3 Atzunte Zelofehad aju tcyꞌajal Hefer, tal tchman Galaad ex ttxca tchman Maquir aju tcyꞌajal Manasés, mintiꞌ jun tcyꞌajal o tzaj, nok oꞌcx tmeꞌjel e tzaj, ex atzun cybi jlu: Maala, Noa, Hogla, Milca ex Tirsa. 4 E pontzun ke xuꞌj lu tucꞌil pal Eleazar, tucꞌil Josué ex cyucꞌil ke nejenel te tnam, ex xi cymaꞌn cye cyjaꞌ: O tzaj tmaꞌn Kman te Moisés tuꞌn ttzaj kꞌoꞌn ktxꞌotxꞌe ic tzaꞌnx in xi kꞌoꞌn cye ke xinak at cyxilen kucꞌile. Xitzun tkꞌoꞌn Josué cytxꞌotxꞌ ic tzaꞌnx otok txi tkꞌoꞌn cye ke terman cyman, ic tzaꞌnx otok tzaj tmaꞌn Kman.

5 Cyjaꞌtzun, akeju tiyjil Manasés o cycꞌam laj piẍ txꞌotxꞌ, ex part aju txꞌotxꞌ Galaad ex Basán, aju tcubsaꞌn tuj tjawitz kꞌij te nima Jordán, 6 porque xi kꞌoꞌn cytxꞌotxꞌ ke xuꞌj lu, akeju tiyjil Manasés, ic tzaꞌnx cye xinak. Aju txꞌotxꞌ Galaad xi kꞌoꞌn cye juntl cꞌloj tiyjil Manasés. 7 Aju cytxꞌotxꞌ ke tiyjil Manasés tuj telex kꞌij te nima Jordán, xiꞌynix tmojonil cytxꞌotxꞌ aj Aser ex ponin tuj Micmetat, aju tcubsaꞌn tumlal twitz Siquem, xiꞌyintl tuj tnayaj kꞌij ex ponin max jatum njatz jlet twi aꞌ te tnam Tapúa. 8 Masque aju txꞌotxꞌ te tnam Tapúa cyetok ke tiyjil Manasés, atzunju tnam Tapúa, aju tcub tuj tmojonil cytxꞌotxꞌ aj Manasés, cyetok ke tiyjil Efraín. 9 Aju tmojonil txꞌotxꞌ in cuꞌtz tuꞌn tcubil cubni max tuj tnayaj kꞌij ttzi tkꞌab xak Caná, cyjaꞌtzun at junjun tnam cye tiyjil Efraín ateꞌ cyxol ke tnam cye tiyjil Manasés. Aju tmojonil elnix twi tkꞌab xak Caná, aju cyetok tiyjil Manasés, ex in pon baj ttzi Nintz mar. 10 Aju txꞌotxꞌ tuj tnayaj kꞌij te tkꞌab xak, atzun cye tiyjil Efraín, ex aju txꞌotxꞌ tuj tbankꞌab kꞌij te tkꞌab xak, atzun cye tiyjil Manasés, ex aju tmojonil cytxꞌotxꞌ, atzunju Nintz mar. Aju tmojonil cytxꞌotxꞌ tiyjil Manasés tuj tbankꞌab kꞌij, atzun cytxꞌotxꞌ ke tiyjil Aser, ex atzunju tmojonil cytxꞌotxꞌ tuj tjawitz kꞌij, atzun cytxꞌotxꞌ ke tiyjil Isacar. 11 Ax icx e oc te cye ke tiyjil Manasés junjun tnam ateꞌ tuj cytxꞌotxꞌ tiyjil Isacar ex Aser, ex atzun ke tnam lu cyucꞌix ke aldey ateꞌ cyiꞌjele: Bet-seán, Ibleam, Dor, Endor, Taanac ex Meguido. Aju toxin tnam, atzun, Nafot-dor. 12 Pero ke tiyjil Manasés mintiꞌ e xcyeꞌ tuꞌn cyex cylajoꞌn ke xjal najlke cyuj ke tnam lu, porque o ten cyipun ke aj Canaán cywitz, ex axtzun e cyaj ten cyuj ke tnam. 13 Te tibajxi, tej toc mastl cyipun aj Israel, oc cykꞌoꞌn il cyiꞌj aj Canaán tuꞌn tchjet chojenj cyuꞌn, pero mintiꞌ e jeꞌx cylajoꞌn ke.

14 Atzun ke tiyjil José xi cymaꞌn te Josué:

—¿Tikuꞌn ma tzaj tkꞌoꞌna nok jun piẍ txꞌotxꞌ keye ic tzaꞌnx swert ma jaw, ex keye nim kbaje ex ma ko cub cyꞌiwlaꞌne tuꞌn Kman?

15 Xitzun ttzakꞌweꞌn Josué:

—Yaque nim cyeye cybaj ex mintiꞌ ma canun cytxꞌotxꞌe tuj tiwitz txꞌotxꞌ te Efraín, cyjaxe tjakꞌ chcꞌul ex cytxꞌemin jawe ke tzeꞌ tuj cytxꞌotxꞌ aj Ferezey ex tuj cytxꞌotxꞌ aj Refait.

16 Ex atzun cye o cyma:

—Ax toc, akeju tiwitz txꞌotxꞌ lu mintiꞌ in canun te keye. Ex ke aj Canaán akeju najlke tuj chkꞌajlaj, ax icx akeju najl tuj tnam Bet-seán ex cyuj ke aldey ateꞌ tiꞌjele, ex keju najl tuj chkꞌajlaj Jezreel, at cycarwaj in che ajben tuj kꞌoj, puro cꞌuxbil ke.

17 Xitzun ttzakꞌweꞌn Josué cye tiyjil José, akeju tiyjil Efraín ex Manasés:

—At nim cybaje ex at nim cyipune, cyjaꞌtzun mya nok jun piẍ txꞌotxꞌ cꞌoquel te cyeye, 18 ax icx cꞌoquel te cyeye aju chcꞌul at tuj tiwitz txꞌotxꞌ; cytxꞌemin jawe ke tzeꞌ tuj ex cytzyume tuꞌn toc te cyeye. Atzun ke aj Canaán, baꞌn tuꞌn cyex cylajoꞌne, masque at nim cyipun ex at cycarwaj puro cꞌuxbil.