4 Ka ma cyile tbur jun cyxjalile ex ka twacẍ otok cub tzꞌak tuj be, miꞌn tzꞌel cycumin cyibe tiꞌj, nok oꞌcx tuꞌn cyonine tuꞌn tjaw twaban.

5 Miꞌn tzꞌoc tkꞌoꞌn xuꞌj t-xbalun xinak tiꞌj, ax icx te xinak miꞌn tzꞌoc tkꞌoꞌn t-xbalun xuꞌj tiꞌj, porque icꞌun tuꞌn Kman Dios aju xjal in binchante jlu.

6 Ka ma che oc noje tiꞌj jun kꞌuꞌ chyuꞌj tjax twiꞌ jun tzeꞌ ex ka tcub twitz txꞌotxꞌ, ka ateꞌ ke tal chyuꞌj tuj tkꞌuꞌ ex ka tjos, ex ka bunl cytxuꞌ cyibaj, miꞌn tzaj cyiꞌne aju cytxuꞌ cyucꞌix ke tal; 7 nok oꞌcx ke tal tuꞌn ttzaj cyiꞌne, atzun cytxuꞌ cxel cytzokpiꞌne, tuꞌntzun tten baꞌn cyeye ex tuꞌn cyxi lakꞌeꞌ tuj cykꞌije.

8 Oc tjaw cybinchaꞌne jun cyjaye, il tiꞌj tuꞌn tjaw cybinchaꞌne jun tal makbil tiꞌjele twi ja, tuꞌntzun miꞌn ttzaj cyil keju ateꞌ tuj cyjaye tiꞌj tcamic jun xjal ka ma tzaj tzꞌak twi ja.

9 Miꞌn cuꞌx cyawaꞌne juntl wik iyaj cyxol tkan uva, tuꞌntzun miꞌn tel kꞌiꞌn tcyakil cyeye tuꞌn tajben tuj tja Dios, tzaꞌnx ju iyaj otok cuꞌx cyawaꞌne, ax icx twitz uva.

10 Miꞌn tzꞌoc cykꞌoꞌne jun bur chꞌoquil tucꞌil jun wacẍ.

11 Miꞌn tzꞌoc cykꞌoꞌne cyxbalune smoꞌn lan ex nokꞌ lino tuj.

12 Cykꞌonque xcꞌaloꞌxin cyiꞌj cycyajil ttxaꞌn cymante toc cyiꞌje.

13 Ka at jun xinak ma tzaj tiꞌn jun txin tuꞌn toc te t-xuꞌjil, ex ka ma tzꞌel ticꞌun toclenxi mojeꞌ tucꞌil, 14 ka ma tzꞌoc ten yolil mya baꞌn tiꞌj ex ka ma tmaꞌ cyjaꞌ: In mojeꞌye tucꞌil xuꞌj lu, pero tej nmojeꞌye tucꞌil el nnicꞌe tiꞌj otok til xinak, ka chi, 15 atzun cye tman txin cxel cyiꞌn jun yecꞌbil cywitz ke tij xjal te tnam, tuꞌn cyyecꞌunte ka naꞌnxtok ttil txin xinak; 16 ex cxel tmaꞌn tman txin cye tij xjal cyjaꞌ: Xi nkꞌoꞌne nmeꞌjele te t-xuꞌjil xinak lu, atzun jaꞌlo mintiꞌtl tgan tiꞌj 17 ex in tmaꞌn ka at tpaltil ex ka otok tilxi nmeꞌjele xinak, pero lu yecꞌbil kꞌiꞌn wuꞌne tuꞌn tyecꞌunjtz ax toc naꞌnxtok ttil nmeꞌjele jun xinak, chi tman txin cxel tmaꞌn. Ex cbel cylicꞌun xbalun cywitz ke tij xjal te tnam. 18 Ctzajeltzun cytzyuꞌn ke tij xjal aju xinak lu, ex cbel cykꞌoꞌn tcastiw, 19 cꞌelel cyiꞌn syen sak pwak tmult tuꞌn t-xi kꞌot te tman txin, tuꞌn tlaj otok yolin mya baꞌn tiꞌj jun txin aj Israel bajxtok til xinak; ex ax xuꞌj lu cꞌoquel te t-xuꞌjil, ex mlay cub tpaꞌn tib tucꞌil xuꞌj tuj tcyakil tankꞌibl.

20 Katzun ax toc otok tilxi txin xinak, 21 cꞌeletztzun cyiꞌn ttzi tlamel tja tman, ex cꞌoquel xoꞌn abj tiꞌj cyuꞌn ke tij xjal te tnam tuꞌntzun tcyim, tuꞌnju otok tbincha jun mya baꞌn maꞌxix cyxol aj Israel ex otok yaẍin tuj tja tman. Cyjaꞌtzun ctelba tuꞌn tnaj mya baꞌn cyxole.

22 Ka at jun xinak ma tzꞌel cnet in tan tucꞌil jun xuꞌj mejebni, cycabil che bel byet. Cyjaꞌtzun ctelba tuꞌn tnaj mya baꞌn cyxole, akeye aj Israel.

23 Ka at jun txin naꞌnxtok ttil xinak ex otok bant tiꞌj tuꞌn tmojeꞌ, ka ma tzꞌoc noj juntl xinak tiꞌj tuj tnam, ex ka ma cub tan tucꞌil, 24 cycabiltzun che xel kꞌit ttzi tpwertil tnam, ex che oquel xoꞌt tuꞌn abj tuꞌn cycyim. Cymel txin tuꞌn tlaj mintiꞌ jaw schꞌin ex tuj tnam taꞌtok, ex cymel xinak tuꞌn tlaj otok cub tmojban tib tucꞌil t-xuꞌjil tucꞌil. Cyjaꞌtzun ctelba tuꞌn tnaj mya baꞌn cyxole.

25 Katzun at jun xinak ma tzꞌoc noj tiꞌj jun txin tuj cojbil ex ka otok bant tiꞌj tuꞌn tmojeꞌ txin, ex ka ma tzꞌoc tkꞌoꞌn il tiꞌj tuꞌn tcub tan txin tucꞌil, oꞌcx te xinak lu cbel byet, aju otok cub tan tucꞌil txin. 26 Atzunte txin miꞌn cub byet, porque mintiꞌ otok tbincha jun il tuꞌn tcyim. Junx taꞌ jlu ic tzaꞌn jun xinak nnoꞌc tzokpaj tiꞌj juntl ex in cub tbyoꞌn, 27 porque otok tzꞌoc noj tiꞌj txin tjunalx taꞌtok tuj cojbil, ex masque jaw schꞌin, pero mi aꞌl jun jacu colin tiꞌj.

28 Ka at jun xinak ma tzꞌoc noj tiꞌj jun txin naꞌnx ttil xinak ex mintiꞌ ttrat tucꞌil juntl tuꞌn tmojeꞌ, ka ma tzꞌoc tkꞌoꞌn il tiꞌj tuꞌn tcub tan txin tucꞌil, ex ka ma che el cnet, 29 ate xinak lu cxel tkꞌoꞌn 50 sak pwak te tman txin; il tiꞌj tuꞌn tjaw t-xuꞌjlaꞌn, porque otok cub tmojban tib tucꞌil, ex miꞌn cub tpaꞌn tib tucꞌil tuj tcyakil tankꞌibl.

30 Mi jun xinak cjawil t-xuꞌjlaꞌn t-xuꞌjil tman, mi tuꞌn tcub tan tucꞌil t-xuꞌjil tman.