2 Aju najsbil cꞌas ictzun ctembil cyjaꞌ: Tcyakil xjal otok txi tkꞌoꞌn tchꞌex jun tucꞌil, cbel tnajsaꞌn aju otok txi tkꞌoꞌn te chꞌex. Mlay tzꞌoc tentl kanilte te tucꞌil ex ka te t-xjalil tuꞌn tajtz tchjoꞌn, porque otok kꞌmanjtz aju abkꞌi te najsbil cꞌas tuꞌn Kman. 3 Atzun te jun stranjer xjal, baꞌn tuꞌn t-xi cykanine tuꞌn tajtz tchjoꞌn tcꞌas, atzun te cyermaniye, cbel cynajsaꞌne aju otok txi tchꞌexoꞌn cyeye; 4 tuꞌntzun miꞌn tten jun meba cyxole, porque che bel cyꞌiwlaꞌne tuꞌn Kman Dios tuj txꞌotxꞌ ctzajel tkꞌoꞌn cyeye te cyetzbile. 5 Ka cucx ma che nimane te, ex ka ma che japun cycyakil ke mandamyent lu cyuꞌne akeju ma cheꞌx nmaꞌne cyeye jaꞌlo, 6 ax toc che bel cyꞌiwlaꞌne tuꞌn Kman Dios ic tzaꞌnx o tzaj ttziyan cyeye, ex cxel cykꞌoꞌne cychꞌex nimcu nasyon, atzun cyeye miꞌn txi cykanine cychꞌexe cye. Nimcu nasyon che tel tjakꞌ cycawbile, atzun cyeye mlay che ocx tene tjakꞌ cycawbil.

7 Ka at jun meba cyxol ke cyermaniye tuj jun tnam tuj txꞌotxꞌ ctzajel kꞌoꞌn cyeye tuꞌn Kman Dios, miꞌn cub cycyuwsaꞌn cyanmiye ex miꞌn cub cyxcꞌayine onbilte, 8 nok oꞌcx che onine tiꞌj ex cykꞌonxe tchꞌex, nok nicꞌpun at tajben te. 9 Ten cycwente cyiꞌje, miꞌn cub cyximane mya baꞌn lu tuj cyanmiye tuꞌn cymanteye cyjaꞌ: Chꞌix tul canun twukin abkꞌi, aju abkꞌi te najsbil cꞌas, jacu che chiye, ex tuꞌn jlu che oquele xcꞌa twitz cyermaniye meba ex mintiꞌ tchꞌex cxel cykꞌoꞌne, porque mya yajcu txi tmaꞌn xjal lu te Kman, ex aju cybinchbene lu cꞌoquel te il te cyeye. 10 Il tiꞌj cxel cykꞌoꞌne tcyakil aju at tajben te, ex miꞌn tzaj cybise oc t-xi cykꞌoꞌne, porque tuꞌn jlu che bel cyꞌiwlaꞌne tuꞌn Kman Dios tiꞌj tcyakil cyakꞌunbene ex tiꞌj tcyakilju cyajbile tuꞌn tbant. 11 Cucx che tel ke xjal meba cyxole. Tuꞌntzun jlu, in xi nmaꞌne cyeye tuꞌn t-xi cykꞌoꞌne tcyakilju at tajben cye cyermaniye meba ex cye keju mintiꞌ at cye, akeju ateꞌ tuj cytanmiye.

12 Ka at jun cyermaniye ax aj Hebrey ma tzaj tcꞌayin tib cyeye tuꞌn toc te cymajene, ka xinak ex ka xuꞌj, oꞌcx kak abkꞌi cꞌajbel cyeye; atzun tuj twukin abkꞌi cxel cytzokpiꞌne. 13 Octzun tex tuj cyjaye, miꞌn tzꞌex cytzokpiꞌne nok cucx mintiꞌ chꞌin kꞌiꞌn tuꞌn, 14 nok oꞌcx cykꞌonxe talun cyxol ke alumaj ateꞌ cyucꞌile, tucꞌix triw ex taꞌl twitz uva; cxel cykꞌoꞌne chꞌin te tiꞌj cykꞌinumable, ic tzaꞌnx otok tzaj tkꞌoꞌn Kman Dios cyeye. 15 Miꞌn tzicꞌ tnaꞌl cyuꞌne, ax icx cyeye o che tene te majen tuj Ejipt, ex tuꞌn Kman Dios e etz colpiꞌne. Tuꞌntzunju in xi nmaꞌne jlu cyeye jaꞌlo.

16 Katzun ma tma cymajene cyjaꞌ: Mlay cyaj ncolina porque at ncꞌuꞌje tiꞌja ex cyiꞌj keju ateꞌ tuj tjaya, ex tuꞌnju baꞌna wiꞌje, ka chi, 17 ctzajeltzun cyiꞌne jun bak tzꞌuꞌp twiꞌ, cpol cylakꞌbaꞌne t-ẍcyin majen ttzi tpwertil cyjaye, ex cꞌelex cykꞌoꞌne toyꞌ; atzun jun yecꞌbil tuꞌn toc te cymajene te jumajx, ka xinak ex ka xuꞌj. 18 Oc t-xi cytzokpiꞌne cymajene, miꞌn tzꞌoc jlu cyuw te cyeye, porque kak abkꞌi otok akꞌnan cyucꞌile ex aju otok txi cykꞌoꞌne te, nok mij ic tzaꞌn twi tcꞌuꞌj akꞌnal; ex che bel cyꞌiwlaꞌne tuꞌn Kman Dios tiꞌj tcyakilju cbantel cyuꞌne.

19 Cykꞌonxe te Kman Dios cycyakil ke cynejel cyal cywacẍe ex cynejel cyal cyẍneꞌle, akeju tman ke.

Miꞌn che oc cykꞌoꞌne te akꞌnal ke cynejel cyal cywacẍe, akeju tor ke, ex miꞌn tzꞌel cymatzoꞌne cylan ke cynejel cyal cyẍneꞌle, akeju tman ke. 20 Teyle te junjun abkꞌi che chyoꞌle cyiꞌj twitz Kman Dios, junx cyucꞌil keju ateꞌ tuj cyjaye, tuj lugar otok jaw t-scꞌoꞌn Kman. 21 Katzun at tpaltil, ka cox, ka moẍ ex ka at juntl tpaltil, miꞌntzun txi cykꞌoꞌne te jun chojbil te Kman Dios. 22 A jlu cxel cychyoꞌne tuj tnam jatum najl keye, ex cycyakile baꞌn tuꞌn cychyoꞌne tiꞌj, ka tzꞌil keye ex ka sak keye ic tzaꞌn in tmaꞌn ley, baꞌn t-xi cychyoꞌne ic tzaꞌn in xi chyoꞌt masat. 23 Atzunju tchcꞌel alumaj, miꞌn txi cychyoꞌne, ax cbel cykoꞌne twitz txꞌotxꞌ ic tzaꞌn aꞌ.