Aju mandamyent maꞌxix toclen
6
Atzun ke mandamyent lu, cyucꞌix ke ley ex ke cawbil o che tzaj tmaꞌn Kman Dios tuꞌn cyxi nxnakꞌtzaꞌne cyeye, ex tuꞌn cyjapun cyuꞌne oc cypone tuj txꞌotxꞌ cꞌoquel te cyetzbile, 2 tuꞌntzun tten tchiylal Kman Dios tuj cywitze, ex tuꞌn cyjapun ke tley ex ke tmandamyent cyuꞌne, akeju ma cheꞌx nmaꞌne cyeye, cyucꞌix ke cycꞌwaꞌle ex ke tal cychmane tuj tcyakil kꞌij te cyankꞌible, tuꞌntzun cytene nim kꞌij twitz txꞌotxꞌ. 3 Cyjaꞌtzun akeye aj Israel, cybinxe ex tzꞌoc tililx tuꞌn cyjapun ke jlu cyuꞌne, tuꞌntzun tel baꞌn cyeye tuj tcyakil, ex tuꞌn cychmet-xixe tuj kꞌinun txꞌotxꞌ ex tbanilxix, ic tzaꞌnx tzaj ttziyan Kman aju Cydios cyxeꞌchele.4 Cybintze akeye aj Israel: Ate Kman Dios oꞌcxcu junx.
5 Cycꞌujlame Kman Dios tuꞌn tcyakil cyanmiye, tuꞌn tcyakil cycꞌuꞌje ex tuꞌn tcyakil cyipune.
6 Cyawancxe tuj cyanmiye cycyakil ke yol ma cheꞌx nmaꞌne cyeye jaꞌlo, 7 cucx cymanxe cye cycꞌwaꞌle, ex che yoline cyiꞌj tuj cyjaye ex tuj cybeye, ax icx oc cyxiꞌye tal ex oc cyjaw weꞌye; 8 cycꞌalonque tiꞌj cykꞌabe ex tibaj cywitze te jun techal, 9 ax icx cytzꞌibancuye cyiꞌj tlamel cyjaye ex cyiꞌj tmarquil.
Xi tcyuwsaꞌn Moisés cye aj Israel tuꞌn t-xi cyniman tley Dios
10 Oc cyocx kꞌoꞌne tuꞌn Kman tuj txꞌotxꞌ tzaj ttziyan cye kxeꞌchel Abraham, Isaac ex Jacob, jatum ateꞌ nintz tnam tbanilxix mya cyuꞌne jaw cybinchaꞌne; 11 ateꞌ ja tuj, nojni cyuj cyuꞌn tiꞌxti tbanilxix mya cyuꞌne e noj; ateꞌ xoch tuj, mya cyuꞌne cuꞌx cylacuꞌne; ex ateꞌ tkan uva tucꞌix tkan olivo tuj, mya cyuꞌne cuꞌx cyawaꞌne; ex oc cywaꞌne tiꞌj ex oc cynoje, 12 ten cycwent cyiꞌje tuꞌn miꞌn ticꞌ tnaꞌl Kman cyuꞌne, aju etz kꞌinte cyeye tuj txꞌotxꞌ Ejipt jatum ateꞌtoke te majen. 13 Tenx tchiylal Kman Dios tuj cywitze, ex oꞌcx te che ajbene, ex oꞌcx tbi ctzajel cynaꞌne tiꞌj cyyole. 14 Miꞌn che cꞌulune cywitz cydios mastl tnam ateꞌ nikayin cytxlaje, 15 porque aju Kman Dios at kxol, mintiꞌ in cub tuj twitz tuꞌn cycꞌulune twitz juntl dios; jacu tzaj tkꞌoj cyiꞌje, ex biꞌx che najele tuꞌn.
16 Miꞌn tzꞌoc cykꞌoꞌne Kman Dios tuj malbil ic tzaꞌn o cybinchaye tuj Masah. 17 Tzꞌoc tililx cyuꞌne tuꞌn cyjapun ke tmandamyent Kman Dios, cyucꞌix ke ley ex ke xnakꞌtzbil o che tzaj tkꞌoꞌn cyeye. 18 Cybinchame aju tzꞌaklxix ex aju baꞌn twitz Kman, tuꞌntzun tel baꞌn cyeye tuj tcyakil, tuꞌn cyoque tajwil tbanil txꞌotxꞌ tzaj ttziyan Kman cye kxeꞌchel, 19 ex tuꞌn cyex tlajoꞌn Kman ke aj kꞌoj cyiꞌje, ic tzaꞌn o tzaj ttziyan.
20 Nok alcye jun kꞌij ka ma tzaj cykanin cycꞌwaꞌle: ¿Ti cyxilen ke mandamyent, ke ley ex ke cawbil e tzaj tmaꞌn Kman Dios tuꞌn kbinchante?, ka che chi, 21 atzun cyeye cxel cytzakꞌweꞌne: Ojtxi, tmajentok Faraón koꞌye tuj Ejipt, ex o ko etz kꞌiꞌne tuꞌn Kman tucꞌil nimxix tipumal. 22 O kile ke señ ex ke binchben nim cyipumal ex xobajilxix o tbincha Kman tuj Ejipt, tiꞌj Faraón ex cyiꞌj cycyakil keju ateꞌ tuj tja; 23 ex ate etz kꞌinte keye tuj txꞌotxꞌ Ejipt, ex o ko ul kꞌiꞌne tuꞌn tuj txꞌotxꞌ lu, aju tzaj ttziyan cye kxeꞌchel ex tzaj tkꞌoꞌn ke. 24 O tzaj tmaꞌn Kman tuꞌn cyjapun cycyakil ke mandamyent lu kuꞌn ex tuꞌn tten tchiylal tuj kwitz, tuꞌntzun tel baꞌn te ke cycyakil kꞌij ex tuꞌn cucx kankꞌin, ic tzaꞌn kten jaꞌlo. 25 Cyjaꞌtzun ko tel tzꞌaklxix twitz Kman Dios ka ma che japun cycyakil ke tmandamyent kuꞌn, ic tzaꞌnx o tzaj tmaꞌn ke.