Xi tmaꞌn Moisés cye aj Israel tuꞌn t-xi cyniman tley Dios
4
Atzun jaꞌlo akeye aj Israel, cybintze ke ley ex ke mandamyent, akeju in cheꞌx nxnakꞌtzaꞌne cyeye, ex che japunxwit cyuꞌne, tuꞌntzun cyankꞌine ex tuꞌn cyoque tajwil txꞌotxꞌ ctzajel tkꞌoꞌn Kman cyeye, aju Cydios kxeꞌchel. 2 Miꞌn tzꞌoc cykꞌoꞌne mastl yol tiꞌj yol in xi nmaꞌne cyeye, ex miꞌn tzꞌel cyiꞌne jun yol tiꞌj; oꞌcx tuꞌn t-xi cynimane ke tmandamyent Kman Dios, akeju in cheꞌx nmaꞌne cyeye. 3 Ax keye e queꞌyinte aju tbincha Kman tuj Baal-peor, ex o cyile tej cycyim ke xjal tuꞌn, akeju e cꞌulun twitz tilbilal cydios xjal Baal-peor tbi, cyxolxe e cyim ke xjal lu; 4 atzun cyeye, akeye cucx e oc lpeꞌye tiꞌj Kman Dios, itzꞌx keye jaꞌlo. 5 O cheꞌx nxnakꞌtzaꞌne ke ley ex ke mandamyent cyeye, ic tzaꞌn tzaj tmaꞌn Kman Dios weye, tuꞌntzun tjapun cyuꞌne oc cynajane tuj txꞌotxꞌ jatum che pole tuꞌn cyoque tajwil. 6 Cucx cynaꞌntze ex japunx cyuꞌne. Ka ma bant cyuꞌne icju, atzun cꞌelel cynicꞌ mastl nasyon cyiꞌje ka at cynable ex cyojtzkible. Octzun cybinte mastl nasyon aju cyleye, oc cymaꞌ cyjaꞌ: Ke xjal ateꞌ tuj nintz nasyon lu, ax toc at nim cynabl ex cyojtzkibl, che chilo. 7 ¿Atpe juntl nintz nasyon nikayin ateꞌ ke tdios tiꞌj ic tzaꞌn ke, nikayin taꞌ Kman Dios kiꞌj oc txi kkanin jun tiꞌxti te? 8 ¿Atpe juntl nintz nasyon at ke ley ex ke mandamyent tzꞌaklxix tucꞌil, ic tzaꞌn tcyakilju in xi nmaꞌne cyeye jaꞌlo? 9 Tuꞌntzun jlu, cykꞌonque cwent tiꞌj ju o cyile, miꞌn tzicꞌ tnaꞌl cyuꞌne ex miꞌn naj tiꞌj cycꞌuꞌje tuj tcyakil cyankꞌible; nok oꞌcx tuꞌn tcyaj cymaꞌne cye cycꞌwaꞌle ex cye tal cychmane.Tej tyolin Dios cyucꞌil aj Israel twi witz Horeb
10 Aju kꞌij tej cytene twitz Kman Dios t-xe witz Horeb, tzaj tmaꞌn Kman weye cyjaꞌ: Chmon baja ke xjal tuꞌntzun cybinte nyole, ex tuꞌn tel cynicꞌ tiꞌj tzaꞌn tten tuꞌn tten nchiylale cye tuj tcyakil kꞌij oc cyten twitz txꞌotxꞌ, ex tuꞌn t-xi cyxnakꞌtzaꞌn tcyakil jlu cye cycꞌwaꞌl. 11 Atzun cyeye e pon lakꞌeꞌye nikayin t-xe witz. Aju witz in julin kꞌakꞌ tiꞌj ex najchak in japun julin tkan twitz cyaꞌj; aju t-sibel oc ic tzaꞌn muj kꞌekxix queꞌyin ex puro klolj; 12 atzunte Kman tzaj yolin cyucꞌile tuj tkan kꞌakꞌ ex o cybiye tkꞌajkꞌajel twiꞌ, pero mi jun o cyile; oꞌcx tkꞌajkꞌajel twiꞌ o cybiye. 13 Tzajtzun tmaꞌn Kman aju yol tuꞌn tbant tiꞌj cyucꞌile, ex atzun jlu ke laj mandamyent e cub ttzꞌiban cywitz cabe tzꞌlom abj, ex tzaj tmaꞌn cyeye tuꞌn tjapun cyuꞌne. 14 Ax icx tzaj tmaꞌn Kman weye tuꞌn t-xi nkꞌoꞌne xnakꞌtzbil cyeye cyiꞌj ke ley ex ke mandamyent il tiꞌj tuꞌn cyjapun cyuꞌne oc cynajane tuj txꞌotxꞌ cꞌoquel te cyetzbile.
Xi tmaꞌn Moisés cye aj Israel tuꞌn miꞌn cycꞌulun cywitz tilbilal
15 Tuj kꞌij tej tyolin Kman cyucꞌile tuj tkan kꞌakꞌ twi witz Horeb, mi jun o cyile. Cyjaꞌtzun ten cycwente cyiꞌje 16 tuꞌn miꞌn cycub tzꞌake tuj il, ex miꞌn cub cybinchaꞌne jun tilbilal xinak, mi tilbilal xuꞌj, 17 mi cyilbilal ke txcup ateꞌ twitz txꞌotxꞌ, mi cyilbilal ke chyuꞌj in che lipan twitz cyaꞌj, 18 mi cyilbilal ke txcup in xi cyjakuꞌn cycꞌuꞌj twitz txꞌotxꞌ, ex mi cyilbilal ke cyiẍ ateꞌ tuj aꞌ. 19 Oc t-xi cyqueꞌyine kꞌij twitz cyaꞌj, tucꞌix xjaw, cyucꞌix ke cheꞌw ex ke mastl at twitz cyaꞌj, ten cycwente cyiꞌje tuꞌn miꞌn tpon cycꞌuꞌje tiꞌj tuꞌn cycꞌulune cywitz, porque cycyakil keju ateꞌ twitz cyaꞌj, tuꞌn Kman Dios e bant tuꞌn cyajben cye cycyakil xjal ateꞌ twitz txꞌotxꞌ. 20 Pero a Kman etz kꞌinte cyeye tuj txꞌotxꞌ Ejipt, jatum e tene mer ic tzaꞌn tuj jun jorni jatum nnoꞌcx kꞌot cꞌuxbil tuꞌn tcub ulj, tuꞌntzun cyoque te jun tnam etzan tuꞌn, ic tzaꞌn cytene jaꞌlo. 21 Masque icju pero o tzaj tkꞌoj Kman wiꞌje tuꞌn cyeye cylaj, ex o tma weye tuꞌn miꞌn wicꞌxe tuj nima Jordán, ex tuꞌn miꞌn wocxe tuj tbanil txꞌotxꞌ ctzajel tkꞌoꞌn cyeye te cyetzbile. 22 Tuꞌntzun jlu ax chin cymele tuj txꞌotxꞌ lu, ex mlay chin icꞌxe tuj nima Jordán. Bay cyeye oc che icꞌexe tuj, ex che oquele tajwil tbanil txꞌotxꞌ. 23 Ten cycwente cyiꞌje, miꞌn tzicꞌ tnaꞌl cyuꞌne aju yol cyaj bant tiꞌj tuꞌn Kman cyucꞌile, ex miꞌn cub cybinchaꞌne jun tilbilal aju tzaj kꞌmaꞌn cyeye tuꞌn Kman Dios tuꞌn miꞌn tcub cybinchaꞌne. 24 Porque toc tcwent Kman Dios cyiꞌje ex ic tten ic tzaꞌn jun kꞌakꞌ in baj tzꞌeꞌy tcyakil tuꞌn.
25 Oc cyul itzꞌj cycꞌwaꞌle ex ke tal cychmane oc cytijine tuj txꞌotxꞌ jatum che pole, ka ma tzꞌel cypaꞌn cyibe tiꞌj Dios, ex ka ma cub cybinchaꞌne tilbilal jun tiꞌxti tuꞌn cycꞌulune twitz, ex ka ma cybinchaye mya baꞌn twitz Kman Dios tuꞌn ttzaj tkꞌoj, 26 jurattzun che najele tuj txꞌotxꞌ cꞌoquel te cyetzbile jlajxi nima Jordán, mlay che ankꞌine nim tyemp tuj txꞌotxꞌ lu, biꞌx che najele te jumajx; in che oc nkꞌoꞌne cyaꞌj tucꞌix txꞌotxꞌ te testiw tiꞌj jlu. 27 Che bajel sipane tuꞌn Kman cyxol mastl nasyon, ex nicꞌxi cybaje ctel cyxol mastl xjal jatum che pol kꞌiꞌne tuꞌn. 28 Atzun che ajbele cye dios binchamaj cyuꞌn xjal, tzeꞌ cytxꞌotxꞌil ex abj cytxꞌotxꞌil, ake jlu miban che queꞌyin, miban che bin, miban che waꞌn ex mintiꞌ in cynaꞌn t-xewil jun tiꞌxti. 29 Pero cyponlenxiye ma chixin, ka ma che jyone tiꞌj Kman Dios tuꞌn tcyakil cyanmiye ex tuꞌn tcyakil cycꞌuꞌje, cneteltzun cyuꞌne. 30 Oc ttzaj tcyakil cꞌixcꞌoj ex yajbil lu cyiꞌje, che ajetz meltzꞌaje tucꞌil Kman Dios, ex cxel cynimane tyol, 31 mlay che cyaj coline tuꞌn, mlay che naje tuꞌn, mlay tzicꞌ tnaꞌl tuꞌn aju yol cyaj bant tiꞌj tuꞌn cyucꞌil ke kxeꞌchel, porque nim tkꞌakꞌbil tcꞌuꞌj Kman cyiꞌje.
32 Cykaninxe ti o baj ojtxi tej naꞌnxtok cyitzꞌje ex atxix tej tcub tbinchaꞌn Dios aju nej xjal twitz txꞌotxꞌ; cyxiꞌye tuj tcyakil twitz txꞌotxꞌ ex cykaninxe ka at jun tiꞌxti o baj ex o binjtz maꞌxix t-xilen ic tzaꞌn jlu. 33 ¿Atpe juntl cꞌloj xjal o cybi tkꞌajkꞌajel twi Dios tzaj yolin tuj tmij tkan kꞌakꞌ, ex mintiꞌ o che naj ic tzaꞌn cyeye o cybiye ex mintiꞌ e naje? 34 ¿Atpe juntl dios o tzꞌetz kꞌinte jun nasyon tjakꞌ tcawbil juntl nasyon tuꞌn tel tetzan, ic tzaꞌn o tbincha Kman Dios kiꞌj tej ketz tuj txꞌotxꞌ Ejipt? Tzaj nim joybil cyiꞌj aj Ejipt, tbincha Dios ke señ cyucꞌix ke binchben nim cyipumal, o kꞌojin cyiꞌj aj Ejipt, tzaj tyecꞌun nim tipumal, xobajilxix keju o tbincha; tcyakil jlu cywitze o bant. 35 Atzun jlu o tzaj yecꞌun cyeye, tuꞌntzun tel cynicꞌe tiꞌj ka ate Kman axix toc Dioste, ex mintiꞌ juntl, nok oꞌcx te. 36 Max tuj cyaꞌj tzaj yolin Kman cyucꞌile tuꞌn cycawinjtze tuꞌn, tzaj tyecꞌun jun nintz kꞌakꞌ cyeye twitz txꞌotxꞌ, ex o cybiye tkꞌajkꞌajel twiꞌ tuj tmij tkan kꞌakꞌ. 37 Nok tuꞌnju o tcꞌujla Dios ke kxeꞌchel, jaw t-scꞌoꞌn ke cyiyjil, akeju e ul itzꞌj te tibajxi, ex tuꞌn nim tipumal e jetz tcolpiꞌn tuj txꞌotxꞌ Ejipt. 38 Cywitzxe o che ex lajoꞌn ke nasyon mas nim cyajlal ic tzaꞌn cyeye ex mas nim cyipun ic tzaꞌn cyeye, tuꞌntzun cyoque te tajwil cytxꞌotxꞌ ex tuꞌn cynajane tuj, ic tzaꞌn in baj jaꞌlo.
39 Cyjaꞌtzun tzꞌelx cynicꞌe tiꞌj ex cycꞌuꞌnxe tuj cyanmiye ka ate Kman, atzun Diosju aju at tuj cyaꞌj ex twitz txꞌotxꞌ; mintiꞌ juntl, nok oꞌcx te. 40 Che japunx ke tley ex ke tmandamyent cyuꞌne, akeju ma cheꞌx nmaꞌne cyeye jaꞌlo, tuꞌntzun tel baꞌn te cyeye ex cye cycꞌwaꞌle che ul itzꞌj te tibajxi, ex tuꞌn cytene nim abkꞌi tuj txꞌotxꞌ ctzajel tkꞌoꞌn Kman Dios cyeye te jumajx.
Ke tnam te cycolbil cyib xjal ateꞌ tuj tumlal tjawitz kꞌij te nima Jordán
41 Jawtzun t-scꞌoꞌn Moisés ox tnam tuj tumlal tjawitz kꞌij te nima Jordán, 42 tuꞌntzun t-xi ok byol xjal tuj, aju otok cub byonte jun tucꞌil ka mya ximamaj tuꞌn, ex ka bajx che jaw kꞌojl jun maj, tuꞌntzun tpon tclon tib tuj jun cye tnam lu, tuꞌntzun tclet. 43 Atzun ke tnam lu: Aju tnam Beser, aju tcubsaꞌn tuj chkꞌajlaj te tzkij txꞌotxꞌ, tuꞌn tajben cye tiyjil Rubén; aju tnam Ramot, aju tcubsaꞌn tuj Galaad, tuꞌn tajben cye tiyjil Gad, ex aju tnam Golán, aju tcubsaꞌn tuj Basán, tuꞌn tajben cye mij tiyjil Manasés.
Tzuybil te yol cyiꞌj ke laj mandamyent
44 Atzun ke ley lu xi tkꞌoꞌn Moisés cye aj Israel, 45 cyucꞌix ke mandamyent, ke xnakꞌtzbil ex ke cawbil, akeju xi tmaꞌn Moisés cye aj Israel tej cyetz tuj Ejipt, 46 tej ateꞌtok tuj tjawitz kꞌij te nima Jordán, tuj chkꞌajlaj tcubsaꞌn twitz Bet-peor tuj ttxꞌotxꞌ Sehón aju rey cye aj Amorrey. Atzun najltok Sehón tuj tnam Hesbón, ex cub tiꞌj tuꞌn Moisés ex cyuꞌn aj Israel tej cyetz tuj Ejipt. 47 Atzun cye aj Israel e joꞌc te tajwil ttxꞌotxꞌ, tucꞌix ttxꞌotxꞌ Og aju rey te Basán. Ke cabe rey lu cyrey ke aj Amorrey ke, ex atzun najltok ke tuj tumlal tjawitz kꞌij te nima Jordán. 48 Xiꞌynix cytxꞌotxꞌ tuj Aroer ttzi tkꞌab xak Arnón, ex ponin baj max twi witz Sirión aju ax juntl tbi Hermón, 49 ex tuj tcyakil txꞌotxꞌ Arabá tuj tumlal tjawitz kꞌij te nima Jordán, ex ponin baj max ttzi mar at tuj chkꞌajlaj Arabá t-xe witz Pisga.