Aju cytxꞌotxꞌ aj Efraín ex aj Manasés, akeju tiyjil José
16
Aju txꞌotxꞌ oc te cye ke tiyjil José ic tzaꞌnx swert jaw; aju tmojonil cytxꞌotxꞌ tuj tjawitz kꞌij, atzun in tzaj keꞌ ttzi nima Jordán tumlal ke twi aꞌ te Jericó, ex atzun xiꞌyintl tuꞌn tpon max tuj tzkij txꞌotxꞌ, ex jawinx tuj Jericó tuꞌn tjapun tuj tiwitz txꞌotxꞌ Betel. 2 Icꞌnitl tuj Betel (aju ax juntl tbi Luz), atzun exni tuj cytxꞌotxꞌ aj Arquit tuꞌn tpon max tuj tnam Atarot; 3 ex xiꞌyintl tuj telex kꞌij tuꞌn tex tuj cytxꞌotxꞌ aj Jafletey, elnix tuj tnam Bet-horón aju tcuꞌtz cubni, elnix tuj tnam Gezer, ex atzun xiꞌyni tuꞌn tpon baj max ttzi Nintz mar. 4 Atzunju etzbil o cycꞌam ke tiyjil Manasés ex tiyjil Efraín, akeju tiyjil José.Aju cytxꞌotxꞌ ke tiyjil Efraín
5 Aju tmojonil cytxꞌotxꞌ tiyjil Efraín tuj tjawitz kꞌij xi kꞌoꞌn cye ic tzaꞌnx tajlal junjun cꞌloj cyiyjil, atzun xiꞌyni keꞌ tuj lugar Atarot-adar, ponin max tuj tnam Bet-horón te jawni, 6 ex atzun xiꞌyni tuꞌn tpon max ttzi Nintz mar. Aju tmojonil cytxꞌotxꞌ tuj tbankꞌab kꞌij, atzun ponin baj tuj lugar Micmetat ex cubintztl tmojonil tuj tjawitz kꞌij, ponin baj max tuj lugar Taanat-silo, tuꞌntzun ticꞌ tuj lugar Janoa, 7 tuꞌn tcubil tuj lugar Atarot ex Naarat ex tuꞌn tocx tuj Jericó tuꞌn tpon baj ttzi nima Jordán. 8 Ax icx aju tmojonil te jawni, xiꞌynix tuj tnam Tapúa, elnix tuj telex kꞌij ex ponin baj ttzi tkꞌab xak Caná ex ttzi Nintz mar. Atzunju txꞌotxꞌ lu oc te cye tiyjil Efraín, ex cub sipan cyxol teyle junjun cꞌloj cyiyjil. 9 Ex at junjun tnam ex aldey ateꞌ tuj cytxꞌotxꞌ tiyjil Manasés e oc te cye tiyjil Efraín. 10 Pero mintiꞌ e ex cylajoꞌn ke tiyjil Efraín ke aj Canaán akeju najl tuj tnam Gezer, nok oꞌcx ax e cyaj cykꞌoꞌn tuꞌn cynajan cyxol, pero e oc cykꞌoꞌn te cymajen tuꞌn cybinchante akꞌuntl cyuwxix. Ax icx jaꞌlo ax najl ke aj Canaán cyxol.