2 Ka ma cnet jun elekꞌ matok in elkꞌaꞌn tuj ja, ka ma baj cꞌixbisaꞌn ex ka ma cyim, aju otok baj cꞌixbisante te, mintiꞌ til tiꞌj tcyimlen xjal lu. 3 Katzun kꞌijl ma cnet ex ma cub byoꞌn, attzun til aju xjal otok cub byonte te.

Aju xjal otok tzꞌelkꞌaꞌn, cꞌajel tkꞌoꞌn t-xel aju otok tzꞌetz telkꞌaꞌn. Katzun mintiꞌ tumel tuꞌn taj tkꞌoꞌn t-xel, cxeltzun cꞌayit tuꞌn tchjet aju otok tzꞌetz telkꞌaꞌn.

4 Ka itzꞌx alumaj oc tcnet tuj tcwent elekꞌ, ka wacẍ, ka bur ex ka ẍneꞌl, cxeltzun tchjoꞌn cab maj.

5 Ka at jun xjal ma cheꞌx ttzokpiꞌn talun ex ka ma che ocx tzokpaj tuj tawal juntl xjal ex ka cyxol tkan uva, cxeltzun tkꞌoꞌn aju awal mas tbanil in tzaj tuj tcojbil, ex ka aju mas tbanil in tzaj cykꞌoꞌn tkan t-uva te t-xel aju otok naj cyuꞌn ke talun.

6 Ka minaben ma txiꞌ kꞌakꞌ, ka ma txi cꞌant cyxol tkan chꞌiꞌx, ex ka ma tzꞌeꞌy triw tuꞌn kꞌakꞌ lu, ka aju otok tzꞌoc chmoꞌn ex ka aju toctok tiꞌj tkan, ex ka tcyakil cojbil, aju xjal otok cyaj kꞌonte kꞌakꞌ cxel tchjoꞌn aju otok tzꞌeꞌy.

7 Ka ma cyaj tokxenan jun xjal tpwak te juntl, ex ka jun tiꞌxti wiꞌyilxix, ex ka ma tzꞌetz elkꞌaꞌn jlu tuj tja, ka ma cnet elekꞌ, cxeltzun tchjoꞌn elekꞌ cab maj. 8 Katzun mintiꞌ ma cnet elekꞌ, cxeꞌltzun tajwil ja cywitz jwes tuꞌn tel nicꞌbaj tiꞌj ka otok tzꞌoc tkꞌoꞌn tkꞌab tiꞌj aju otok cyaj okxenan tucꞌil.

9 Ka at jun xjal ma tzꞌel tetzan jun wacẍ, jun bur, jun ẍneꞌl, jun xbalun, ex ka juntl tiꞌxti otok cub naj, ex ka chi juntl cyjaꞌ: Weye jlu; che xeꞌltzun cycabil cywitz jwes, ex aju cjawil tzꞌak tuj til cyuꞌn jwes cxel tchjoꞌn cab maj te tucꞌil.

10 Ka at jun ma txi tokxenan tbur te tucꞌil, ex ka twacẍ ex ka t-ẍneꞌl ex ka nok alcyex juntl alumaj; ka ma cꞌixbi, ka ma cyim ex ka ma txi kꞌiꞌn mi aꞌl jun otok queꞌyinte te, 11 aju xjal otok tcꞌam okxenaj cxel tmaꞌn te tajwil jun yol axix toc tuj tbi Kman, ka mintiꞌ otok tzꞌoc tkꞌoꞌn tkꞌab tiꞌj tokxenaj tucꞌil. Cxeltzun tniman tajwil alumaj aju tyol; atzunte miꞌn chojin tiꞌj. 12 Katzun in queꞌyin tiꞌj oc t-xi elkꞌaꞌn alumaj, cxeltzun tchjoꞌn te tajwil. 13 Katzun tuꞌn jun txcup te tjakꞌ cꞌul otok baj paẍuꞌn alumaj, cxeltzun tiꞌn ttxꞌakan alumaj otok cyim te jun yecꞌbil te tajwil, ex miꞌn chojin tiꞌj.

14 Ka at jun ma txi majnante jun tchej tucꞌil, ex ka ma cꞌixbi ex ka ma cyim acux mi aꞌltok tajwil, cxeltzun tchjoꞌn majnalte jteꞌ twi chej. 15 Katzun attok tajwil tej tcyim chej, miꞌntzun txi tchjoꞌn xjal; ka majnaꞌn otok tzaj alumaj, oꞌcxtzun majnibl te cchjetel tuꞌn.

16 Ka at jun ma cub sbunte jun kꞌapoj mya tkꞌoꞌn tyol tucꞌil juntl xinak, ex ka ma cub tan tucꞌil, cxeltzun tkꞌoꞌn twi kꞌapoj, ex cjawil t-xuꞌjlaꞌn. 17 Katzun tcꞌiꞌ tman kꞌapoj txi tkꞌoꞌn tmeꞌjel tuꞌn toc te t-xuꞌjil xinak lu, cxeltzun tkꞌoꞌn xinak twi kꞌapoj te mambaj, ic tzaꞌn cywi kꞌapoj naꞌnx cylonte xinak.

18 Ka at jun xuꞌj baꞌn cyꞌaꞌn, miꞌn cyakꞌe ambil te tuꞌn cucx tankꞌin.

19 Ka at jun xjal ma yaẍin tucꞌil jun alumaj, il tiꞌj cbel byet.

20 Ka at jun ma txi kꞌonte chojbil te junxitl dios ex mya te weye, akine Cymane, il tiꞌj cbel byet.

21 Miꞌn cybinchaye mya baꞌn cyiꞌj ke stranjer xjal ex miꞌn che baj cyyajlaꞌne, porque icx cyeye e tene te stranjer xjal tuj Ejipt.

22 Miꞌn baj cyyajlaꞌne ke meba xuꞌj mi ke cꞌwaꞌl mintiꞌ cyman ex cytxuꞌ. 23 Katzun ma che baj cyyajlaꞌne, ex ka ma che oc ten kanil onbil weye, ax toc ctzajel nbiꞌne tkꞌajkꞌajel cywiꞌ; 24 ctzajeltzun ntxꞌuꞌjile cyiꞌje, ex che bel nbyoꞌne tuꞌn spad. Che cyjel cyxuꞌjile meba, icx ke cycꞌwaꞌle.

25 Ka at jun ma txi kꞌonte pwak te tchꞌex jun xjal meba, aju ax najl cyxol ke xjal etzan wuꞌne, miꞌn tbincha tiꞌj ic tzaꞌn in tbinchaꞌn jun kꞌol chꞌex, ex miꞌn tzꞌel tkanin taꞌl tpwak. 26 Ka at jun ma tzꞌel kꞌinte t-xbalun tucꞌil te prent tiꞌj tchꞌex, cꞌajel tkꞌoꞌn xbalun lu oc tex kꞌij, 27 tuꞌnju oꞌcx xbalun lu in ajben te txaybil te. Ka mintiꞌ ma tzꞌaj tkꞌoꞌn, ¿titzun cꞌajbel tuꞌn oc ttan? Octzun ttzaj tkanin onbil weye, ctzajel nbiꞌne tkꞌajkꞌajel twiꞌ tuꞌnju at tkꞌakꞌbil ncꞌuꞌje.

28 Miꞌn che yoline mya baꞌn tiꞌj Dios, ex miꞌn tzaj cykanine mya baꞌn tibaj ju toc te cawil tuj cytanmiye.

29 Mya yajxi ctzajel cykꞌoꞌne tnejel twitz cyawale weye, tucꞌix taꞌl twitz uva.

Che tzajel cykꞌoꞌne ke tnejel cycyꞌajale te weye. 30 Ax icx ke tnejel cyal cywacẍe ex ke tnejel cyal cyẍneꞌle; wuk kꞌij che tel cyucꞌil cytxuꞌ, ex tuj twajxakin kꞌij cyul-len itzꞌj, che tzajel cykꞌoꞌne weye.

31 Che oquele xjan te weye. Miꞌn txi cychyoꞌne cychibjal alumaj otok che baj cypaẍuꞌn txcup tuj cojbil; cykꞌonxe jlu cye txꞌyan.