Ke tnam te cycolbil cyib xjal
19
Octzun cybaj naj ke xjal cyuj ke nasyon tuꞌn Kman Dios, oc ttzaj tkꞌoꞌn cytxꞌotxꞌ cyeye, oc cyoque tajwil cytxꞌotxꞌ ex oc cynajane cyuj ke cytanmi ex cyuj cyja, 2 cꞌeleltzun cypaꞌne ox tnam tuj txꞌotxꞌ aju ctzajel tkꞌoꞌn Kman Dios tuꞌn toc te cyeye. 3 Ox paꞌn tzꞌela txꞌotxꞌ cyuꞌne, ex che bajel cybinchaꞌne ke be che pol cyuj ke ox tnam, tuꞌntzun tpon cyclon cyib ke byol xjal cyuj. 4 Aju otok biyun, baꞌn t-xi ok tuj jun cye ke tnam lu ex jacu clet, ka mya ximamaj tuꞌn aju otok tbincha, ex ka mintiꞌtok kꞌoj cyxol. 5 Ic tzaꞌn ka ma cheꞌx cabe xjal tjakꞌ cꞌul txꞌemil siꞌ, ex oc toc ten jun txꞌemil siꞌ, ka nneꞌxcu cotpaj cꞌuxbil tiꞌj tkan ex acu cpol tzꞌak tiꞌj tucꞌil ex biꞌx ma cyim tuꞌn, baꞌntzun t-xi ok tuj jun cye ke tnam lu, ex cyjaꞌtzun tten ccletel. 6 Mya yajcu tzaj ttxꞌuꞌjil jun xjal at t-xilen ktzan cyimni tucꞌil, ex taj tuꞌn t-xelin tiꞌj aju otok biyun ka ma pon cnet tuꞌn, tuꞌnju najchak tuꞌn t-xi tbetin jaculo cub tbyoꞌn, pero aju xjal lu mintiꞌ til tuꞌn tcub byoꞌn tuꞌnju mya cyajkꞌojtok cyib tucꞌil aju otok cyim tuꞌn. 7 Tuꞌntzun jlu in xi nmaꞌne tuꞌn tel cypaꞌne ox tnam, 8 ex oc tel lakꞌeꞌ cytxꞌotxꞌe tuꞌn Kman Dios, ex oc t-xi tkꞌoꞌn tcyakil txꞌotxꞌ cyeye ic tzaꞌnx o txi ttziyan cye cyxeꞌchele, 9 cꞌeleltzun cypaꞌntle oxtl tnam te cycolbil cyib xjal. Ctzajel tkꞌoꞌn Kman txꞌotxꞌ cyeye ka cucx ma che japun ke tmandamyent cyuꞌne, akeju ma cheꞌx nkꞌoꞌne cyeye jaꞌlo, ka cucx ma cycꞌujlaye Kman Dios ex ka cucx ma cheꞌx lpeꞌye tiꞌj tbe. 10 Cyjaꞌtzun ctelba cyuꞌne tuꞌn miꞌn tcub byoꞌn jun xjal mintiꞌ til tuj txꞌotxꞌ ctzajel tkꞌoꞌn Kman Dios te cyetzbile, ex mintiꞌtzun cyile tiꞌj tcamic jun xjal mintiꞌ til.11 Katzun at jun xinak tajkꞌoj tib tucꞌil juntl, ka ma cub ten xkꞌukil tiꞌj tuj ewaj, ka ma tzꞌoc tzokpaj tiꞌj ex ka ma cub tbyoꞌn, ex ka te tibajxi cxel ok tuj jun cye tnam te cycolbil cyib xjal, 12 atzun cye tij xjal tuj ttanmi cxel cymaꞌn tuꞌn tetz kꞌibaj xjal lu, tuꞌn t-xi cykꞌoꞌn tuj tkꞌab jun xjal at t-xilen tucꞌil ktzan cyimni, tuꞌntzun t-xelin ex tuꞌn tcyim. 13 Miꞌn tzaj tzꞌeꞌy cycꞌuꞌje tiꞌj, cyjaꞌtzun cwebil tuꞌn miꞌn cycub byoꞌn ke xjal mintiꞌ cyil cyxol aj Israel, tuꞌntzun tel baꞌn te cyeye.
14 Tuj txꞌotxꞌ ctzajel kꞌoꞌn cyeye tuꞌn Kman Dios, miꞌn tzicꞌ cylakꞌbaꞌne tmojonil cytxꞌotxꞌ ke cyvesine, aju tmojonil cub cykꞌoꞌn ke xjal te ojtxi.
Aju ley cyiꞌj ke testiw nicꞌal yol
15 Ka junx xjal ma pon kꞌol part tiꞌj jun tucꞌil ex ka ma tma: At til ex ka at mya baꞌn ma bant tuꞌn, ka chi, mlay txi biꞌn tyol, porque tjunalx te in kꞌmante jlu. Oꞌcx jacu txi niman ka at cabe ex ka ox testiw.
16 Ka at jun xjal ma jaw tnicꞌan yol tiꞌj jun tucꞌil, ex ka ma tma at il ma bant tuꞌn xjal lu, ka chi, 17 atzun ke cabe xjal lu che pol twitz Kman, cywitz ke pal ex cywitz ke jwes in che cawin tuj kꞌij oc tbant jlu. 18 Atzun cye jwes cheba cbajel cykanin. Katzun nok otok txi tnicꞌan testiw jun yol tiꞌj tucꞌil, 19 axtzun castiw cbel tibaj, aju otok txi tkanin tuꞌn tcub tibaj tucꞌil. Cyjaꞌtzun tten cꞌelel mya baꞌn cyxole. 20 Octzun cybinte ke mastl, ctzajel cyxobil ex mlay cybincha jun il ic tzaꞌn jlu. 21 Miꞌn tzaj kꞌakꞌan cycꞌuꞌje tiꞌj xjal nicꞌal yol: Ka at jun ma cyim jun tucꞌil tuꞌn, ax icx te il tiꞌj tuꞌn tcyim; ka ma naj tbakꞌ twitz jun tucꞌil tuꞌn, ax icx te il tiꞌj tuꞌn tnaj tbakꞌ twitz; ka ma tzꞌetz twitz teꞌ jun tucꞌil tuꞌn, ax icx te il tiꞌj tuꞌn tetz twitz teꞌ; ka ma naj tkꞌab jun tucꞌil tuꞌn, ax icx te il tiꞌj tuꞌn tnaj tkꞌab, ex ka ma naj tkan jun tucꞌil tuꞌn, ax icx te il tiꞌj tuꞌn tnaj tkan.