Ke tmojonil txꞌotxꞌ
34
Tzaj yolin Kman tucꞌil Moisés ex tma:2 Kꞌmanxa cye aj Israel cyjaꞌ: Oc cypone tuj txꞌotxꞌ Canaán aju txꞌotxꞌ cꞌoquel te cyetzbile, atzun ke tmojonil jlu:
3 Aju tmojonil tuj tumlal tnayaj kꞌij, atzun cmojonil tib tucꞌil tzkij txꞌotxꞌ Zin ex tucꞌil txꞌotxꞌ Edom. Atzun ctzajel keꞌ tmojonil tuj tnayaj kꞌij ttxaꞌnpun mar at Nim Atzꞌan Tuj, tumlal tjawitz kꞌij, 4 cꞌelex tuj tnayaj kꞌij tuꞌn tex tcꞌuꞌj witz Acrabim, tuꞌn tex tuj lugar tzkij txꞌotxꞌ Zin ex tuꞌn tpon max Cades-barnea, tuꞌn ticꞌtl tuꞌn tpon Hasar-adar, tuꞌn tpon tuj Asmón, 5 tuꞌn ticꞌtl tuj Asmón, tuꞌn tpon max ttzi tkꞌab xak tmojonil Ejipt ex atzun cpol baj ttzi Nintz mar.
6 Aju tmojonil tuj tumlal telex kꞌij, atzun Nintz mar.
7 Aju tmojonil tuj tumlal tbankꞌab kꞌij, atzun jlu: Ctzajel keꞌ max ttzi Nintz mar tuꞌn tjapun twi witz Hor, 8 ex cꞌoquetz twi witz Hor tuꞌn tpon ttzi tnam Hamat, ex tuꞌn ticꞌtl tuꞌn tpon tuj Zedad. 9 Ctzajelx tuj lugar Zedad tuꞌn tpontl max tuj Zifrón ex atzun cpol baj tuj lugar Hazar-enán. Ex atzun tmojonil txꞌotxꞌ lu tuj tumlal tbankꞌab kꞌij.
10 Aju tmojonil tuj tumlal tjawitz kꞌij ctzajel keꞌ tuj lugar Hazar-enán, tuꞌn tpon max tuj lugar Sefam, 11 tuꞌn ticꞌtl tuj lugar Sefam, tuꞌn tpontl tuj tnam Ribla, tuj tumlal tjawitz kꞌij te lugar Aín; ex atzun cbeletz tuꞌn tcuꞌpun tuj tumlal tjawitz kꞌij te lagun Cineret, 12 cbeletz ttziꞌyile nima Jordán ex atzun cpol baj ttzi mar at Nim Atzꞌan Tuj.
Atzun ke lugar lu tmojonil cytxꞌotxꞌe, chi Kman te Moisés.
Tej tbaj sipet txꞌotxꞌ
13 Xitzun tmaꞌn Moisés cye aj Israel cyjaꞌ:
—Atzun txꞌotxꞌ lu cbajel cysipane tuꞌn swert; aju o tma Kman tuꞌn t-xi kꞌot cye belaj cꞌloj tucꞌ mijtl cyiyjil aj Israel, 14 porque akeju tiyjil Rubén, cyucꞌix tiyjil Gad ex mij tiyjil Manasés ma cycꞌam cyetzbil ic tzaꞌnx junjun cꞌloj cyiyjil. 15 Akeju cabe cꞌloj tucꞌ mij cyiyjil aj Israel lu ma cycꞌam cyetzbil tuj tumlal tjawitz kꞌij te nima Jordán, aju txꞌotxꞌ tcubsaꞌn tumlal twitz Jericó.
16 Tzaj yolin Kman tucꞌil Moisés ex tma:
17 Akeju che bel sipante txꞌotxꞌ cyxole, atzun ke jlu: Pal Eleazar ex Josué aju tcyꞌajal Nun. 18 Ax icx cꞌoquel cykꞌoꞌne jun nejenel cye teyle junjun cꞌloj cyiyjil aj Israel, tuꞌn tcub sipet txꞌotxꞌ, 19 ex atzun cybi ke xinak lu:
Tiꞌj tiyjil Judá: Atzun Caleb aju tcyꞌajal Jefone.
20 Tiꞌj tiyjil Simeón: Atzun Semuel aju tcyꞌajal Amiud.
21 Tiꞌj tiyjil Benjamín: Atzun Elidad aju tcyꞌajal Quislón.
22 Tiꞌj tiyjil Dan: Atzun Buqui, aju toc te nejenel, aju tcyꞌajal Jogli.
23 Cyiꞌj ke cyiyjil cabe tcyꞌajal José: Atzun Haniel aju tcyꞌajal Efod toc te nejenel cye tiyjil Manasés; 24 atzunte Kemuel aju tcyꞌajal Siftán toc te nejenel cye tiyjil Efraín.
25 Tiꞌj tiyjil Zabulón: Atzun Elizafán toc te nejenel aju tcyꞌajal Parnac.
26 Tiꞌj tiyjil Isacar: Atzun Paltiel toc te nejenel aju tcyꞌajal Azán.
27 Tiꞌj tiyjil Aser: Atzun Ahiud toc te nejenel aju tcyꞌajal Selomi.
28 Tiꞌj tiyjil Neftalí: Atzun Pedael toc te nejenel aju tcyꞌajal Amiud.
29 Cyetzun ke jlu xi tmaꞌn Kman tuꞌn tcub sipet txꞌotxꞌ Canaán cyxol aj Israel.