—Japunx cyuꞌne tcyakilju cxel nmaꞌne cyeye jaꞌlo. 2 Oc cyicꞌxe jlajxi nima Jordán ex oc cyocxe tuj txꞌotxꞌ ctzajel tkꞌoꞌn Kman Dios cyeye, bix che jaw cywabane txkan abj nmak, ex cꞌoquel cykꞌoꞌne taꞌl txun cyiꞌj, 3 tuꞌntzun cyoc tzꞌibet cyiꞌj ke abj lu cycyakil ke xnakꞌtzbil o cheꞌx nmaꞌne cyeye. Cybinchame jlu oc cyocxe tuj txꞌotxꞌ kꞌinunxix ex tbanilxix aju ctzajel tkꞌoꞌn Kman Dios cyeye, ic tzaꞌnx o tzaj ttziyan cye cyxeꞌchele. 4 Cyjaꞌtzun, cyicꞌxlenxiye tuj nima Jordán, che jawil cywabane twi witz Ebal ke abj ma txi nmaꞌne cyeye, ex cꞌoquel cykꞌoꞌne taꞌl txun cyiꞌj. 5 Atzun cjawil cybinchaꞌne jun altar puro abj te Kman Dios; miꞌn tzꞌel xpeꞌlit cyiꞌj, 6 enterx ke abj che ajbel. Tibajtzun altar lu, cbel cykꞌoꞌne aju oyaj patun in cub te Kman Dios, 7 tucꞌix chojbil te mojbabl tibil, ex atzun che waꞌle ma chixin ex cbel cyicꞌsaꞌne ninkꞌij twitz Kman Dios. 8 Bix che oc cytzꞌibane clarxix cyiꞌj ke abj lu ke xnakꞌtzbil ma cheꞌx nmaꞌne cyeye jaꞌlo.

9 Atzunte Moisés, cyucꞌix ke pal aj Leví akeju ateꞌtok tucꞌil, xi tmaꞌntl cye aj Israel cyjaꞌ:

—Akeye aj Israel, che txulecuye ex cybintze. Jaꞌlo ma che oque te jun cꞌloj xjal etzan tuꞌn Kman Dios. 10 Tuꞌntzun jlu, cynimanxe ex che japunx ke tmandamyent ex ke tley cyuꞌne, akeju in cheꞌx nmaꞌne cyeye jaꞌlo.

11 Ax kꞌij xi tmaꞌn Moisés jun orden cye xjal cyjaꞌ:

12 Cyicꞌxlenxiye tuj nima Jordán, che bel ten ke tiyjil Simeón, ke tiyjil Leví, ke tiyjil Judá, ke tiyjil Isacar, ke tiyjil José ex ke tiyjil Benjamín twi witz Gerizim kanil cyꞌiwbil cyibaj xjal. 13 Atzun ke tiyjil Rubén, ke tiyjil Gad, ke tiyjil Aser, ke tiyjil Zabulón, ke tiyjil Dan ex ke tiyjil Neftalí che bel ten twi witz Ebal, tuꞌntzun cymante aju mya baꞌn tzul cyibaj xjal miban che niman. 14 Atzun cye aj Leví cxel cymaꞌn cye cycyakil aj Israel tuꞌn tkꞌajkꞌajel cywiꞌ cyuwxix ke yol lu:

15 Tzajxwit mya baꞌn tibaj ju xjal cbel binchante jun tilbilal ex cꞌoquex tewan, ka jsoꞌn otok cub tuꞌn, ka xpeꞌlin otok bant ex ka tiꞌj cꞌuxbil otok cub ulj tuj kꞌakꞌ, binchamaj ke tuꞌn jun xjal at tnabl tiꞌj tuꞌn tbinchante, porque a jlu icꞌun tuꞌn Kman. Ex cycyakil xjal cxel cytzakꞌweꞌn: Icxwitju.

16 Cxel cymaꞌntl aj Leví: Tzajxwit mya baꞌn tibaj ju xjal cꞌelel icꞌunte tman ex ka ttxuꞌ. Ex cycyakil xjal cxel cytzakꞌweꞌn: Icxwitju.

17 Cxel cymaꞌntl aj Leví: Tzajxwit mya baꞌn tibaj ju xjal cbajel chꞌexpunte tmojonil ttxꞌotxꞌ tvesin tuꞌn tel telkꞌaꞌn. Ex cycyakil xjal cxel cytzakꞌweꞌn: Icxwitju.

18 Cxel cymaꞌntl aj Leví: Tzajxwit mya baꞌn tibaj ju xjal cꞌelel tzpet-sante jun moẍ tiꞌj tbe. Ex cycyakil xjal cxel cytzakꞌweꞌn: Icxwitju.

19 Cxel cymaꞌntl aj Leví: Tzajxwit mya baꞌn tibaj ju xjal mintiꞌ in xi tbinchaꞌn tiꞌj jun stranjer xjal, ex ka tiꞌj jun meba xuꞌj ex ka tiꞌj jun cꞌwaꞌl mintiꞌ tman ex ttxuꞌ. Ex cycyakil xjal cxel cytzakꞌweꞌn: Icxwitju.

20 Cxel cymaꞌntl aj Leví: Tzajxwit mya baꞌn tibaj ju xinak cbel tan tucꞌil t-xuꞌjil tman, porque tuꞌn jlu cbel tkꞌoꞌn tchꞌixwi tman. Ex cycyakil xjal cxel cytzakꞌweꞌn: Icxwitju.

21 Cxel cymaꞌntl aj Leví: Tzajxwit mya baꞌn tibaj ju xjal cꞌoquel ten tiꞌj jun alumaj. Ex cycyakil xjal cxel cytzakꞌweꞌn: Icxwitju.

22 Cxel cymaꞌntl aj Leví: Tzajxwit mya baꞌn tibaj ju xjal cbel tan tucꞌil tanb, masque oꞌcx cyman junx ex ka cytxuꞌ. Ex cycyakil xjal cxel cytzakꞌweꞌn: Icxwitju.

23 Cxel cymaꞌntl aj Leví: Tzajxwit mya baꞌn tibaj ju xinak cbel tan tucꞌil xuꞌj tjiꞌ. Ex cycyakil xjal cxel cytzakꞌweꞌn: Icxwitju.

24 Cxel cymaꞌntl aj Leví: Tzajxwit mya baꞌn tibaj ju xjal cbel tbyoꞌn jun tucꞌil tuj ewaj. Ex cycyakil xjal cxel cytzakꞌweꞌn: Icxwitju.

25 Cxel cymaꞌntl aj Leví: Tzajxwit mya baꞌn tibaj ju xjal ctzajel cꞌmonte pwak tuꞌn tcub tbyoꞌn jun xjal mintiꞌ til. Ex cycyakil xjal cxel cytzakꞌweꞌn: Icxwitju.

26 Cxel cymaꞌntl aj Leví: Tzajxwit mya baꞌn tibaj ju xjal miꞌn cheꞌx tniman ke ley lu, ex ka miꞌn ma che japun tuꞌn. Ex cycyakil xjal cxel cytzakꞌweꞌn: Icxwitju.