Aju tuꞌn tbant tiꞌj jun xjal mintiꞌ otok ilwajtz al uꞌn otok cub byoꞌn
21
Ka ma cnet t-ximlal jun cyimni cyuꞌne tuj cojbil tuj txꞌotxꞌ ctzajel tkꞌoꞌn Kman Dios te cyetzbile, ex ka mintiꞌ otok ilwajtz al uꞌn otok cub byoꞌn, 2 atzun cye tij xjal cyucꞌix ke jwes cxel cyechan t-xol lugar jatum tcubsaꞌn t-ximlal cyimni cyucꞌil ke tnam nikayin ateꞌ. 3 Atzun cye tij xjal ateꞌ tuj tnam mas nikayin taꞌ, ctzajel cyiꞌn jun tal vac naꞌnxtok toc tiꞌj akꞌuntl ex naꞌnxtok tocx tjakꞌ yuw, 4 cbelex cyiꞌn tuj jun tkꞌab xak in bet aꞌ tuj, jatum naꞌnx tbaj chꞌocꞌan txꞌotxꞌ ex naꞌnx tcub aj awal tuj, atzun cjawil cytokin tiꞌj tkul tal vac. 5 Te tibajxitzun che pol lakꞌeꞌ ke pal aj Leví, porque atzun ke o che jaw t-scꞌoꞌn Kman tuꞌn cyajben te ex tuꞌn cycub cyꞌiwlaꞌn xjal cyuꞌn tuj tbi Kman; nok tuꞌn cyyol jacu bant cyiꞌj xjal, ka at kꞌoj ex ka at jun ma cꞌixbi tuꞌn juntl. 6 Cycyakil ke tij xjal tuj tnam mas nikayin taꞌ jatum otok cyim xjal, cꞌelel cytxꞌjoꞌn cykꞌab tibaj tal vac otok jaw tokin tiꞌj tkul ttzi aꞌ, 7 ex cxel cymaꞌn: Mya kuꞌne cub kbyoꞌne xinak lu, ex mintiꞌ o kile tzaꞌn tten cub byoꞌn. 8 Kman, najsama kile akoꞌye aj Israel ex tuꞌna o ko colpete, miꞌn tzꞌoc tkꞌoꞌna te kile aju tcamic xjal lu, che chi, cxel cymaꞌn. Cyjaꞌtzun mlay che oque tuj xjel tiꞌj tcamic xjal lu. 9 Ex mlaytzun tzꞌoc kꞌoꞌn tcamic xjal lu cyiꞌje ka ma cybinchaye aju in tmaꞌn Kman.Aju ley cyiꞌj ke xuꞌj che tzyetel tuj kꞌoj cyuj junxitl tnam
10 Octzun cyexe kꞌojlel cyiꞌj aj kꞌoj cyiꞌje, ka ma che tzaj tkꞌoꞌn Kman Dios tuj cykꞌabe tuꞌn cytzaj cypresine ke, 11 ka at jun cyeye ma til jun xuꞌj tbanilxix queꞌyin cyxol, ex ka ma t-xoꞌ tgan tiꞌj ex ma tzaj tiꞌn tuꞌn toc te t-xuꞌjil, 12 cxeltzun tiꞌn aju xuꞌj lu max tja. Atzun te xuꞌj lu, cꞌelel tiꞌn tcyakil ttzmal twiꞌ, che elel tiꞌn ke twi t-xcyꞌak, 13 cꞌelel tiꞌn t-xbalun tocsaꞌntok tej ttzaj kꞌiꞌn pres, ex axtzun cyjel ten tja xinak. Cjawiltzun okꞌ xuꞌj cyiꞌj tman cycyakil kꞌij tuj enter jun xjaw. Tbajlenxitzun jlu, baꞌntzun tuꞌn tcub tmojban tib xinak aj Israel tucꞌil; cꞌoqueltzun te tchmil xuꞌj lu, atzunte xuꞌj cꞌoquel te t-xuꞌjil. 14 Katzun te tibajxi mya baꞌn ma tzꞌela xuꞌj tuj twitz, baꞌn tuꞌn tcyaj ttzokpiꞌn; pero miꞌn txi tcꞌayin tuꞌn pwak ex miꞌn tzꞌoc tkꞌoꞌn te majen, porque otok cub tan tucꞌil xuꞌj lu.
Aju at cyoclen nej cycyꞌajal aj Israel tiꞌj
15 Ka at jun xinak at cabe t-xuꞌjil, ex ka mas cꞌujlaꞌnxix jun tuꞌn, atzun juntl myaxix cꞌujlaꞌn tuꞌn, pero ka cycabil xuꞌj lu kꞌa tnejel cyal, ex ka aju tnejel tcyꞌajal atzun tal aju xuꞌj myaxix cꞌujlaꞌn tuꞌn, 16 octzun tpon tkꞌijlalil tuꞌn tcub tpaꞌn tkꞌinumabl cyxol ke tcyꞌajal, mlay tzꞌoc tkꞌoꞌn te nej tcyꞌajal aju tal ju xuꞌj cꞌujlaꞌnxix tuꞌn te t-xel ju tnejel tcyꞌajal tiꞌj ju xuꞌj myaxix cꞌujlaꞌn tuꞌn, aju axix toc tnejel tcyꞌajal. 17 Il tiꞌj tuꞌn toc tkꞌoꞌn te tnejel tcyꞌajal, ex mas nim tkꞌinumabl ctzajel tkꞌoꞌn twitzju cxel tkꞌoꞌn cye mastl tcyꞌajal, porque atzun tnejel tcyꞌajal tej matok kꞌiꞌn tipun, ex tetzun cꞌwaꞌlbaj lu tcyakilju oclenbaj te nej cꞌwaꞌlbaj xinak.
Aju cycastiw ke cꞌwaꞌlbaj miban che niman
18 Ka at jun cyxole at jun tcꞌwaꞌl miban niman, txꞌuꞌj twiꞌ ex mintiꞌ in xi tniman aju in cymaꞌn tman te, ex masque cub kꞌoꞌn tcastiw pero mintiꞌ in xi tniman, 19 cxeltzun kꞌiꞌn cyuꞌn tman ttzi tpwertil ttanmi cywitz ke tij xjal te tnam, 20 ex cxel cymaꞌn cye tij xjal cyjaꞌ: Aju kcꞌwaꞌle lu miban niman, txꞌuꞌj twiꞌ, mintiꞌ in koꞌx nimane tuꞌn; jumajx mya baꞌn ex puro cꞌal kꞌeꞌn. 21 Cycyakiltzun ke xinak ateꞌ tuj tnam cꞌoquel cyxoꞌn cꞌwaꞌlbaj lu tuꞌn abj tuꞌn tcyim. Cyjaꞌtzun cꞌelel cyiꞌne mya baꞌn at cyxole tuj tnam, ex oc cybinte cycyakil aj Israel jlu, ctzajel cyxobil.
Txkantl ley
22 Ka at jun xjal ma cub t-sentens tuꞌn tcyim ex ka ma jaw yobit tiꞌj tzeꞌ tuꞌn tlaj otok tbincha jun il maꞌxix, 23 mlay cyaj ten t-ximlal tiꞌj tzeꞌ tuj enter konicꞌan; il tiꞌj tuꞌn tcuꞌx makut ax kꞌij lu, porque aju xjal in jaw yobin tiꞌj jun tzeꞌ tcub t-sentens tuꞌn Dios. Miꞌn baj cytzꞌilsaꞌne txꞌotxꞌ aju ctzajel tkꞌoꞌn Kman Dios te cyetzbile.