2 Akine Cymane ex Cydiose aju etz kꞌinte cyeye tuj txꞌotxꞌ Ejipt jatum ateꞌtoke te majen.

3 Miꞌn che cꞌulune cywitz junxitl dios, oꞌcx nwitze tuꞌn cycꞌulune.

4 Miꞌn cub cybinchaꞌne jun tilbilal; mi jun tilbilal tiꞌj ju at twitz cyaꞌj, mi jun tilbilal tiꞌj ju at twitz txꞌotxꞌ ex mi jun tilbilal tiꞌj ju at tuj mar. 5 Miꞌn che cub ẍmejeꞌye cywitz ex miꞌn che cꞌulune cywitz, porque akine Cymane ex Cydiose, ex mintiꞌ in cub tuj nwitze tuꞌn cycꞌulune twitz juntl dios. Cpol canun castiw wuꞌne cyibaj ke cꞌwaꞌlbaj, ke tal chmambaj ex ke cyxca chmambaj tuꞌn tlaj in chin el icꞌune cyuꞌn cyman, 6 pero cucx ctel tkꞌakꞌbil ncꞌuꞌje cyiꞌj nimcu cyiyjil xjal, akeju in che cꞌujlan weye ex in che japun ke nmandamyente cyuꞌn.

7 Miꞌn tzaj cynaꞌne nbiye nokx gan, akine Cymane ex Cydiose, porque cbel tcastiw xjal wuꞌne, aju in tzaj naꞌnte nbiye nokx gan.

8 Cynaꞌntze aju kꞌij te ojlabl tuꞌn tajben oꞌcx te weye. 9 Kak kꞌij che akꞌnale, ex cbantel tcyakil cyakꞌune, 10 atzunju twukin kꞌij, kꞌij te ojlabl tuꞌn cycꞌulune weye, akine Cymane ex Cydiose. Mi jun akꞌuntl cbantel cyuꞌne tuj kꞌij lu. Mi jun cycyꞌajale ex mi jun cymeꞌjele cꞌakꞌnal tuj kꞌij lu, mi jun cymajene xinak, mi jun cymajene xuꞌj, mi jun cyalune ex mi jun stranjer xjal at tuj cytanmiye. 11 Porque tuj kak kꞌij bant cyaꞌj wuꞌne, tucꞌix txꞌotxꞌ ex tcyakilju at cywitz, tucꞌix mar ex tcyakilju at tuj, ex in ojlane tuj twukin kꞌij, akine Cymane. Tuꞌntzun jlu cub ncyꞌiwlaꞌne kꞌij lu te ojlabl, ex el npaꞌne tuꞌn toc te xjan.

12 Cynimanxe cymane ex cytxuꞌye tuꞌntzun t-xi lakꞌeꞌ tuj cykꞌije twitz txꞌotxꞌ aju cxel nkꞌoꞌne cyeye, akine Cymane ex Cydiose.

13 Miꞌn che biyune.

14 Miꞌn cybinchaye aj pajil.

15 Miꞌn che elkꞌane.

16 Miꞌn che nicꞌane yol cyiꞌj cyucꞌile.

17 Miꞌn pon cycꞌuꞌje tiꞌj tja cyucꞌile; miꞌn pon cycꞌuꞌje tiꞌj t-xuꞌjil cyucꞌile, mi tiꞌj tmajen xinak, mi tiꞌj tmajen xuꞌj, mi tiꞌj twacẍ, mi tiꞌj tbur, ex mi tiꞌj jun tiꞌxti at te.

18 O cyil cycyakil aj Israel aju tkan kꞌancyok, o cybi tkꞌajkꞌajel chun ex o cyil aju witz in bukintok tuꞌn sib, ex tuꞌn jlu e tzaj luꞌlun tuꞌn cyxobil, ex najchak e tzaj ten. 19 Xitzun cymaꞌn te Moisés cyjaꞌ:

—Aya yolin kucꞌile, ex jacu cub kbiꞌne. Miꞌn yolintl Dios kucꞌile tuꞌntzun miꞌn kcyime, che chi.

20 Xitzun tmaꞌn Moisés cye cyjaꞌ:

—Miꞌn che xobe. Ma cubil Dios nok tuꞌn cyoque tuj malbil tuꞌn, tuꞌntzun tten t-xobil tuj cywitze, ex tuꞌn miꞌn cybinchane il, chi Moisés.

21 Najchak e tzaj ten xjal; atzunte Moisés xi lakꞌeꞌ mastl jatum taꞌ Dios tuj kꞌek muj.

22 Tzajtzun tmaꞌn Kman te Moisés, kꞌmanxa cye aj Israel cyjaꞌ:

—Ma cyile ma chin tzaj yoline cyucꞌile max tuj cyaꞌj. 23 Miꞌn cub cybinchaꞌne ke tilbilal tuꞌn toc cydiosine, mi tiꞌj ttxꞌotxꞌil sak pwak, mi tiꞌj ttxꞌotxꞌil kꞌan pwak, oꞌcx nwitze tuꞌn cycꞌulune. 24 Cybinchan jawe jun byuj txꞌotxꞌ te jun altar te weye, ex atzun che bel cybyoꞌne cyẍneꞌle ex cywacẍe te chojbil patun in cub te weye, ex ka te oyaj te mojbabl tibil. Nok jatumchak waje tuꞌn ttzaj naꞌn nbiye, chin ule cyucꞌile ex che bel ncyꞌiwlaꞌne. 25 Katzun abj altar ma jaw cybinchaꞌne te weye, miꞌn baj cyxpeꞌline cyiꞌj abj, porque ka ma baj cyxpeꞌline cyiꞌj tuꞌn cꞌuxbil, mlay tzꞌajben te altar. 26 Ex miꞌn cybinchaye jun altar maꞌ twaꞌl, tuꞌntzun mi toc grad tiꞌj n-altare tuꞌntzun miꞌn cykꞌanchaꞌlin ke cycuxe tibaj oc cyjax bete.