2 Ka at jun cyxole ma lakꞌet jun aj Hebrey tuꞌn te tmajen, kak abkꞌi cꞌajbel te; atzun tuj twukin abkꞌi cꞌelex tzokpet nok cucx. 3 Ka ma lakꞌet tjunal te, ax tjunal te cꞌelex. Ka attok t-xuꞌjil tej tlakꞌet, tucꞌix t-xuꞌjil cꞌelex tucꞌil. 4 Katzun ma txi kꞌoꞌn t-xuꞌjil tuꞌn tpatrón, ex otok tzaj tcyꞌajal ex ka tmeꞌjel tiꞌj xuꞌj lu, tetzun tpatrón aju xuꞌj lu cyucꞌix ke tal; atzunte majen tjunal te cꞌelex. 5 Katzun ma tma majen cyjaꞌ: At ncꞌujlalile tiꞌj npatrone, tiꞌj nxuꞌjile ex cyiꞌj ke ncꞌwaꞌle, mlay chin exe ka chi, 6 cxeltzun kꞌiꞌn majen tuꞌn tpatrón cywitz jwes, ex cpol tiꞌn ttzi tlamel tja ex ka tiꞌj tkan tja. Atzun cꞌelex tkꞌoꞌn toyꞌ t-ẍcyin majen tuꞌn jun tal cꞌuxbil tzꞌuꞌp twiꞌ, ex cꞌoqueltzun te tmajen te jumajx.

7 Ka at jun ma txi tcꞌaꞌyin tmeꞌjel tuꞌn toc te majen, mlay tzꞌex tzokpet ic tzaꞌn in che ex tzokpet ke majen xinak. 8 Ka mya baꞌn xuꞌj lu tuj twitz tpatrón aju otok jaw scꞌoꞌnte te, cxel tkꞌoꞌn patrón ambil tuꞌn tchjet tzokpibl te. Oc tel ticꞌun, mintiꞌ tumel tuꞌn t-xi tcꞌaꞌyin te jun stranjer xjal. 9 Ka ma txi tkꞌoꞌn te t-xuꞌjil tcyꞌajal, il tiꞌj tuꞌn tbant tiꞌj ic tzaꞌn in bant cyiꞌj ke tmeꞌjel. 10 Ka ma mojeꞌ jun xinak tucꞌil juntl xuꞌj, miꞌn tzꞌajtz tiꞌn tiꞌj twa tnejel t-xuꞌjil, mi tiꞌj t-xbalun, ex mi tiꞌj toclen tuj mejebleꞌn. 11 Katzun miꞌn ma japun keju ox jlu tuꞌn, cꞌelextzun majen xuꞌj lu nok cucx, ex miꞌn cyaj tchjoꞌn tzokpiblte.

12 Ka at jun ma tzꞌoc tbyoꞌn jun tucꞌil, ex ka ma cyim tuꞌn, ax icx te cbel byet. 13 Atzun teju mya ximantok tuꞌn tuꞌn tcub tbyoꞌn tucꞌil, nok oꞌcx ax Dios otok tzaj kꞌoꞌnte ambil te tuꞌn tcyim tucꞌil tuꞌn, cxeltzun nyecꞌune cyeye jatum cpol ok. 14 Katzun at jun tuj ewaj ma tzꞌoc tzokpaj tiꞌj tucꞌil, ex ka ma cyim tuꞌn, masque otok pon ok twitz n-altare, pero cꞌeletz cyiꞌne tuꞌn tcyim.

15 Ka at jun ma tzꞌoc byonte tman ex ka ttxuꞌ, il tiꞌj cbel byet.

16 Ax icx ka at jun ma txi elkꞌante jun xjal, ka ma txi tcꞌayin, ex ka ma tzꞌel cnet tuj tkꞌab, il tiꞌj cbel byet.

17 Ax icx ka at jun ma yasun tiꞌj tman ex ka tiꞌj ttxuꞌ, il tiꞌj cbel byet.

18 Ax icx ka ma che jaw kꞌojl xinak, ex ka ma tzaꞌw jun tuꞌn tucꞌil, ka tuꞌn abj ex ka tuꞌn tkꞌab, ex ka mintiꞌ ma cyim, nok oꞌcx otok cub twitz watbil tuꞌn taꞌw cꞌixbleꞌn, 19 ka ma banix, ex ka ma tzꞌetz betel toc tcyꞌakoꞌch, ctzokpeteltzun aju otok tzꞌoc byonte te. Oꞌcx il tiꞌj tuꞌn t-xi tchjoꞌn tkꞌij, jteꞌ kꞌij mintiꞌ otok tzꞌakꞌnan, ex cꞌoquel tkꞌanan.

20 Ka at jun ma tzꞌoc byonte tmajen tuꞌn tzeꞌ, ka xinak ex ka xuꞌj, ex ma cyim tuꞌn, cbel tcastiw. 21 Katzun itzꞌx oc tex jun kꞌij ex ka cabe, mlaytzun cub tcastiw patrón, tuꞌnju tetok.

22 Ka ma che jaw kꞌojl xinak, ex tcꞌulbacu ma tzaꞌw jun xuꞌj cyuꞌn, aju otok tzꞌoc ten tal, ex ka tuꞌn jlu ma tzꞌel tal, pero ka mintiꞌ ma cyim xuꞌj, cꞌelel tmult xjal otok tzaꞌw xuꞌj tuꞌn, ic tzaꞌn tajlal oc ttzaj tkanin chmilbaj ex ic tzaꞌn oc cymaꞌ jwes. 23 Katzun ma cꞌixbi xuꞌj, il tiꞌj cchjetel tuꞌnju xinak otok cꞌixbisante te. Ka ma cyim xuꞌj tuꞌn, ax icx te il tiꞌj tuꞌn tcyim. 24 Ka ma naj tbakꞌ twitz xuꞌj tuꞌn, ax icx te il tiꞌj tuꞌn tnaj tbakꞌ twitz; ka ma tzꞌetz twitz teꞌ xuꞌj tuꞌn, ax icx te il tiꞌj tuꞌn tnaj twitz teꞌ; ka ma naj tkꞌab xuꞌj tuꞌn, ax icx te il tiꞌj tuꞌn tnaj tkꞌab; ka ma naj tkan xuꞌj tuꞌn, ax icx te il tiꞌj tuꞌn tnaj tkan. 25 Ka ma tzꞌeꞌy xuꞌj tuꞌn xinak, ax icx te il tiꞌj tuꞌn ttzꞌeꞌy; ka ma tzꞌoc ẍil tiꞌj xuꞌj tuꞌn xinak, ax icx te il tiꞌj tuꞌn toc ẍil tiꞌj; ka ma cꞌixbi xuꞌj tuꞌn xinak, ax icx te il tiꞌj tuꞌn tcꞌixbi.

26 Ka at jun ma tzꞌoc tcꞌixbisaꞌn tbakꞌ twitz tmajen, ka xinak ex ka xuꞌj, ex ka tuꞌn jlu ma cyaj moẍix tuꞌn, cꞌelextzun ttzokpiꞌn tuꞌn tlaj otok naj tbakꞌ twitz. 27 Ka ma tzꞌetz jun twitz teꞌ tmajen tuꞌn, ka xinak ex ka xuꞌj, cꞌelextzun ttzokpiꞌn tuꞌn tlaj otok naj twitz teꞌ.

28 Ka ma jaw ẍuꞌyin jun xinak ex ka jun xuꞌj tuꞌn jun wacẍ, ex ka tuꞌn jlu ma cyim, cꞌoqueltzun xoꞌt wacẍ lu tuꞌn abj tuꞌn tcyim, ex miꞌn txi chyoꞌt tchibjal; atzunte tajwil mintiꞌ til. 29 Katzun otok tzꞌel kꞌij jawni ẍuꞌyin wacẍ ex otok tbi tajwil pero mintiꞌ otok tzꞌoc tkꞌoꞌn tcwent tiꞌj; ka ma cub tbyoꞌn wacẍ jun xinak ex jun xuꞌj, cꞌoqueltzun xoꞌt wacẍ lu tuꞌn abj tuꞌn tcyim; ax icx te tajwil cbel byet. 30 Katzun ma tzaj kanin tuꞌn tchjet twi cyimni, cxeltzun tchjoꞌn nok jteꞌ ctzajel kanin te te colpiblte, tuꞌn miꞌn tcyim. 31 Ka ma jaw ẍuꞌyin jun tal kꞌa ex ka jun tal txin tuꞌn jun wacẍ, ax ley lu cꞌajbel tiꞌj. 32 Ka ma jaw ẍuꞌyin jun majen xinak ex ka jun majen xuꞌj tuꞌn jun wacẍ, cxeltzun tchjoꞌn tajwil wacẍ 30 sak pwak te tajwil majen; atzunte wacẍ cꞌoquel xoꞌt tuꞌn abj tuꞌn tcyim.

33 Ka at jun xjal ma cyaj tcatbaꞌn jun xoch ex ka ma cuꞌx tlacuꞌn jun jul tuꞌn tjatz aꞌ tuj, ka mintiꞌ ma cyaj tmaksiꞌn ttziꞌ, ex ka ma cuꞌx tzꞌak jun wacẍ tuj ex ka jun chej, 34 cxeltzun tchjoꞌn tajwil jul aju twi alumaj, ex aju alumaj otok cyim cꞌoquel te te.

35 Ka ma jaw ẍuꞌyin twacẍ jun tuꞌn twacẍ juntl, ex ka tuꞌn jlu ma cyim wacẍ, cxeltzun cꞌayit aju wacẍ itzꞌx, cbel cyiꞌn tmij pwak otok tzꞌoctz twiꞌ, ex cbel cyiꞌn tmij aju wacẍ otok cyim. 36 Katzun otok tzꞌel kꞌij jawnix ẍuꞌyin wacẍ tiꞌj tucꞌil ex otok tbi tajwil pero mintiꞌ otok tzꞌoc tkꞌoꞌn tcwent tiꞌj, cxeltzun tkꞌoꞌn twacẍ te t-xel wacẍ, ex aju wacẍ otok cyim cꞌoquel te te.