninkꞌij lu: Tuj ninkꞌij cye pan mintiꞌ cysamel cyuj tuꞌn tjaw mal cycꞌuꞌj, tuj ninkꞌij cye seman, ex tuj ninkꞌij cye tal ja t-xak tzeꞌyin cywiꞌ. Mi jun jacu pon twitz Kman ka mintiꞌ kꞌiꞌn tuꞌn; 17 teyle te junjun cxel tiꞌn toyaj ic tzaꞌnx tcyꞌiwbil Kman Dios otok tcꞌam.
Ke tumel tzaꞌn tten tuꞌn t-xi binchet cyiꞌj xjal
18 Cykꞌon oque ke jwes ex ke ajcal cyuj cycyakil tnam che tzajel tkꞌoꞌn Kman Dios te teyle junjun cꞌloj cyiyjile, tuꞌntzun cycawin tuj tumelxix cyibaje. 19 Miꞌn baj cychꞌexpuꞌne ke ley; miꞌn tzꞌoc cyqueꞌyine cyxilen xjal ex miꞌn txi cycꞌmoꞌne pwak tuꞌn miꞌn tcub cysentens xjal binchal mya baꞌn, porque tuꞌntzun pwak lu in moẍsanjtz cywitz ke xjal at cynabl, ex in baj tzpet-saꞌn cyyol ke xjal tzꞌaklxix. 20 Tuj tumelxix cxel cybinchane cyiꞌj xjal, tuꞌntzun cyankꞌine ex tuꞌn cyoque tajwil txꞌotxꞌ ctzajel tkꞌoꞌn Kman Dios cyeye.