3 Aju at cyoclen ke pal tiꞌj cyiꞌj ke tor ex ke ẍneꞌl che xel cykꞌoꞌn xjal te chojbil, atzun ke jlu: Jun tkꞌab, tucꞌix chibj tjakꞌ tbakil ttziꞌ, ex tpans. 4 Ax icx cꞌoquel te cye, tnejel twitz triw, tnejel taꞌl twitz uva, tnejel chibj aseyt, ex aju tnejel lan cꞌelel matzet cyiꞌj ke ẍneꞌl; 5 porque o che jaw t-scꞌoꞌn Kman Dios cyxol cycyakil cꞌloj cyiyjil aj Israel tuꞌn cyajben te jumajx tuj cꞌulbil te, cyucꞌix ke cycꞌwaꞌl.

6 Ka at jun aj Leví ma tzꞌetz tuj jun tnam cyxole, ex ka ma pon tuꞌn tcyakil tgan tuj lugar otok jaw t-scꞌoꞌn Kman, 7 jacu tzꞌajben te pal tuj tbi Kman, ic tzaꞌnx in che ajben te Kman cycyakil ke txkantl tucꞌil ax aj Leví ke, 8 ex oc tcꞌmaꞌ twa ic tzaꞌnx cye txkantl in cycꞌmoꞌn, ex part aju oc tcꞌmaꞌ tiꞌj tetzbil.

9 Oc cyocxe tuj txꞌotxꞌ ctzajel tkꞌoꞌn Kman Dios cyeye, miꞌn tzꞌel cycanoꞌne aju costumr icꞌbilxix in cybinchaꞌn ke nasyon ma chixin. 10 Mi jun cyeye txi kꞌonte jun tcꞌwaꞌl te chojbil tuꞌn tcub patit tuj kꞌakꞌ, mi jun tuꞌn tbant tkꞌijin, mi jun tzꞌoc tkꞌoꞌn tib kꞌmalte alcye tzul te tibajxi, mi jun tuꞌn tbant tcyꞌaꞌn, 11 mi jun tuꞌn tbant mañ tuꞌn, mi jun tuꞌn t-xi tkanin jun t-xjel cye aj kꞌij ex mi cye keju in tzaj cytxcoꞌn cyanmi cyimni, ex mi jun tuꞌn t-xi tkanin jun t-xjel cye cyimni. 12 Porque icꞌun tuꞌn Kman aju xjal in tbinchaꞌn tcyakil jlu, ex tuꞌntzunju icꞌbilxix in cybinchaꞌn ke nasyon lu, che elex tlajoꞌn Kman Dios cywitze. 13 Che ocxe tzꞌaklxix twitz Kman Dios. 14 Akeju nasyon lu, akeju che oquele te tajwil cytxꞌotxꞌ, in xi cybiꞌn cyyol ke chman ex ke aj kꞌij; atzun cyeye mintiꞌ tzokpiꞌn keye tiꞌj tuꞌn Kman Dios tuꞌn tbant jlu cyuꞌne.

15 Cjawil t-scꞌoꞌn Kman Dios jun t-sanjel cyxole ic tzaꞌnx kine, ex cxel cynimane tyol. 16 Atzun jlu xi cykanine te Kman Dios tuj kꞌij tej toc cychmon cyibe cycyakile t-xe witz Horeb, tej cymanteye cyjaꞌ: Kcꞌiꞌye ko bine juntl maj tkꞌajkꞌajel twi Kman Dios, mi tuꞌn tkile aju nintz kꞌakꞌ lu, tuꞌntzun miꞌn kcyime, che chiye. 17 Tzajtzun tmaꞌn Kman weye: Baꞌn aju yol ma cyma aj Israel. 18 Ax cyxol cyerman cjawil nscꞌoꞌne jun nsanjele ic tzaꞌnx aya, ex cxel tmaꞌn cye tcyakil nyole cxel nmaꞌne te. 19 Katzun at jun xjal mintiꞌ ma txi tbiꞌn tyol nsanjele, aju c-yolil cyucꞌil te nxele, cꞌoquel te xjal lu tuj xjel wuꞌne. 20 Aju sanjel tuꞌnx tib in yolin jun yol ex in tman ka wuꞌne otok txi nsamaꞌne, ex mintiꞌ otok txi nmaꞌne jun yol te, ex ka in tmaꞌn ka otok tzaj samaꞌn cyuꞌn junxitl dios, il tiꞌj cbel byet, chi Kman. 21 Katzun ma cymaye cyjaꞌ: ¿Tzaꞌntzun tten cꞌelel knicꞌe tiꞌj ka mya tyol Kman in yolin tiꞌj? ka che chiye, il tiꞌj tuꞌn toc cycwente tiꞌj jlu: 22 Ka mintiꞌ ma japun aju yol otok tma sanjel tuj tbi Kman, atzun cꞌelel cynicꞌe tiꞌj mya a Kman otok kꞌmante te, nok tuꞌnx otok tzꞌoc tkꞌoꞌn tib te t-sanjel Dios tuꞌn tnimbil tib; tuꞌntzun jlu miꞌn che xobe twitz.