2 Cyuj ke tnam che tzajel tkꞌoꞌn Kman Dios cyeye, ka at jun xinak ex ka jun xuꞌj ma tzꞌel cnet in tbinchaꞌn aju mintiꞌ in tzalaj Kman tiꞌj, ka otok tzicꞌ tibaj ju yol cyaj bant tiꞌj tuꞌn Dios cyucꞌile, 3 ka in cꞌulun cywitz junxitl dios ex in cub ẍmejeꞌ cywitz, ka twitz kꞌij, twitz xjaw ex ka cywitz ke cheꞌw, aju mintiꞌ o tzaj tmaꞌn Kman; 4 ka ma cybiye jlu, cbajel cykanine wen ex cbajel cybiꞌne; ex katzun ma tzꞌel cnet ax toc otok binchanjtz aju mya baꞌn cyxol aj Israel, 5 entons aju xjal otok binchante mya baꞌn, cyiꞌn exe ttzi tpwertil tnam ex cyxoꞌn oque tuꞌn abj ocxi tcyim.

6 Tuꞌn cyyol cabe ex ka ox testiw jacu cub t-sentens jun xjal tuꞌn tcyim, nok tuꞌn tyol junx testiw mi jun xjal jacu cub t-sentens tuꞌn tcyim. 7 Ake testiw che oquel xoꞌnte abj tiꞌj xjal tnejel, ex te tibajxi cꞌoquel xoꞌn abj tiꞌj cyuꞌn cycyakil xjal aj tnam. Cyjaꞌtzun cnajel aju mya baꞌn cyxole.

8 Katzun at jun xtis mlay bant tiꞌj cyuꞌne tuꞌnju cyuw ma tzꞌela te cyeye, ic tzaꞌn jun byoj xjal, ka kꞌoj, ka otok tzaꞌw jun tuꞌn juntl, ex ka juntl tiꞌxti in baj tuj tnam, che xeꞌle tuj lugar cjawil t-scꞌoꞌn Kman Dios, 9 tuꞌn cypone cyucꞌil ke pal aj Leví ex tucꞌil jwes tocsaꞌn, tuꞌntzun t-xi cykanine alcye tuꞌn tbant tiꞌj. Atzun ke che kꞌmalte cyeye alcye cbantel tiꞌj cyuꞌne tuꞌn tcub cykꞌoꞌne t-sentens. 10 Cybinchame tcyakil ic tzaꞌnx otok tzaj kꞌmaꞌn cyeye max tuj lugar otok jaw t-scꞌoꞌn Kman. 11 Cbel cykꞌoꞌne t-sentens ic tzaꞌnx otok tzaj tmaꞌn jwes cyeye, ex japunx cyuꞌne aju ctzajel kꞌman cyeye, miꞌn baj cychꞌexpuꞌne. 12 Katzun at jun ma jaw tniman tib ex mintiꞌ ma txi tniman tyol pal aju in ajben te Kman, ex ka tyol jwes, aju xjal lu il tiꞌj cbel byet. Cyjaꞌtzun cnajel aju mya baꞌn at cyxole, akeye aj Israel. 13 Octzun cybinte cycyakil xjal jlu, ctzajel t-xobil cyiꞌj ex cxel cycolin tuꞌn tjaw cyniman cyib.

14 Octzun cypone tuj txꞌotxꞌ ctzajel tkꞌoꞌn Kman Dios cyeye, cyoclenxiye tajwil, oc cynajane tuj ex oc cymanteye cyjaꞌ: Kajbile jun kreye tuꞌn tcawin kibaje ic tzaꞌn cye cycyakil nasyon kvesin kibe cyucꞌil, ka che chiye, 15 cꞌoqueltzun cykꞌoꞌne te cyreye jun cyermaniye aju cjawil t-scꞌoꞌn Kman Dios. Miꞌn tzꞌoc cykꞌoꞌne jun stranjer xjal te cyreye, aju mya cyerman cyibe tucꞌil. 16 Aju cꞌoquel te rey miꞌn baj tchmoꞌn nim tchej, ex miꞌn che aj t-samaꞌn ke xjal tuj Ejipt tuꞌntzun cychmet nim tchej, porque o tma Kman cyeye cyjaꞌ: Miꞌn che aj meltzꞌaje juntl maj tuj be lu, chi Kman. 17 Ax icx miꞌn tzaj tiꞌn nim t-xuꞌjil tuꞌntzun miꞌn tel tzpet cyuꞌn; ex miꞌn baj tchmoꞌn nimxix kꞌan pwak ex sak pwak.

18 Octzun tcꞌmonte toclen te rey, cxel tmaꞌn tuꞌn tcub tzꞌibet jun copya tiꞌj ley lu, ax tiꞌj ttxuylal at tuj cycwent ke pal aj Leví, tuꞌntzun tajben te te. 19 Cucx ctel aju copya lu tucꞌil, ex cjawil t-schꞌiꞌn tuj tcyakil kꞌij oc tten tzalu twitz txꞌotxꞌ, tuꞌntzun t-xob twitz Kman Dios, tuꞌn t-xi tniman tcyakilju in tmaꞌn ley lu, ex tuꞌn cyjapun tuꞌn; 20 tuꞌntzun miꞌn toc tkꞌon tib te maꞌxix cywitz ke terman, ex tuꞌn miꞌn tel tpaꞌn tib cyiꞌj ke mandamyent lu. Cyjaꞌtzun, tzaꞌnxix te, ax icx ke tiyjil, che cawil nim tyemp cyxol aj Israel.