—Akeye aj Israel, cybintze ke ley ex ke cawbil akeju che xeꞌl nmaꞌne cyeye jaꞌlo, cyajx tuj cynable ex che japunx cyuꞌne.

2 O cyaj bant tiꞌj jun yol tuꞌn Kman Dios kucꞌil max twi witz Horeb. 3 Mya oꞌcx cyucꞌil ke kxeꞌchel cyaj bant tiꞌj ju yol lu, ax icx kucꞌil o bant, akoꞌ itzꞌx jaꞌlo tzalu. 4 Twitzelcu Kman tzaj yolin cyucꞌile tuj jun tkan kꞌakꞌ twi witz. 5 Atzun weye in cub tene cyxole tucꞌil Kman, tuꞌntzun ttzaj nchicꞌbaꞌne tyol Kman cyeye, porque tzaj t-xobil tkan kꞌakꞌ cyiꞌje, ex mintiꞌ e jaxe twi witz. Tzajtzun tmaꞌn Kman cyjaꞌ:

6 Akine Cymane ex Cydiose aju etz kꞌinte cyeye tuj Ejipt, jatum ateꞌtoke te majen.

7 Miꞌn che cꞌulune cywitz junxitl dios, oꞌcx nwitze tuꞌn cycꞌulune.

8 Miꞌn cub cybinchaꞌne jun tilbilal; mi jun tilbilal tiꞌj ju at tuj cyaꞌj, mi jun tilbilal tiꞌj ju at twitz txꞌotxꞌ, ex mi jun tilbilal tiꞌj ju at tuj mar. 9 Miꞌn che cub ẍmejeꞌye cywitz, ex miꞌn che cꞌulune cywitz, tuꞌnju akine Cymane ex Cydiose mintiꞌ in cub tuj nwitze tuꞌn cycꞌulune twitz juntl dios. Cpol canun castiw wuꞌne cyibaj ke cꞌwaꞌlbaj, ke tal chmambaj ex ke cytxca chmambaj, tuꞌn tlaj in chin el icꞌune cyuꞌn cyman, 10 pero cucx ctel tkꞌakꞌbil ncꞌuꞌje cyiꞌj nimcu cyiyjil xjal, akeju in che cꞌujlan weye ex in che japun ke nmandamyente cyuꞌn.

11 Miꞌn tzaj cynaꞌne nbiye nokx gan, akine Cymane ex Cydiose, porque cbel tcastiw xjal wuꞌne aju in tzaj naꞌnte nbiye nokx gan.

12 Cynaꞌntze aju kꞌij te ojlabl tuꞌn tajben oꞌcx weye, ic tzaꞌnx o txi nmaꞌne cyeye, akine Cymane ex Cydiose. 13 Kak kꞌij che akꞌnale tuꞌntzun tbant tcyakil cyakꞌune, 14 atzunju twukin kꞌij, kꞌij te ojlabl tuꞌn cycꞌulune weye, akine Cymane ex Cydiose. Mi jun akꞌuntl cbantel cyuꞌne tuj kꞌij lu, mi cyuꞌn cycyꞌajale, mi cyuꞌn cymeꞌjele, mi cyuꞌn cymajene xinak, mi cyuꞌn cymajene xuꞌj, mi cyuꞌn cywacẍe, mi cyuꞌn cyburre, mi cyuꞌn ke cyalune, ex mi cyuꞌn ke stranjer xjal ateꞌ tuj cytanmiye, tuꞌntzun cyojlan ke cymajene xinak ex cymajene xuꞌj ic tzaꞌnx cyeye in che ojlane. 15 Cynaꞌntze, ax icx cyeye o che tene te majen tuj Ejipt, ex etz wiꞌne keye ma chixin tucꞌil nim wipumale. Tuꞌntzun jlu in xi nmaꞌne cyeye tuꞌn cynimane aju kꞌij te ojlabl, akine Cymane ex Cydiose.

16 Cynimanxe cymane ex cytxuꞌye ic tzaꞌnx o txi nmaꞌne cyeye, tuꞌntzun t-xi lakꞌeꞌ tuj cykꞌije, ex tuꞌntzun baꞌn cyel cykꞌije twitz txꞌotxꞌ aju cxel nkꞌoꞌne cyeye, akine Cymane ex Cydiose.

17 Miꞌn che biyune.

18 Miꞌn cybinchaye aj pajil.

19 Miꞌn che elkꞌane.

20 Miꞌn che nicꞌane yol tiꞌj cyucꞌile.

21 Miꞌn pon cycꞌuꞌje tiꞌj t-xuꞌjil cyucꞌile. Miꞌn pon cycꞌuꞌje tiꞌj tja cyucꞌile, mi tiꞌj ttxꞌotxꞌ, mi tiꞌj tmajen xinak, mi tiꞌj tmajen xuꞌj, mi tiꞌj twacẍ, mi tiꞌj tbur, ex mi tiꞌj jun tiꞌxti at te.

22 Atzun ke yol lu e tzaj tmaꞌn Kman tucꞌil tkꞌajkꞌajel twiꞌ cyuwxix wen, aju etz tuj tmij tkan kꞌakꞌ ex tuj muj kloljxix wen, tej cybuyintok cyibe cycyakile t-xe witz, ex mintiꞌtl tzaj tmaꞌn mastl yol. E cubtzun ttzꞌiban ke yol lu cywitz cabe tzꞌlom abj, ex e tzajtzun tkꞌoꞌn weye. 23 Atzun cyeye, tej cybinteye tkꞌajkꞌajel wibaj aju etz tuj tmij klolj, ex tej tcyile in jaw cꞌant tkan kꞌakꞌ tiꞌj witz, cycyakiltzun ke nejenel cye junjun cꞌloj cyiyjile cyucꞌix ke tij xjal cyxole e ul yolil wucꞌile, 24 ex tzaj cymaꞌne weye cyjaꞌ: Axix toc ma tzaj tyecꞌun Kman Dios tajwalil ex tipumal, ex ma kbiye tkꞌajkꞌajel twiꞌ nneꞌtz tuj tmij tkan kꞌakꞌ. Matzun tzꞌel knicꞌe tiꞌj jaꞌlo, jacu yolin Kman cyucꞌil xjal ex mlay che cyim. 25 Masque icju pero o cymatle: ¿Tikuꞌn ko cymele ex ko bajel tzꞌeꞌye tuꞌn kꞌakꞌ lu xobajilxix? Ka ma kbiye juntl maj tkꞌajkꞌajel twi Kman Dios, oclo ko cymele; 26 porque ¿alcye juntl xjal jacu cyaj ankꞌin oc tbinte tkꞌajkꞌajel twi Dios itzꞌ in yolin tuj tmij tkan kꞌakꞌ, ic tzaꞌn keye ma kbiye ex ma ko cyaj ankꞌine? 27 Mas baꞌn txi lakꞌeꞌ teya, bintza tcyakilju ctzajel kꞌmaꞌn teya tuꞌn Kman Dios, ex ctzajeltzun tmaꞌna keye aju otok tzaj kꞌmaꞌn teya, atzun keye jacu japun kuꞌne aju ctzajel tmaꞌna keye, che chiye.

28 Tej cyyoline wucꞌile, in bintok Kman tiꞌj cyyole. Tmatzun Kman weye cyjaꞌ: Ma nbiye tcyakil yol in cymaꞌn xjal lu, ex baꞌn ma tzꞌel tuj nwitze. 29 Nokwit ic cyximbetz tcyakil maj, ic tzaꞌnx ma cyma tuꞌn cyxob nwitze ex tuꞌn cyjapun ke nmandamyente cyuꞌn cycyakil kꞌij, tuꞌntzun cyankꞌin tuj tzalajbil, tzaꞌnx cye ax icx cye cycꞌwaꞌl. 30 Txiꞌya ex kꞌmanxa cye tuꞌn cyaj cyja; 31 atzun teya, ax tencja tzalu wucꞌile, porque cxel nmaꞌne teya cycyakil ke mandamyent, ke ley ex ke cawbil, akeju che xeꞌl t-xnakꞌtzaꞌna cye, tuꞌntzun cyjapun cyuꞌn oc cynajan tuj txꞌotxꞌ cxel nkꞌoꞌne te cyetzbil, chi Kman. 32 Cyjaꞌtzun, japunx cyuꞌne tcyakilju o tzaj tmaꞌn Kman Dios, ex miꞌn tzꞌel cypaꞌn cyibe tiꞌj. 33 Che bettzune tuj be o tzaj yecꞌun cyeye tuꞌn Kman Dios, tuꞌntzun cyankꞌine ex tuꞌn tel baꞌn cyeye, ex tuꞌn cyankꞌine nim abkꞌi twitz txꞌotxꞌ aju ctzajel tkꞌoꞌn te cyetzbile.