Ul Jetro visistaril te Moisés
18
Ate Jetro aju pal cye aj Madián ex tjiꞌ Moisés, o tbi tcyakilju baꞌn otok tbincha Dios tiꞌj Moisés ex cyiꞌj aj Israel, ex tzaꞌn tten otok che etz tiꞌn Kman tuj Ejipt. 2 Otok tzꞌaj samaꞌn Séfora tuꞌn Moisés aju tchmil, ex otok cꞌmonjtz tuꞌn Jetro aju tman, 3 cyucꞌix ke cabe tal. Gersón tbi jun, tuꞌnju otok tma Moisés: Stranjer xjal kine tuj txꞌotxꞌ lu. 4 Eliezer tbi juntl, tuꞌnju otok tma Moisés: Ul Tdios Nmane onil weye, ex o chin clete tuꞌn twitz t-spad Faraón.5 Ate Jetro aju tjiꞌ Moisés, cyucꞌix ke cabe tcyꞌajal Moisés ex t-xuꞌjil, e ul tucꞌil Moisés jatum otok cub ten tuj tzkij txꞌotxꞌ, ttxlaj witz te Dios. 6 Xi t-samaꞌn tkanil te Moisés cyjaꞌ: Akine Jetro aju tjiꞌya ma chin ule queꞌyilte teya, junx tucꞌil t-xuꞌjila ex cyucꞌix ke cabe tcyꞌajala.
7 Etztzun Moisés cꞌmolte tjiꞌ, cub mocꞌeꞌ twitz ex el ttzꞌuban twitz. Baj cykanin cyxolx tzaꞌn ateꞌtok ex e ocx tuj ja xbalun te Moisés. 8 Xitzun ttxꞌolbaꞌn Moisés te tjiꞌ tcyakilju otok tbincha Kman tiꞌj Faraón ex cyiꞌj aj Ejipt, nok tuꞌn tcꞌuꞌjlalil cyiꞌj aj Israel; ax icx xi ttxꞌolbaꞌn tiꞌj tcyakil mya baꞌn otok tzaj cyiꞌj tuj be, ex tzaꞌn tten otok che clet tuꞌn Kman.
9 Jaw tzalaj Jetro tiꞌj t-xtalbil Kman otok tbincha cye aj Israel tej cyclet tuꞌn tuj cykꞌab aj Ejipt, 10 ex tma:
—Nimanxwit tbi Kman aju o che clete tuꞌn tuj cykꞌab aj Ejipt, tuj tkꞌab Faraón, ex tjakꞌ cꞌixbisabl cyuꞌn aj Ejipt. 11 Jaꞌlo ma tzꞌel nnicꞌe tiꞌj, ate Kman mas maꞌ toclen cywitz cycyakil ke cydios xjal, tuꞌnju o camban cyiꞌj aj Ejipt tej cyoc jawni cyiꞌj aj Israel, chi Jetro.
12 Tzaj tiꞌn Jetro jun alumaj tuꞌn tcub patit twitz Kman, ax icx tzaj tiꞌn txkantl oyaj te Dios. Atzunte Aarón cyucꞌix cycyakil tij xjal cyxol aj Israel, e ul waꞌl tucꞌil tjiꞌ Moisés twitz Dios.
Tej toc cyoclen txkan xjal te jwes tuꞌn Moisés
13 Tuj juntl kꞌij cub keꞌ Moisés tuꞌn t-xi binchet cyiꞌj xjal. E ultzun xjal twitz biꞌx te prim ex tejxi toc kax. 14 Tej tqueꞌyinte tjiꞌ aju in tbinchaꞌntok cyiꞌj xjal, xi tmaꞌn te cyjaꞌ:
—¿Ti in tbinchaꞌna cyiꞌj xjal? ¿Tikuꞌn oꞌcx teya in cub keꞌ, ex cucx ateꞌ cycyakil xjal twitza biꞌx te prim ex ocxi toc kax? Chi Jetro.
15 Xi ttzakꞌweꞌn Moisés te tjiꞌ:
—Tuꞌnju in che ul xjal wucꞌile tuꞌn t-xi cykanin cyxjel te Dios. 16 Ka at jun kꞌoj cyxol, in che ul wucꞌile, in che oc tuj xjel wuꞌne tuꞌn tel nnicꞌe tiꞌj alcye at til, ex in cheꞌx nmaꞌne ke tley Dios cye ex ke t-xnakꞌtzbil, chi Moisés.
17 Xitzun tmaꞌn tjiꞌ te cyjaꞌ:
—Mya baꞌn aju in tbinchaꞌna. 18 Csictela ex che sictel ke xjal ateꞌ tucꞌila, tuꞌnju alxix akꞌuntl lu te teya. Mlay bant jlu tuꞌna tjunala. 19 Bintza. Cxel nkꞌoꞌne jun tconseja ex awt ctel Dios tucꞌila. Toca te yolil cyiꞌj xjal twitz Dios, ex kꞌmanxa cyxjel xjal te. 20 Kꞌonxa xnakꞌtzbil cye cyiꞌj ke ley ex ke xnakꞌtzbil, ex kꞌmanxa cye tzaꞌn tten tuꞌn cyankꞌin ex alcye tuꞌn cybinchante. 21 Ax icx scꞌoꞌn jawa cyxol xjal ke xinak at cynabl, akeju in che xob twitz Dios, axix toc che yolin, ex mintiꞌ in che jyon cambabl mya tuj tumel. Kꞌonxa jun mil xjal tuj tcwent junjun, jun syent tuj tcwent junjuntl, 50 tuj tcwent junjuntl ex laj tuj tcwent junjuntl. 22 Atzun ke jlu che xel binchante cyiꞌj xjal tcyakil tyemp. Ke yol cyuw tuꞌn cybant cyiꞌj che ul cyiꞌn tucꞌila; atzun keju mya cyuw tuꞌn cybant cyiꞌj, cyuꞌn che xel binchaꞌn cyiꞌj. Cyjaꞌtzun cꞌelel iktz alxix tcub tibaja ex che oniltzun teya. 23 Ka ma tbinchaya jlu ex ka ma tma Dios teya tuꞌn tbinchanteya icju, octzun tipaya ex tuj tzalajbil che ajel meltzꞌaj xjal tuj cyja, chi Jetro.
24 Xi tniman Moisés tyol tjiꞌ ex tbincha tcyakilju o tma te. 25 E jaw t-scꞌoꞌn xinak at cynabl cyxol aj Israel, ex xi tkꞌoꞌn jun mil xjal tuj tcwent junjun, jun syent tuj tcwent junjuntl, 50 tuj tcwent junjuntl ex laj tuj tcwent junjuntl. 26 Atzun ke e jeꞌx binchante cyiꞌj xjal tcyakil tyemp. Ke yol cyuw tuꞌn tbant cyiꞌj xi cyiꞌn tucꞌil Moisés; atzun cycyakil ke yol mya cyuw tuꞌn tbant cyiꞌj, cyuꞌnx xi cybinchaꞌn cyiꞌj. 27 Te tibajxi, baj tkꞌolben tib Moisés tucꞌil tjiꞌ, ex aj meltzꞌaj tjiꞌ tuj ttxꞌotxꞌ.