2 Kꞌmanxa cye aj Israel tuꞌn t-xi cykꞌoꞌn junjun tnam ateꞌ tuj cytxꞌotxꞌ te cye aj Leví, tuꞌntzun cynajan cyuj, ax icx tuꞌn t-xi cykꞌoꞌn ke cywabl alumaj ateꞌ cyiꞌjele tnam. 3 Atzun che najal aj Leví cyuj tnam lu, atzun ke cywabl alumaj ateꞌ cyiꞌjele tnam che ajbel te cywacẍ ex mastl cyalun. 4 Aju cywabl alumaj cxel cykꞌoꞌne, cxel keꞌ tiꞌjele muro toc tiꞌj tnam, winkin ech twitz, 5 ex aju tnukbil tuj tumlal tjawitz kꞌij 40 ech tuꞌn tcyakilx, ax icx 40 ech tnukbil tuj tumlal telex kꞌij, 40 ech tnukbil tuj tumlal tbankꞌab kꞌij ex 40 ech tnukbil tuj tumlal tnayaj kꞌij, ex aju tnam cyjel ten tuj tmij; atzunju cywabl alumaj cyjel ten tiꞌjele tnam.

6 Cyxol ke tnam cxel cykꞌoꞌne cye aj Leví, cꞌoquel kak tnam te cycolbil cyib xjal, jatum baꞌn tuꞌn tpon tclon tib jun xjal otok cub byonte jun xjal. Ax icx cxel cykꞌoꞌntle 42 tnam cye aj Leví. 7 Tuꞌn tcyakilx, 48 tnam cxel cykꞌoꞌne cye aj Leví, cyucꞌix cywabl alumaj at cyiꞌjele. 8 Oc t-xi cykꞌoꞌn aj Israel ke tnam cye aj Leví, teyle junjun cꞌloj cyiyjil aj Israel cxel cykꞌoꞌn ic tzaꞌnx ma cycꞌam: Cyiꞌj ke txꞌotxꞌ mas nim, ax nim tnam cxel cykꞌoꞌn, ex cyiꞌj ke txꞌotxꞌ mas nicꞌxi, ax nicꞌxi tnam cxel cykꞌoꞌn.

9 Tzaj yolin Kman tucꞌil Moisés ex tma:

10 Kꞌmanxa cye aj Israel cyjaꞌ: Oc cyicꞌxe jlajxi nima Jordán tuꞌn cypone tuj txꞌotxꞌ Canaán, 11 cjawil cyscꞌoꞌne junjun tnam tuꞌn tajben te cycolbil cyib xjal, jatum tuꞌn tpon tclon tib jun xjal nok minaben otok cub tbyoꞌn jun xjal ex mya ximamaj tuꞌn. 12 Atzun tuꞌn tclet cywitz ke terman cyimni, ka cyaj tuꞌn t-xelin cyuꞌn tiꞌj, ex mlay cyim ka naꞌnxtok toc tuj xjel cyuꞌn tnam xjal. 13 Cyxol ke tnam cxel cykꞌoꞌne cye aj Leví cjawil cyscꞌoꞌne kak tuꞌn tajben te cycolbil cyib xjal. 14 Ox ctel tuj tumlal tjawitz kꞌij te nima Jordán ex ox tuj txꞌotxꞌ Canaán. 15 Ake kak tnam lu che ajbel te cycolbil cyib xjal, tzaꞌnx cye aj Israel ax icx cye stranjer xjal ax najl cyxole, ex ke betin xjal. Atzun baꞌn tuꞌn tpon cyclon cyib cycyakil keju minaben otok cub jun xjal cyuꞌn ex mya ximamaj cyuꞌn.

16 Ka at jun ma tzꞌoc cꞌixbisante juntl tuꞌn jun macbil cꞌuxbil, ex ka ma cyim aju otok cꞌixbi, byoꞌntzun otok cub, ex aju otok cub byonte te il tiꞌj cbel byet.

17 Ka at jun ma tzꞌoc cꞌixbisante juntl tuꞌn jun abj, ex ka ma cyim aju otok cꞌixbi, byoꞌntzun otok cub, ex aju otok cub byonte te il tiꞌj cbel byet.

18 Ka at jun ma tzꞌoc cꞌixbisante juntl tuꞌn jun tzeꞌ, ex ka ma cyim aju otok cꞌixbi, byoꞌntzun otok cub, ex aju otok cub byonte te il tiꞌj cbel byet. 19 Aju xjal mas at-xix t-xilen tucꞌil ktzan cyimni, atzunte at toclen tuꞌn tcub byonte aju xjal otok cub byonte ktzan cyimni, nok jatum oc toc noj tiꞌj.

20 Ka at jun ma txi lamonte jun tucꞌil tuꞌnju in kꞌojl tiꞌj, ex ka ma txi t-xoꞌn jun tiꞌxti tiꞌj, tucꞌil t-ximbetz mya baꞌn, 21 ex ka tuꞌn tlaj kꞌoj tcub cyxol cꞌoquel tboquin cyuꞌn ke tkꞌab, ex ka ma cyim aju otok cꞌixbi, iltzun tiꞌj cbel byet aju otok baj cꞌixbisante te, porque byol xjal te. Aju xjal mas at-xix t-xilen tucꞌil ktzan cyimni, atzunte at toclen tuꞌn tcub byonte aju xjal otok cub byonte ktzan cyimni, nok jatum oc toc noj tiꞌj.

22 Katzun at jun nok minaben cxel tlamoꞌn jun tucꞌil, mya tuꞌnju at kꞌoj cyxol ex ka nok minaben ma txi t-xoꞌn jun tiꞌxti tiꞌj, mya tucꞌil t-ximbetz mya baꞌn, 23 ex ka miꞌn ma til oc t-xi t-xoꞌn jun abj, ex ka ma cyim jun xjal tuꞌn, ex mya cyajkꞌoj cyib, ex mya tuꞌnju tajbil tuꞌn tbinchante jun mya baꞌn tiꞌj, 24 entons ic che oquel tnam xjal ic tzaꞌn jwes teju xjal otok cub jun xjal tuꞌn, tucꞌil xjal at t-xilen ktzan cyimni tucꞌil aju taj tuꞌn t-xelin tuꞌn tiꞌj xjal otok biyun, ic tzaꞌnx in cymaꞌn ke ley lu. 25 Ake tnam xjal che colol tiꞌj xjal otok biyun, tuꞌn miꞌn t-xelin tiꞌj tuꞌnju xjal at t-xilen ktzan cyimni tucꞌil, ex cꞌoquel cycwentin oc taj meltzꞌaj tuj tnam te cycolbil cyib xjal jatum otok pon tclon tib. Aju otok biyun ax ctel ma chixin, ex maxi cꞌeletz ocxi tcyim tnejel pal aju otok baj xjansaꞌn tuꞌn aseyt. 26 Katzun ma tzꞌetz ju byol xjal tiꞌjxi tmojonil txꞌotxꞌ te tnam te cycolbil cyib xjal, 27 ex ka ma tzꞌoc noj xjal tiꞌj, aju at t-xilen ktzan cyimni tucꞌil, ex ka ma cub byoꞌn tuꞌn, entons mintiꞌ til tiꞌj. 28 Aju xjal otok biyun, ax tuꞌn tten tuj tnam te cycolbil cyib xjal ocxi tcyim tnejel pal, ex te tibajxi baꞌn tuꞌn taj juntl maj tuj ttxꞌotxꞌ.

29 Atzun ley lu cyjel ten cyucꞌile te jumajx tuꞌn tajben cyeye ex wikinwik tuꞌn tcyaj cymaꞌne cye cycꞌwaꞌle, nok jatum che tele.

30 Oꞌcx tuꞌn cyyol cabe ex ka mastl testiw jacu cub t-sentens jun byol xjal tuꞌn tcyim. Mlay bant tuꞌn tcub t-sentens jun byol xjal tuꞌn tcyim nok tuꞌn tyol junx testiw.

31 Miꞌn txi cycꞌmoꞌne pwak tuꞌn tcolpet jun byol xjal ka otok cub t-sentens tuꞌn tcyim; aju xjal lu, il tiꞌj tuꞌn tcyim.

32 Miꞌn txi cycꞌmoꞌne pwak te jun byol xjal otok pon tclon tib tuj jun tnam te cycolbil cyib xjal, ka taj tuꞌn taj tuj ttxꞌotxꞌ naꞌnxtok tcyim aju nejenel cye pal.

33 Miꞌn baj cytzꞌilsaꞌne txꞌotxꞌ jatum che najale, porque tuꞌn cycamic xjal che bel byoꞌn, ctzꞌilixtel txꞌotxꞌ, ex mlay sakix txꞌotxꞌ tuꞌn pwak, nok oꞌcx csakixtel tuꞌn tchcꞌel xjal otok biyun.

34 Miꞌn baj cytzꞌilsaꞌne txꞌotxꞌ jatum che najale ex jatum chin najale, porque akine Cymane najl kine cyxol aj Israel, chi Kman te Moisés.