Aju ley te pabl mejebleꞌn
24
Oc tmojeꞌ jun xinak tucꞌil jun xuꞌj, ka te tibajxi mya baꞌn ma tzꞌela tuj twitz tuꞌn tlaj jun tpaltil, baꞌn tuꞌn tcub ttzꞌiban jun uꞌj tuꞌn tcub paꞌt mejebleꞌn; cxel tkꞌoꞌn te xuꞌj ex cꞌelex tlajoꞌn tuj tja. 2 Texlenxi xuꞌj tja tchmilben, jacu mojeꞌ tucꞌil juntl xinak. 3 Katzun ma tzꞌel icꞌun xuꞌj tuꞌn tcabin xinak ex ka ma cub ttzꞌiban jun uꞌj tuꞌn tcub paꞌt mejebleꞌn, ka ma txi tkꞌoꞌn tuj tkꞌab xuꞌj ex ma tzꞌex tlajoꞌn tuj tja; ex ka ma cyim tcabin tchmil, 4 mlay bant tuꞌn tmojeꞌ juntl maj tucꞌil nej tchmil, tuꞌn tlaj otok txi aj tja juntl tchmil, ex tuꞌnju otok tzꞌilix, porque mya baꞌn jlu tuj twitz Kman. Miꞌn baj cytzꞌilsaꞌne cytanmiye aju ctzajel tkꞌoꞌn Kman Dios te cyetzbile.Txkantl ley
5 Ka at jun xinak cꞌitzketok toclen mojeꞌ, miꞌn tzꞌex tuj kꞌoj ex miꞌn cyaj ten te sanjelal tuj enter jun abkꞌi; tuꞌntzun tten tuj tja tuj enter abkꞌi, ex tuꞌn ttzalaj t-xuꞌjil.
6 Miꞌn txi cykanine tcyaꞌ xjal te prent ex mi tal tcyaꞌ, porque a jlu mer ic tzaꞌn acu tchwinklal xjal nneꞌl cyiꞌne te prent.
7 Ka at jun aj Israel ma cnet cyuꞌne in xi telkꞌaꞌn jun t-xjalil tuꞌn toc te tmajen ex ka tuꞌn t-xi tcꞌayin, aju xjal lu il tiꞌj tuꞌn tcub byet, tuꞌntzun tcub naj mya baꞌn cyxole.
8 Atzun tiꞌj txꞌaꞌc mintiꞌ kꞌanbil te, ten cycwente tiꞌj tuꞌn tjapun tcyakilju ctzajel kꞌmaꞌn cyeye cyuꞌn ke pal aj Leví. Il tiꞌj tuꞌn tjapun cyuꞌne ic tzaꞌn o txi nmaꞌne cye. 9 Cynaꞌntze aju tbincha Kman Dios tiꞌj Mariy tuj be, tej otok che etze tuj Ejipt.
10 Ka ma txi cykꞌoꞌne tchꞌex jun cyucꞌile, miꞌn che ocxe tuj tja tuꞌn tetz cyiꞌne jun tiꞌxti te prent; 11 ax che ayone ttxaꞌn peꞌn, ex ax te xjal cꞌeletz kꞌoꞌnte jun prent cyeye. 12 Katzun meba xjal, miꞌn cyaj cytzyuꞌne prent oc toc konicꞌan; 13 cꞌajel cykꞌoꞌne oc tex kꞌij, tuꞌntzun t-xi tbokꞌin tib xjal tuj t-xbalun oc t-xiꞌ tal. Tuꞌntzun jlu ctzajel tkanin xjal tcyꞌiwbil Dios cyibaje, ex baꞌn cꞌelel jlu tuj twitz Kman Dios.
14 Miꞌn cub cyyajlaꞌne jun majen meba ex mintiꞌ at te, ka ax cyxjalile ex ka jun stranjer xjal ax najl cyxole. 15 Biꞌx cychjonxe twi tcꞌuꞌj oc tex kꞌij, porque meba xjal lu, ex in ajben twi tcꞌuꞌj tuꞌn tankꞌin. Ka mintiꞌ ma txi cykꞌoꞌne twi tcꞌuꞌj, cxel tmaꞌn jlu te Dios, ex attzun cyile twitz Dios tiꞌj jlu.
16 Miꞌn che cub byet ke mambaj tuꞌn tlaj cyil cycꞌwaꞌl, ax icx ke cꞌwaꞌlbaj, miꞌn che cub byet tuꞌn tlaj cyil cyman; teylex te junjun cymel tuꞌn tlaj tex til.
17 Miꞌn cybinchaye jun tiꞌxti mya tuj tumel cyiꞌj ke stranjer xjal, mi cyiꞌj ke cꞌwaꞌl mintiꞌ cyman ex cytxuꞌ, ex miꞌn tzaj cyiꞌne te prent t-xbalun jun meba xuꞌj. 18 Miꞌn tzicꞌ tnaꞌl cyuꞌne, ax icx cyeye o che tene te majen tuj Ejipt, ex tuꞌn Kman Dios e etz tzokpiꞌne. Tuꞌntzun jlu in xi nmaꞌne cyeye tuꞌn tjapun tcyakil jlu cyuꞌne.
19 Oc tjaw cychmoꞌne twitz cyawale, ka ma tzicꞌ tnaꞌnjtz tuꞌn ttzaj cyiꞌne jun cheꞌl triw, miꞌn che aje kꞌil te; ax e tcyaj ten tuꞌn tajben cye stranjer xjal ax najl cyxole, cye cꞌwaꞌl mintiꞌ cyman ex cytxuꞌ ex cye meba xuꞌj, tuꞌntzun cycub cyꞌiwlaꞌne tuꞌn Kman Dios tiꞌj tcyakilju cbantel cyuꞌne.
20 Oc t-xi cyyucune tkan olivo tuꞌn tcub twitz, ka ma cyaj junjuntl twitz twi tkan, miꞌn cub cyiꞌntle; ax e tcyaj ten tuꞌntzun tajben cye stranjer xjal ax najl cyxole, cye cꞌwaꞌl mintiꞌ cyman ex cytxuꞌ ex cye meba xuꞌj.
21 Oc tcub twitz cy-uvaye, miꞌn che aje kꞌilte aju otok cyaj ten twi tkan; ax e tcyaj ten, tuꞌntzun tajben cye stranjer xjal ax najl cyxole, cye cꞌwaꞌl mintiꞌ cyman ex cytxuꞌ ex cye meba xuꞌj. 22 Cynaꞌntze, ax icx cyeye o che tene te majen tuj Ejipt. Tuꞌntzun jlu in xi nmaꞌne cyeye tuꞌn tjapun tcyakil jlu cyuꞌne.