4 —O cyile aju o bant wuꞌne cyiꞌj aj Ejipt ex tzaꞌn tten ma che ul wiꞌne wucꞌile tzalu, mer ic tzaꞌn cyibaj t-xicꞌ tꞌiw. 5 Jaꞌlotzun, ka ma chinx cynimane tuj tcyakil, ex ka ma japun cyuꞌne aju yol cyaj bant tiꞌj wuꞌne cyucꞌile, che oqueltzune te jun cꞌloj xjal etzan wuꞌne cyxol cycyakil nasyon, porque weye tcyakil twitz txꞌotxꞌ. 6 Che oquel nkꞌoꞌne te pal tuj ncawbile, ex che oquele te jun cꞌloj xjal paꞌmaj te weye. Atzun yol lu cxel tmaꞌna cye aj Israel, chi Dios. 7 Cubiltzun Moisés, e tzaj ttxcoꞌn ke tij xjal cyxol aj Israel, ex xi ttxꞌolbaꞌn cye tcyakil yol otok tzaj tmaꞌn Kman te. 8 Xitzun cytzakꞌweꞌn cycyakil xjal junx:

—Tcyakilju ma tma Kman cbantel kuꞌne, che chi.

Xi tmaꞌn Moisés tcyakil cyyol xjal te Kman. 9 Tzajtzun tmaꞌn Kman te Moisés:

—Chin pole tucꞌila tuj jun piẍ kꞌek muj, tuꞌntzun cybinte xjal oc nyoline tucꞌila ex tuꞌn t-xi nimana cyuꞌn te jumajx.

Xi tmaꞌntl Moisés cyyol xjal te Kman, 10 ex tzaj tmaꞌntl Kman te cyjaꞌ:

—Tcuꞌxa cyucꞌil xjal ex kꞌmanxa cye tuꞌn tbaj cyxjansan cyib jaꞌlo ex nchiꞌj, ex tuꞌn tjatz cytxꞌjoꞌn tiꞌj cyxbalun, 11 tuꞌntzun banin cyten caꞌj, porque caꞌj chin cubile twi witz Sinaí tuꞌn tcub nyecꞌun wibe cywitz, akine Cymane. 12 Kꞌon cuba jun techal tiꞌjele witz, ex kꞌmanxa cye cyjaꞌ: Ten cycwente cyiꞌje, miꞌn che jaxe twi witz, ex miꞌn che pon lakꞌeꞌye t-xe witz, porque alcye jun ma tzꞌoc maconte te, ax toc cymel. 13 Alcye jun otok tzꞌocx tujxi techal, miꞌn txi jun xjal tzyulte te, nok oꞌcx abj ex ka plech cxel xoꞌt tiꞌj tuꞌn tcyim; ka xjal ex ka alumaj, nok alcyex, mlay tzꞌankꞌin. Oc toc kꞌajtzaꞌn chun nim tuj, maxitzun baꞌn cyjax twi witz, chi Dios.

14 Cuꞌtz Moisés twi witz, cubil jatum ateꞌtok ke xjal, e baj t-xjansaꞌn, ex ke xjal jatz cytxꞌjoꞌn tiꞌj cyxbalun. 15 Xi tmaꞌn Moisés cye cyjaꞌ:

—Cybincham cytene te caꞌj. Miꞌn cub cymojban cyibe tucꞌil cyxuꞌjile, chi Moisés.

16 Tej kskix tuj toxin kꞌij, cub koptzꞌaj tkan kꞌancyok, o julin wen ex cub juqueꞌ kꞌek muj twi witz. Tzajtzun kꞌajt chun cyuw wen, ex tzaj nim t-xobil cyiꞌj cycyakil xjal ateꞌ tuj campament. 17 E jicꞌtzun tucꞌin Moisés ke xjal tuꞌn cyxiꞌ canul tiꞌj Dios ex axtzun e cub weꞌ t-xe witz. 18 Tcyakil witz Sinaí in bukintok wen tuꞌn sib, tuꞌnju otok cubil Kman twiꞌ tuj tkan kꞌakꞌ. Aju sib in bukintok twi witz mer ic tzaꞌn sib tuj jorni, ex tcyakil witz in luꞌluntok wen. 19 Nok jawni jaw tkꞌajkꞌajel twi chun. Octzun ten Moisés yolil tucꞌil Dios, atzunte Dios in tzajxi ttzakꞌweꞌntok tucꞌil tkꞌajkꞌajel twiꞌ cyuw.

20 Cubiltzun Kman twi witz Sinaí, ex jax txcoꞌn Moisés tuꞌn, tuꞌn tjax twi witz. Jaxtzun Moisés twi witz, 21 ex tzaj tmaꞌn Kman te cyjaꞌ:

—Tcuꞌxa cyucꞌil xjal, ex kꞌmanxa cye tuꞌn miꞌn cyoctz tujtzi techal ex tuꞌn miꞌn cytzaj queꞌyilte weye, porque che cymel nimcu ka ma che octz tujtzi techal. 22 Ax icx ke pal in che tzaj lakꞌeꞌ ntxlaje, il tiꞌj tuꞌn cyxjansante cyib tuꞌntzun miꞌn cynaj wuꞌne.

23 Xitzun tmaꞌn Moisés te Kman:

—Mlay che jatz xjal twi witz Sinaí, porque o tzaj tmaꞌna cyjaꞌ: Kꞌon cuba techal tiꞌjele witz, ex xjansama, chitzuna.

24 Tzaj tmaꞌn Kman te:

—Tcuꞌxa ex bix jaꞌwila juntl maj tucꞌix Aarón tucꞌila. Atzun cye pal cyucꞌix ke xjal, miꞌn che icꞌtz tibaj techal, ex miꞌn che jatz queꞌyilte weye, tuꞌntzun miꞌn cynaj wuꞌne, chi Kman.

25 Cuꞌtztzun Moisés ex cubil cyucꞌil xjal, ex xi tmaꞌn yol lu cye.