Jaw cyscꞌoꞌn aj Israel ke tnam te cycolbil cyib
20
Tzajtzun tmaꞌn Kman te Josué cyjaꞌ: 2 Kꞌmanxa cye aj Israel tuꞌn tjaw cyscꞌoꞌn ke tnam te cycolbil cyib, ic tzaꞌnx xi nmaꞌne te Moisés. 3 Ka at jun ma cub byonte jun xjal ex ka mya ximamaj tuꞌn tuꞌn tcub tbyoꞌn, baꞌntzun tuꞌn t-xi ok clolte tib tuj jun cye keju tnam lu, tuꞌntzun miꞌn t-xelin tiꞌj tuꞌn terman ktzan cyimni. 4 Oc tpon ok jun xjal clolte tib tuj jun cye keju tnam lu, cbel weꞌ ttzi tpwertil tnam ex cxel tmaꞌn cye ke cytijil xjal te tnam ti otok tbincha. Cꞌoquextzun cꞌmoꞌn cyuꞌn ke cytijil xjal te tnam, ex cxel cykꞌoꞌn jun lugar te tuꞌn tnajan junx cyucꞌil. 5 Ex ka ma tzꞌoc lpeꞌ terman ktzan cyimni tiꞌj ju biyul tuꞌn tcub tuꞌn, pero mlay txi kꞌoꞌn tuj tkꞌab cyuꞌn ke cytijil xjal te tnam, porque mya ximamaj tuꞌn tuꞌn tcub tbyoꞌn aju tucꞌil ex mintiꞌ tkꞌoj tiꞌj. 6 Pero aju xjal otok pon tclon tib, ax cyjel ten tuj tnam ocxi toc tuj xjel cywitz cycyakil tnam xjal, ex ocxi tcyim tnejel pal aju at tuj tkꞌijlalil oc tpon ok xjal tuj tnam. Maxitzun baꞌn tuꞌn taj byol xjal tuj ttanmi ex tuj tja tuj tnam jatum otok tzꞌetz ok, chi Kman te Josué.7 Jawtzun cyscꞌoꞌn aj Israel ke tnam lu te cycolbil cyib xjal: Tnam Cedes aju tcubsaꞌn cyuj ke tiwitz txꞌotxꞌ cye aj Neftalí tuj Galiley, tucꞌix tnam Siquem aju tcubsaꞌn tuj tiwitz txꞌotxꞌ cye aj Efraín, ex tnam Quiriat-arba, aju ax juntl tbi Hebrón, aju tcubsaꞌn tuj tiwitz txꞌotxꞌ cye aj Judá. 8 Atzun taj jlajxi nima Jordán, tuj chkꞌajlaj te tzkij txꞌotxꞌ tuj tjawitz kꞌij te Jericó, atzun ke tnam lu e jaw cyscꞌoꞌn: Tnam Beser aju tcubsaꞌn cyxol ke tiyjil Rubén; tucꞌix tnam Ramot aju tcubsaꞌn cyxol tiyjil Gad tuj txꞌotxꞌ Galaad, ex tnam Golán aju tcubsaꞌn cyxol ke tiyjil Manasés. 9 Atzun ke tnam lu jaw cyscꞌoꞌn te cycolbil cyib xjal, tuꞌn tajben cye aj Israel ex cye stranjer xjal najl cyxol. Atzun tuꞌn tpon tclon tib aju xjal in cub byonte jun tucꞌil, ka mya ximamaj tuꞌn tuꞌn tcub tbyoꞌn, tuꞌntzun miꞌn t-xelin tiꞌj tuꞌn terman ktzan cyimni, ex tuꞌn miꞌn tcub byoꞌn naꞌnxtok toc tuj xjel cyuꞌn tnam xjal.