3 Xitzun tmaꞌn Josué cye aj Israel: ¿Tikuꞌn naꞌnx cyxiꞌye cꞌmolte txꞌotxꞌ te cyetzbile, aju ma tzaj tkꞌoꞌn Kman cyeye, aju Cydios ktzan cyxeꞌchele? 4 Cyscꞌon jawe ox xinak cyxol teyle junjun cꞌloj cyiyjile, tuꞌntzun cyxi nsamaꞌne tuꞌn tbaj cybetin tcyakil txꞌotxꞌ, ex tuꞌn ttzaj cyiꞌn jun tkanil wucꞌile tzaꞌn tten tuꞌn tcub sipet. 5 Ex atzun ke xinak lu che bel paꞌnte txꞌotxꞌ tuꞌn tel te wuk piẍ, pero miꞌn tzꞌoc cyyucun cytxꞌotxꞌ tiyjil Judá at tuj tnayaj kꞌij ex ju cytxꞌotxꞌ ke tiyjil José at tuj tbankꞌab kꞌij. 6 Tbajlenxitzun cypaꞌn txꞌotxꞌ te wuk piẍ, ctzajel cyiꞌn jun tajlal wucꞌile, ex octzun cjawil wiꞌne swert tiꞌj twitz Kman Dios. 7 Atzun cye aj Leví misicyer jun piẍ txꞌotxꞌ cxel kꞌot cye, porque aju cyoclen te pal tuꞌn cyajben te Kman, atzunju cyetzbil. Atzun ke tiyjil Gad ex ke tiyjil Rubén, cyucꞌix mij tiyjil Manasés, ya o cycꞌam cyetzbil tuj txꞌotxꞌ tuj tjawitz kꞌij te nima Jordán, aju xi kꞌoꞌn cye tuꞌn Moisés aju tmajen Kman, chi Josué xi tmaꞌn.

8 Tej tbant cyten tuꞌn cyxiꞌ keju attok cyjawil kꞌinte tajlal tiꞌj txꞌotxꞌ, xi tmaꞌn Josué cye: Cyxiꞌye tuj tcyakil txꞌotxꞌ ex cypaꞌn baje, ex octzun tbaj bant cyuꞌne, bix che aj meltzꞌaje, tuꞌntzun tjaw wiꞌne swert tiꞌj twitz Kman tzalu tuj Silo.

9 E jeꞌxtzun ke xinak lu ex baj cybetin tcyakil txꞌotxꞌ; baj cypaꞌn ke tnam te wuk cꞌloj ex cub cytzꞌiban tcyakil. Te tibajxi e ajtz meltzꞌaj tuꞌn cyul tuj campament tuj Silo, jatum taꞌtok Josué. 10 Jaw tiꞌn Josué swert twitz Kman tuj lugar Silo ex cub t-sipan txꞌotxꞌ cyxol aj Israel.

11 Tej tjaw swert cyiꞌj tiyjil Benjamín, aju cytxꞌotxꞌ o cycꞌam atzun aju tcub t-xol cytxꞌotxꞌ cyiyjil Judá tucꞌil cytxꞌotxꞌ ke tiyjil José. 12 Aju tmojonil txꞌotxꞌ lu, atzun in tzaj keꞌ ttzi nima Jordán tuj tbankꞌab kꞌij te tnam Jericó, xiꞌyni tuj telex kꞌij tuꞌn tpon tuj tiwitz txꞌotxꞌ, ex elnix tuꞌn telel tuj tzkij txꞌotxꞌ Bet-avén. 13 Ex atzun xiꞌyintl tuj tnayaj kꞌij tuꞌn tpon tuj tnam Luz ex ka Betel, ex cubinx tuꞌn tpon max tuj lugar Atarot-adar twi witz tuj tnayaj kꞌij te tnam Bet-horón te cubni; 14 ex atzun in meltzꞌaj mojon tuꞌn telel tumlal telex kꞌij tiꞌj tcꞌuꞌj witz, aju tcubsaꞌn tuj tnayaj kꞌij twitz tnam Bet-horón, tuꞌn tpon baj max tuj tnam Quiriat-baal aju ax juntl tbi Quiriat-jearim, aju etzan cyuꞌn ke tiyjil Judá. Atzunju mojon lu tuj telex kꞌij.

15 Aju mojon tuj tnayaj kꞌij, atzun oquintz ttxaꞌn tnam Quiriat-jearim tuj telex kꞌij, tuꞌn tul jatum taꞌ twi aꞌ Neftoa, 16 ex in cubil max ttxaꞌnpun witz aju tcubsaꞌn tumlal twitz chkꞌajlaj Ben-hinom, tuj tbankꞌab kꞌij te chkꞌajlaj Refaim. Te tibajxi in cubil tuj chkꞌajlaj Hinom, icꞌnitl tuj tnayaj kꞌij cubni teju witz te tnam Jebús, ex atzun xiꞌyintl tuꞌn tpon max jatum taꞌ twi aꞌ En-rogel. 17 Icꞌnitl tuꞌn tjax tuj tbankꞌab kꞌij tuꞌn tpon tuj lugar En-semes, ex atzun xiꞌyintl tuꞌn tpon max tuj lugar Gelilot aju tcubsaꞌn tumlal witz Adumín, ex in cubil max jatum taꞌ ju pic te Bohán (ate Bohán tcyꞌajal Rubén); 18 ex icꞌni te jawni te twitz jawl aju tcubsaꞌn tumlal twitz chkꞌajlaj Jordán, ex in cubil max ttzi nima Jordán, 19 ex icꞌni tuj tiwitz txꞌotxꞌ te tnam Bet-hogla, tuꞌn tpon baj max jatum ponin baj mar at nim atzꞌan tuj, ex jatum in pon nima Jordán tujx mar lu. Atzun mojon lu tuj tnayaj kꞌij.

20 Aju nima Jordán, atzun mojon tuj tjawitz kꞌij. Atzun ke mojon lu te txꞌotxꞌ cub sipan cyxol teyle junjun cꞌloj tiyjil Benjamín.

21 Ke tnam e oc te cye teyle junjun cꞌloj tiyjil Benjamín, atzun ke jlu: Jericó, Bet-hogla, Emec-casis, 22 Bet-arabá, Zemaraim, Bet-el, 23 Avim, Pará, Ofra, 24 Quefar-haamoni, Ofni ex Geba; cablaj tnam cyucꞌix ke aldey ateꞌ cyiꞌjele. 25 Ax icx at txkantl tnam, ex atzun ke jlu: Gabaón, Ramá, Beerot, 26 Mizpa, Cafira, Mozah, 27 Requem, Irpeel, Tarala, 28 Zela, Elef, Jebús ex ka Jerusalén, Gabaa, ex Quiriat; cyajlaj tnam cyucꞌix ke aldey ateꞌ cyiꞌjele. Atzun txꞌotxꞌ lu oc te cye teyle junjun cꞌloj tiyjil Benjamín.