Ke ley oc toc kꞌoj
20
Oc cyexe tuj kꞌoj cyiꞌj ke aj kꞌoj cyiꞌje, ka ma cyile kꞌiꞌn chej cyuꞌn, cyucꞌix carwaj in che ajben tuj kꞌoj, ex ka mas nim cyajlal soldad ic tzaꞌn cyeye, miꞌn che xobe cywitz, porque ate Kman Dios ctel cyucꞌile, aju etz kꞌinte cyeye tuj Ejipt. 2 Octzun tpon or tuꞌn ttzyet kꞌoj, cpol lakꞌeꞌ pal tuꞌn tyolin cyucꞌil soldad aj Israel, 3 ex cxel tmaꞌn cye cyjaꞌ: Cybintze akeye aj Israel, jaꞌlo che kꞌojele cyiꞌj aj kꞌoj cyiꞌje. Miꞌn baj cycꞌuꞌje ex miꞌn che xobe; miꞌn che tzaj luꞌlune ex miꞌn che jaw secꞌpaje, 4 porque ate Kman Dios at cyucꞌile; ate ckꞌojel cyiꞌj ke aj kꞌoj te cyxele, ex cyjaꞌtzun akeye che cambal. Atzun jlu cxel tmaꞌn pal.5 Ax icx cxel cymaꞌn ke nejenel cyjaꞌ: Ka at jun cyeye ma bant jun tja acꞌaj ex naꞌnx tocx ten najal tuj, e taj tja; mya yajcu cyim tuj kꞌoj ex jacu juntl tzꞌocx ten najal tuj tja. 6 Ka at jun cyeye ma cuꞌx tawaꞌn uva ex naꞌnx tnicꞌben tiꞌj, e taj tja; mya yajcu cyim tuj kꞌoj ex jacu juntl jaw chmonte twitz t-uva. 7 Ka at jun cyeye ma bant tiꞌj tuꞌn tmojeꞌ ex naꞌnx tmojeꞌ, e taj tja; mya yajcu cyim tuj kꞌoj ex jacu juntl mojeꞌ tucꞌil txin attok tmojebel tucꞌil. Atzun jlu cxel cymaꞌn ke nejenel.
8 Te tibajxi oc cymaꞌtl ke nejenel cyjaꞌ: Ka at jun in xob ex mya cyuw tcꞌuꞌj tuj kꞌoj, e taj tja tuꞌntzun miꞌn tbaj cycꞌuꞌj ke tucꞌil tuꞌn. 9 Octzun cybaj yolin ke nejenel, cꞌoqueltzun kꞌot cyoclen ke capitán tuꞌn cycub nej cywitz junjun cꞌloj soldad.
10 Octzun cypon lakꞌeꞌye tiꞌj jun tnam tuꞌn cyoc tzokpaje tiꞌj, tnejel cxel cymaꞌne cye ka jacu cub tuj cywitz tuꞌn cycyaj tjakꞌ cycawbile. 11 Katzun ma cub tuj cywitz ke xjal najl tuj tnam, ex ka ma cyakꞌ ambil tuꞌn cyocxe tuj tnam, octzun che oquel te cymajene ex che ajbel cyeye. 12 Katzun cycꞌiꞌ ex ka ma cyma tuꞌn toc kꞌoj, bixtzun baj cytxolin cyibe tiꞌjele tnam ex bix che oc tzokpaje cyiꞌj. 13 Octzun cycub tzꞌak tuꞌn Kman Dios tuj cykꞌabe, che bel cybyoꞌne tuꞌn spad cycyakil ke xinak najl tuj tnam. 14 Atzun ke xuꞌj, ke cꞌwaꞌl, ke wacẍ, ex tcyakilju at tuj tnam, te cyeye che oquel; che nicꞌbele tiꞌj tcyakilju cꞌelel cyiꞌne cye aj kꞌoj cyiꞌje, aju ctzajel tkꞌoꞌn Kman Dios cyeye. 15 Cyjaꞌtzun che tembil cycyakil ke tnam cyuꞌne, akeju ateꞌ najchak cyiꞌje, akeju mya ax ateꞌ cyuj ke nasyon jatum che tele. 16 Atzun ke tnam cye nasyon che tzajel tkꞌoꞌn Kman Dios tuꞌn cyoc te cyetzbile, mi jun cyjel ankꞌin cyuꞌne cyuj; 17 nok oꞌcx tuꞌn cynaj cyuꞌne te jumajx cycyakil ke xjal lu: Ke aj Hetey, ke aj Amorrey, ke aj Cananey, ke aj Ferezey, ke aj Hevey ex ke aj Jebusey, ic tzaꞌnx o tma Kman, 18 tuꞌntzun miꞌn cytzaj xnakꞌtzaꞌne cyuꞌn tuꞌn cybinchanteye aju icꞌbilxix in bant cyuꞌn te nimbil cye cydios, ex tuꞌn miꞌn cybinchane il twitz Kman Dios.
19 Katzun nim kꞌij che tele tiꞌjele jun tnam tuꞌn ttzyet cyuꞌne, miꞌn jaw cytxꞌemine ke tzeꞌ baꞌn tlonjtz cywitz ateꞌ tiꞌjele tnam, porque jacu tzꞌajben cywitz tuꞌn cyloꞌne cyiꞌj, ex ake jlu, tzeꞌ ke, mya xjal ke tuꞌn cyoc tzokpaj cyiꞌje. 20 Atzun ke tzeꞌ ojtzkiꞌn cyuꞌne miban tloꞌnjtz cywitz, baꞌn tuꞌn cyjaw cytxꞌemine, ka tuꞌn cyajben cyuꞌne te cyxweꞌtzbile tiꞌj tnam aju che oquel tzokpaje tiꞌj, ocxi ttzyet cyuꞌne.