Oyaj tiꞌj tnejel twitz awal
26
Oc cyocxe tuj txꞌotxꞌ ctzajel tkꞌoꞌn Kman Dios te cyetzbile ex oc cynajane tuj, 2 ctzajel cyiꞌne chꞌin tiꞌj tnejel twitz cyawale, aju tzul tkꞌoꞌn txꞌotxꞌ, ex cxel cyiꞌne tuj jun chiꞌl, tuj lugar cjawil t-scꞌoꞌn Kman Dios te nabl tbi. 3 Che poltzune twitz pal aju in ajben tuj kꞌij lu, ex teyle junjun cxel tmaꞌn te cyjaꞌ: Cxel nmaꞌne twitz Kman Dios jaꞌlo, o chin octze tuj txꞌotxꞌ tzaj ttziyan Kman cye kxeꞌchel tuꞌn ttzaj tkꞌoꞌn ke. 4 Cꞌicꞌeltzun tiꞌn pal aju chiꞌl tuj cykꞌabe ex cbel tkꞌoꞌn twitz t-altar Kman Dios, 5 atzun cyeye cxel cymaꞌne twitz Kman Dios cyjaꞌ:Aj Arameytok ke nxeꞌchele nej, mya nimtok cybet ex betin xjaltok ke. E pon tuj Ejipt ex ax e cyaj ten najal. Te tibajxi e oc te jun nasyon matijxix at tipun ex nim cyajlal.
6 Pero o cybincha aj Ejipt nim mya baꞌn cyiꞌj, e baj yajlaꞌn cyuꞌn, ex cub cykꞌoꞌn akꞌuntl cyuwxix cyibaj.
7 E cubsantzun twitz Kman aju Cydios kxeꞌchel tuꞌn tonin cyiꞌj; tzaj tbiꞌn cykanbetz, tzaj tqueꞌyin cymebayil ex akꞌuntl cyuwxix tcubtok cyibaj, tucꞌix yajbil cye,
8 e etz kꞌiꞌn tuꞌn Kman tuj Ejipt tuꞌn tipumal maꞌxix, tucꞌil xobajil nimxix, cyucꞌix ke techal ex ke binchben nim cyipumal;
9 e ul kꞌiꞌn tuꞌn tuj lugar lu ex o tzaj tkꞌoꞌn txꞌotxꞌ lu te cye, jun txꞌotxꞌ kꞌinunxix ex tbanilxix.
10 Tuꞌntzun jlu ma tzaj wiꞌne aju tnejel twitz awal ma jaw nchmoꞌne twitz txꞌotxꞌ, aju o tzaj tkꞌoꞌn Kman weye, che chicuye txi cymaꞌne.
Cbeltzun cykꞌoꞌne chiꞌl twitz Kman Dios, ex che bel ẍmejeꞌye cꞌulul te. 11 Te tibajxi cbel cyicꞌsaꞌne jun ninkꞌij, junx cyucꞌil aj Leví ex ke stranjer xjal najl cyxole, tiꞌj tcyakilju otok tzaj tkꞌoꞌn Kman Dios cyeye ex cye keju ateꞌ tuj cyjaye.
Aju tlajiꞌn tuꞌn t-xi kꞌot tiꞌj tcyakil
12 Octzun tjapun toxin abkꞌi, aju abkꞌi tuꞌn t-xi kꞌot tlajiꞌn tiꞌj tcyakil, cꞌelel tpaꞌn teyle junjun cyeye tlajiꞌn tiꞌj tcyakil twitz tawal, ex cxel tkꞌoꞌn cye aj Leví ex cye stranjer xjal najl cyxole, cyucꞌix cye cꞌwaꞌl mintiꞌ cyman ex cytxuꞌ ex cye meba xuꞌj, tuꞌntzun cywaꞌn tiꞌj tuj cytanmiye nok nicꞌpun cyajbil. 13 Cxeltzun cymaꞌne twitz Kman Dios cyjaꞌ:
Ma tzꞌel npaꞌne chꞌin tiꞌj twitz wawale at tuj njaye, tuꞌn tajben teya, ex ma baj nsipane cye aj Leví ex cye stranjer xjal najl tuj ntanmiye, cyucꞌix cye cꞌwaꞌl mintiꞌ cyman ex cytxuꞌ ex cye meba xuꞌj, ex ma japun wuꞌne tcyakilju tzaj tmaꞌna weye; mintiꞌ ma chin icꞌe cyibaj tmandamyenta, ex mintiꞌ ma tzicꞌ cynaꞌl wuꞌne.
14 Mintiꞌ o chin waꞌne tiꞌj tej atintoke tuj bis tiꞌj jun cyimni, mintiꞌ o chin waꞌne tiꞌj tej tzꞌiltok kine, ex mintiꞌ o txi woyine cye cyimni. Nman Dios, ma txi nnimane tyola ex ma japun wuꞌne tcyakilju tzaj tmaꞌna weye.
15 Ko tqueꞌyintza tuj tnajbila xjan max tuj cyaꞌj, ex cyꞌiwlan cuba ke aj Israel akeju etzan tuꞌna, tucꞌix txꞌotxꞌ aju tzaj tkꞌoꞌna keye, ic tzaꞌnx xi ttziyana cye kxeꞌchele. Aju txꞌotxꞌ lu kꞌinunxix ex tbanilxix, che chicuye.
Ke aj Israel jun cꞌloj xjal paꞌmaj tuꞌn cyajben oꞌcx te Dios
16 In tmaꞌn Kman Dios cyeye jaꞌlo tuꞌn cyjapun ke ley ex ke mandamyent lu cyuꞌne. Ten cycwente cyiꞌje tuꞌn cyjapun cyuꞌne tuꞌn tcyakil cyanmiye ex tuꞌn tcyakil cycꞌuꞌje. 17 Ma txi cytziyane jaꞌlo ka ate Kman Cydiose, ex ka cucx tuꞌn cyxi lpeꞌye tiꞌj, cucx tuꞌn t-xi cynimane te jumajx, ex cucx tuꞌn cyjapun ke tley, ke tmandamyent ex ke tcawbil cyuꞌne. 18 Ax icx ma tzaj tmaꞌn Kman cyeye jaꞌlo, ka akeye aj Israel jun cꞌloj xjal etzan tuꞌn ex oꞌcx tecuxix ic tzaꞌnx o tzaj ttziyan cyeye, ex ma tma tuꞌn cyjapun cycyakil ke tmandamyent cyuꞌne. 19 Tuꞌn Kman che oquel kꞌoꞌne te jun nasyon maꞌxix toclen cywitz ke mastl nasyon o che bant tuꞌn, tuꞌntzun cyjaw nimsaꞌne, tuꞌn cyyolin xjal baꞌn cyiꞌje, ex tuꞌn tten nimbil cyeye; ex che oquele te jun cꞌloj xjal paꞌmaj tuꞌn cyajbene oꞌcx te, ic tzaꞌnx o tma.