2 Aju sicꞌaj cꞌwaꞌl cyucꞌix ke tiyjil che ul itzꞌj te tibajxi, mlayx che oc te tajlal cyxol ke xjal etzan tuꞌn Kman.

3 Ke aj Amón ex ke aj Moab cyucꞌix ke cyiyjil che ul itzꞌj te tibajxi, mintiꞌx cyoclen tuꞌn cyoc te tajlal cyxol ke xjal etzan tuꞌn Kman; 4 porque tej cyicꞌtze tuj cytxꞌotxꞌ cyetzlenxiye tuj Ejipt, mintiꞌ tzaj cykꞌoꞌn aꞌ te cycꞌaye ex mi cywaye; ax icx xi cychjoꞌn twi tcꞌuꞌj Balaam aju tcyꞌajal Beor ex tzajni tuj Petor te Mesopotamia, tuꞌn t-xi tkanin te Dios tuꞌn ttzaj mya baꞌn cyibaje. 5 Pero mintiꞌ tzaj tbiꞌn Kman Dios aju tyol Balaam, nok oꞌcx oc tkꞌoꞌn te jun cyꞌiwbil aju mya baꞌn cyjaꞌtok t-xi tkanin, porque cꞌujlaꞌn keye tuꞌn Dios. 6 Miꞌn mojeꞌ cyyole tuꞌn cytene tuj txubtxaj cyucꞌil tuj tcyakil cyankꞌible.

7 Atzun ke aj Edom, miꞌn che el cyicꞌune porque cyermaniye ke jlu; ax icx miꞌn che el cyicꞌune ke aj Ejipt, porque o che najane tuj cytxꞌotxꞌ. 8 Ke tal cychman ke xjal lu jacu che oc te tajlal cyxol ke xjal etzan tuꞌn Kman.

9 Oc cyexe kꞌojlel cyiꞌj ke aj kꞌoj cyiꞌje, ten cycwente cyiꞌje tuꞌn miꞌn cybinchanteye jun mya baꞌn. 10 Ka at jun cyeye mya sak taꞌ tuꞌn tlaj otok jaw tuj twi ttzꞌaꞌlbil nok tajx tuj twatl, cꞌelex tiꞌjxi campament, ex tuj enter kꞌij mlay tzꞌocx tuj. 11 Octzun toc kax, cbajel ttxꞌjon tib tuꞌn aꞌ; ex oc tex kꞌij, baꞌntzun tuꞌn tocx juntl maj tuj campament.

12 Oc cyxiꞌye txaꞌl, cnetel jun lugar cyuꞌne tiꞌjxi campament, 13 Cyxol cymacbile cxel cyiꞌne jun tzeꞌ, tuꞌntzun tajben tuꞌn tcuꞌx cylacuꞌne jun jul oc cyxiꞌye txaꞌl, ex te tibajxi cyjel cymakuꞌne tuꞌn txꞌotxꞌ. 14 Porque cbetel Kman Dios cyxole tuj campament tuꞌn tcolin cyiꞌje ex tuꞌn cycambane cyiꞌj aj kꞌoj cyiꞌje. Cyjaꞌtzun, il tiꞌj tuꞌn toc cycampamente te jun lugar xjan, tuꞌntzun miꞌn ttil Dios jun tiꞌxti mya baꞌn tuj campament jatum che bel tene, porque ka ma ten jun mya baꞌn cyxole, jacu tzꞌel tpaꞌn tib Dios cyiꞌje.

15 Ka ma tzꞌel ok jun majen twitz tpatrón, ex ka ma pon cyucꞌile, miꞌn tzꞌaj cykꞌoꞌntle te tpatrón tuꞌn taj juntl maj tucꞌil. 16 Cykꞌonxe ambil te tuꞌn tnajan cyucꞌile, nok tuj alcyex tnam at mas tgan tiꞌj, ex tuj alcyex lugar cjawil t-scꞌoꞌn, ex mi aꞌl jun tuꞌn tlabt tiꞌj.

17 Mi jun xuꞌj aj Israel tuꞌn t-xi tkꞌon tib tuj yaẍbil te jun cꞌulbil cywitz ke tilbilal, ic tzaꞌn in bant cyuꞌn ke xjal mya nimal Dios, ex mi jun xinak tuꞌn tyaẍin ax tucꞌil juntl xinak. 18 Miꞌn cyakꞌe ambil tuꞌn tocx tuj tja Kman Dios te chojbil jun yol otok txi tziyan, aju pwak otok cycamba xjal nok tuꞌn cyyaẍbil, porque icꞌun jlu tuꞌn Kman.

19 Miꞌn txi cykanine taꞌl cypwake cxel cykꞌoꞌne te tchꞌex jun cyxjalile, mi tiꞌj jun tiꞌxti baꞌn twanjtz, ex mi tiꞌj nok alcyex jun tiꞌxti. 20 Atzun te stranjer xjal, baꞌn t-xi cykanine tuꞌn ttzaj tkꞌoꞌn taꞌl pwak otok txi cykꞌoꞌne te tchꞌex, pero miꞌn cybinchaye jlu tiꞌj jun cyxjalile, tuꞌntzun cycub cyꞌiwlaꞌne tuꞌn Kman Dios tiꞌj tcyakilju cbantel cyuꞌne tuj txꞌotxꞌ cꞌoquel te cyetzbile.

21 Oc t-xi cytziyane jun yol te Kman Dios, cykꞌonque tilil tuꞌn tjapun naj cyuꞌne, porque ax toc che oquele tuj xjel tuꞌn Kman Dios tiꞌj, ex at cyile tiꞌj ka miꞌn ma japun cyuꞌne. 22 Katzun mintiꞌ ma txi cytziyane jun yol, mintiꞌ cyile tiꞌj jlu; 23 pero ka tuꞌn cyexe cygan ma txi cytziyane jun yol te Kman Dios, japunxtzun cyuꞌne.

24 Oc cyocxe cyxol ke tkan t-uva jun cyucꞌile, baꞌn tuꞌn cyloꞌne tiꞌj uva nok nicꞌpunx cyaje, pero mi jun ctzajel cyiꞌne tuj chiꞌl. 25 Ka ma che ocxe cyxol tkan triw te jun cyucꞌile, baꞌn tuꞌn tjaw cyiꞌne twi triw tuꞌn cykꞌabe tuꞌn cywaꞌne tiꞌj, pero miꞌn jaw cyiꞌne tuꞌn jobl te.