2 —O tzaj tmaꞌn Kman teya, aya Tat Moisés, tuꞌn tcub t-sipana txꞌotxꞌ tuj swertin cyxol aj Israel. Ax icx o tzaj tmaꞌn Kman teya ka aju txꞌotxꞌ attok toquel te Zelofehad, aju junx kiyjile tucꞌil, baꞌn tuꞌn t-xi kꞌot cye ke tmeꞌjel. 3 Pero ka ma che mojeꞌ ke xuꞌj lu cyucꞌil ke xinak cyxol juntl cꞌloj cyiyjil aj Israel, entons aju txꞌotxꞌ o cycꞌam mlay tzꞌoctl te tajlal tucꞌil cytxꞌotxꞌ ke kiyjile, nok oꞌcx cꞌoquel te tajlal tucꞌil cytxꞌotxꞌ cyiyjil keju che mojebl cyucꞌil, ex tuꞌntzun jlu cꞌelel cyiꞌn jun piẍ ktxꞌotxꞌe aju ma tzaj kꞌoꞌn te ketzbile. 4 Ex oc tul canun aju abkꞌi te tzokpibl cye aj Israel, aju cytxꞌotxꞌ ke xuꞌj lu biꞌxlo cꞌajel tuj cycwent juntl cꞌloj cyiyjil aj Israel, ex ya mlay tzꞌoctl te tajlal tucꞌil cytxꞌotxꞌ kiyjile, che chi.

5 Atzunte Moisés xi tmaꞌn cye aj Israel aju tzaj tmaꞌn Kman te cyjaꞌ:

—Ax toc aju in cymaꞌn ke tiyjil José. 6 Ctzajel tkꞌoꞌn Kman ambil tuꞌn cymojeꞌ ke tmeꞌjel Zelofehad nok al ucꞌilx cyajbil, pero ax cyucꞌil ke tiyjil cyman, 7 tuꞌntzun miꞌn t-xi kꞌot jun piẍ cytxꞌotxꞌ jun cꞌloj cyiyjil aj Israel cye juntl cꞌloj; cyjaꞌtzun cycyakil aj Israel che tel tuj cyex cyetzbil cyxolx cyiyjil. 8 Ka at jun xuꞌj nok alcyex tiyjil, ma tcꞌam jun piẍ txꞌotxꞌ te tetzbil, il tiꞌj tuꞌn tmojeꞌ tucꞌilx jun xinak junx tiyjil tucꞌil, tuꞌntzun cyten teyle junjun aj Israel tuj cyetzbil oc cycꞌmaꞌ te cyman. 9 Mi jun piẍ txꞌotxꞌ cye jun cꞌloj aj Israel cꞌajel cyucꞌil juntl cꞌloj. Teyle junjun cꞌloj aj Israel cꞌoquel cycwentin aju txꞌotxꞌ oc cycꞌmaꞌ.

10 Cybinchatzun ke tmeꞌjel Zelofehad ic tzaꞌnx otok tma Kman te Moisés. 11 Cyjaꞌtzun o che mojeꞌ Maala, Tirsa, Hogla, Milca ex Noa cyucꞌil ke cycyꞌajal terman ktzan cyman. 12 E mojeꞌ cyucꞌil tiyjil Manasés aju tcyꞌajal José. Cyjaꞌtzun aju cyetzbil ax o ten cyxol ke tiyjil ktzan cyman.

13 Atzun ke ley lu tzaj tmaꞌn Kman te Moisés tuꞌn t-xi tmaꞌn cye aj Israel cyuj tchkꞌajlajil txꞌotxꞌ Moab, aju tcubsaꞌn ttzi nima Jordán tumlal twitz tnam Jericó.