25
Ka ma tzaj kꞌoj cyxol cabe xjal, ex ka ma che pon tuj jusgad tuꞌn t-xi binchaꞌn cyiꞌj cyuꞌn ke jwes, atzun ke jwes che kꞌmalte alcye mintiꞌ til, ex cbel cykꞌoꞌn t-sentens aju at til. 2 Ka at tuꞌn tbaj asyalit aju at til, cxel tmaꞌn jwes te tuꞌn tcub mutzeꞌ twitz txꞌotxꞌ, ex twitzx jwes cxel jatoꞌn asyal tiꞌj, ic tzaꞌnx til otok bant. 3 Pero mlay tzicꞌ tibaj 40 asyal tuꞌn t-xiꞌ tiꞌj, porque ka nimxix tcastiw cyermaniye ma cub, jacu tzaj t-ximbetz ka mintiꞌx tajben tuj cywitze.4 Miꞌn tzꞌoc cycꞌaloꞌne ttziꞌ boys in bet tibaj triw tuꞌn tel ttxcꞌomal.
Ley tuꞌn miꞌn tnaj tbi jun xinak otok cyim
5 Ka at cabe xinak cyitzꞌin cyib ex junx najl ke, ka ma cyim jun cye ex mintiꞌ jun tcyꞌajal ma cyaj, mlay mojeꞌ t-xuꞌjil cyimni tucꞌil juntl xinak te tiꞌjxi; ax terman ktzan tchmil cjawil xuꞌjilante te, tuꞌntzun ttzaj tiyjil ktzan terman tuꞌn.
6 Aju tnejel tal xuꞌj kꞌa tzul itzꞌj, ax tbi cꞌoquel ic tzaꞌn tbi ktzan tchmil tuꞌntzun miꞌn tcub naj tbi ktzan tchmil cyxol aj Israel. 7 Katzun tcꞌiꞌ xinak jaw t-xuꞌjlaꞌn t-xuꞌjil ktzan terman, cxeꞌltzun xuꞌj tuj jusgad ex cxel tmaꞌn cye tij xjal te tnam cyjaꞌ: Tcꞌiꞌ nbalque tuꞌn tcyaj ten tbi ktzan terman cyxol aj Israel, ex tcꞌiꞌ jaw mojeꞌ wucꞌile. 8 Ctzajeltzun cytxcoꞌn ke tij xjal te tnam aju xinak lu, ex cxel cykanin te katzun cucx ma cub t-xcꞌayin tib tuꞌn tmojeꞌ tucꞌil t-xuꞌjil ktzan terman, ex ka ma tma: Mlayx chin mojeꞌye tucꞌil xuꞌj lu, ka chi, 9 cxeltzun lakꞌeꞌ t-xuꞌjil ktzan terman tiꞌj, ex cywitz ke tij xjal, cꞌelel tiꞌn xuꞌj t-xajab xinak, cꞌoquex ttzuban xuꞌj tuj twitz, ex cxel tmaꞌn te cyjaꞌ: Atzun in bant tiꞌj ju xinak tcꞌiꞌ mojeꞌ tucꞌil t-xuꞌjil ktzan terman tuꞌn ttzaj tiyjil tuꞌn, chi xuꞌj cxel tmaꞌn. 10 Cyxol aj Israel biꞌx cꞌoquel byaꞌn tbi xinak lu cyucꞌix ke tiyjil: Ke tiyjil xjal mintiꞌ t-xajab toc.
Txkantl ley
11 Ka in che kꞌojin cabe xinak, ka ma pon lakꞌeꞌ t-xuꞌjil jun cye tuꞌn tcolin tiꞌj tchmil, ex ka ma che tzaj ttzyuꞌn ke tbakꞌ aju nnoꞌc cꞌixbisante te tchmil, 12 cꞌeleltzun cytxꞌemine tkꞌab xuꞌj lu, ex miꞌn tzaj tzꞌeꞌy cycꞌuꞌje tiꞌj.
13 Miꞌn tzꞌajben cabe marc cyuꞌne, jun al ex juntl mya al; 14 ex miꞌn tzꞌajben cabe malbil cyuꞌne, jun matij ex juntl mya matij. 15 Nok oꞌcx tuꞌn tajben marc cabalxix cyuꞌne ex malbil tzꞌaklxix, tuꞌntzun cyankꞌine nim abkꞌi tuj txꞌotxꞌ ctzajel tkꞌoꞌn Kman Dios cyeye. 16 Porque cycyakil ke jlu icꞌun tuꞌn Kman ex keju in cybinchaꞌn aju mya tzꞌaklxix.
Aju orden tuꞌn cycub baj ke aj Amalec
17 Cynaꞌntze aju cybincha aj Amalec cyiꞌje tej ateꞌtoke tuj be, cyetzlenxiye tuj Ejipt: 18 E oc tzokpaj cyiꞌje tuj be, ex tcꞌulbacu sicni keye ex mintiꞌtl cyipune, ex e oc tzokpaj cyiꞌj keju lepchix cytzaj; mintiꞌ e xob twitz Dios. 19 Cyjaꞌtzun, oc cyclete tuꞌn Kman Dios cywitz cycyakil aj kꞌoj txolin cyten cyiꞌje, tuj txꞌotxꞌ ctzajel tkꞌoꞌn tuꞌn toc te cyeye, che najel ke aj Amalec cyuꞌne, tuꞌn miꞌn cytzaj naꞌntl tzalu twitz txꞌotxꞌ. Miꞌn tzicꞌ tnaꞌnjtz jlu cyuꞌne.