10 Aju toxin piẍ txꞌotxꞌ jaw swert tiꞌj, atzun oc te cye teyle junjun cꞌloj tiyjil Zabulón. Aju tmojonil cytxꞌotxꞌ ponin max tuj lugar Sarid tbi, 11 xiꞌyintl tuj telex kꞌij tuꞌn tpon max tuj lugar Marala ex icꞌnitl tuꞌn tpon tuj lugar Dabeset, tuꞌntzun tpon baj ttzi tkꞌab xak tcubsaꞌn tumlal tnam Jocneam. 12 Aju mojon xiꞌyin tuj lugar Sarid cyjaꞌ in xiꞌ tuj tjawitz kꞌij tuꞌn tpon max tuj lugar Quislot-tabor, ex atzun nnicꞌ tuj lugar Daberat ex jawnix tuꞌn tjapun tuj lugar Jafía. 13 Ex atzun xiꞌyintl mojon tuj tjawitz kꞌij te lugar Gat-hefer, icꞌni tuj lugar Ita-cazín tbi, ponin max tuj tnam Rimón, ex atzun in kꞌon welt tuj lugar Nea. 14 Aju tmojonil tuj tbankꞌab kꞌij, atzun in kꞌon welt max tuj lugar Hanatón, ex atzun nnoꞌcpun baj tuj tchkꞌajlajil txꞌotxꞌ Jefte-el. 15 Attok cablaj tnam tuj txꞌotxꞌ lu, cyucꞌix ke aldey ateꞌ cyiꞌjele, cyvesin cyib cyucꞌil, ex ajun ke tnam lu ateꞌ cyxol: Catat, Naalal, Simrón, Idala ex Belén. 16 Atzun txꞌotxꞌ lu oc te cye teyle junjun cꞌloj tiyjil Zabulón, cyucꞌix ke tnam ateꞌ cyuj ex cyucꞌix ke aldey ateꞌ cyiꞌjele.

17 Aju tcyajin piẍ txꞌotxꞌ jaw swert tiꞌj, atzunju oc te cye teyle junjun cꞌloj tiyjil Isacar, 18 ex ke tnam ateꞌ tuj cytxꞌotxꞌ, atzun ke jlu: Jezreel, Quesulot, Sunem, 19 Hafaraim, Sihón, Anaharat, 20 Rabit, Quisión, Abez, 21 Remet, En-ganim, En-hada ex Bet-pases. 22 Aju tmojonil cytxꞌotxꞌ ponin max tuj tnam Tabor, tuj tnam Sahazima, tuj tnam Bet-semes, ex atzun ponin baj ttzi nima Jordán; kaklaj tnam tuꞌn tcyakilx, ex cyucꞌix ke aldey ateꞌ cyiꞌjele. 23 Atzun txꞌotxꞌ lu oc te cye teyle junjun cꞌloj tiyjil Isacar, cyucꞌix ke tnam ateꞌ tuj ex cyucꞌix ke aldey ateꞌ cyiꞌjele tnam.

24 Aju tjweꞌyin piẍ txꞌotxꞌ jaw swert tiꞌj, atzunju oc te cye teyle junjun cꞌloj tiyjil Aser, 25 ex ke tnam ateꞌ tuj cytxꞌotxꞌ, atzun ke jlu: Helcat, Halí, Betén, Acsaf, 26 Alamelec, Amad ex Miseal. Aju tmojonil tuj telex kꞌij ponin max twi witz Carmelo ex ttzi nima Sihor-libnat. 27 Aju tmojonil tuj tjawitz kꞌij xiꞌyni tuꞌn tjapun tuj lugar Bet-dagón ex jawnix tiꞌj cytxꞌotxꞌ tiyjil Zabulón tuj tchkꞌajlajil txꞌotxꞌ Jefte-el, ex tuj tbankꞌab kꞌij cyuj tnam Bet-emec ex Neiel ex elnix tibaj tnam Cabul, 28 cyjaꞌtzun, tucꞌix tnam Abdón xi kꞌoꞌn cye, tucꞌix Rehob, Hamón ex Caná, ex pon baj max tuj nintz tnam Sidón. 29 Te tibajxi, aju mojon in kꞌon welt max tuj tnam Ramá ex ponin max tuj tnam Tiro aju tnam toc muro tiꞌj, tuꞌntzun tpon tuj tnam Hosa ex cubintz ttziꞌyile Nintz mar in cubil tuj txꞌotxꞌ Aczib. 30 Tucꞌix tnam Uma oc te cye, tucꞌix Afec ex Rehob. Tuꞌn tcyakilx o japun jun tajlal te 22 tnam, cyucꞌix ke aldey ateꞌ cyiꞌjele. 31 Atzun ke tnam lu cyucꞌix ke aldey ateꞌ cyiꞌjele, e oc te cye teyle junjun cꞌloj tiyjil Aser.

32 Aju tkakin piẍ txꞌotxꞌ jaw swert tiꞌj, atzunju oc te cye teyle junjun cꞌloj tiyjil Neftalí. 33 Aju cytxꞌotxꞌ, atzun xiꞌynix tmojonil tuj tnam Helef ex icꞌni cyuj ke tnam Alón-saananim, Adami-neceb ex Jabneel ex ponin max tuj tnam Lacum, tuꞌn tpon ttzi nima Jordán. 34 Aju tmojonil tuj telex kꞌij, atzun in xi keꞌ tuj tnam Aznot-tabor ex tuj tnam Hucoc; cyjaꞌtzun aju tmojonil mij cytxꞌotxꞌ tuj tnayaj kꞌij tmojon tib tucꞌil cytxꞌotxꞌ tiyjil Zabulón, ex mijtl cytxꞌotxꞌ tuj telex kꞌij tmojon tib tucꞌil cytxꞌotxꞌ tiyjil Aser. Aju tmojonil cytxꞌotxꞌ tiyjil Neftalí tuj tjawitz kꞌij, atzun nima Jordán. 35 Akeju tnam toc muro cyiꞌj e oc te cye, atzun ke jlu: Sidim, Zer, Hamat, Racat, Cineret, 36 Adama, Ramá, Hazor, 37 Cedes, Edrei, En-hazor, 38 Irón, Migdal-el, Horem, Bet-anat ex Bet-semes. Belajlaj tnam tuꞌn tcyakilx ex cyucꞌix ke aldey ateꞌ cyiꞌjele. 39 Atzun txꞌotxꞌ lu, cyucꞌix ke tnam ateꞌ tuj ex cyucꞌix ke aldey ateꞌ cyiꞌjele tnam, e oc te cye teyle junjun cꞌloj tiyjil Neftalí.

40 Aju twukin piẍ txꞌotxꞌ jaw swert tiꞌj, atzunju oc te cye teyle junjun cꞌloj tiyjil Dan. 41 Tuj txꞌotxꞌ lu atzun ateꞌ ke tnam lu: Zora, Estaol, Ir-semes, 42 Saalabín, Ajalón, Jetla, 43 Elón, Timnat, Ecrón, 44 Elteque, Gibetón, Baalat, 45 Jehud, Bene-berac, Gat-rimón, 46 Mejarcón ex Racón, tucꞌix ju txꞌotxꞌ tcubsaꞌn tumlal twitz tnam Jope. 47 Pero como mintiꞌ canun txꞌotxꞌ lu te cye, cyjaꞌtzun e jeꞌx ke tiyjil Dan tuꞌn cyoc tzokpaj tiꞌj tnam Lesem, ex o tzyet tnam cyuꞌn. Tcublenxi cybyoꞌn cycyakil xjal najl tuj tnam lu, e cyaj ten najal tuj ex baj cychꞌexpuꞌn tbi. Dan oc cykꞌoꞌn tbi tnam te jun nimbil te ktzan cyxeꞌchel. 48 Atzun txꞌotxꞌ lu, cyucꞌix ke tnam ateꞌ tuj ex ke aldey ateꞌ cyiꞌjele tnam, e oc te cye teyle junjun cꞌloj tiyjil Dan.

49 Tbajlenxi cysipan aj Israel aju txꞌotxꞌ attok tuꞌn toc te cye teyle junjun cꞌloj cyiyjil, xi cykꞌoꞌn jun piẍ te Josué ttxꞌotxꞌ, ax cyxolx, 50 ic tzaꞌnx otok tma Kman. Xi tkanin Josué aju tnam Timnat-sera tbi, aju tcubsaꞌn tuj tiwitz txꞌotxꞌ cye aj Efraín, ex atzunju xi cykꞌoꞌn te. Jawtzun tbinchaꞌn Josué juntl maj aju tnam lu ex axtzun o najan tuj.

51 Tcyakil txꞌotxꞌ lu, aju jaw swert tiꞌj tuꞌn Eleazar tucꞌix Josué ex cyucꞌix ke nejenel te tnam tuꞌn tcub sipet cyxol cycyakil cꞌloj cyiyjil aj Israel, o bant jlu twitz Kman, ttzi ja xbalun te mojbabl tibil, max tuj Silo, ex cyjaꞌtzun tten o baj cysipan tcyakil txꞌotxꞌ.