—Chuxa, binchame junjun kdiose tuꞌn cycub nej kwitze. Mintiꞌ baꞌn kuꞌne ti ma baj tiꞌj Moisés aju etz kꞌinte keye tuj Ejipt, che chi.

2 Xitzun tmaꞌn Aarón cye cyjaꞌ:

—Cyiꞌn ele ke cyuj ẍcyinbaj kꞌan pwak cytxꞌotxꞌil, aju toc cyuꞌn cyxuꞌjile, cymeꞌjele ex cycyꞌajale, ex cyiꞌntze wucꞌile, chi Aarón.

3 Cycyakil xjal, el cyiꞌn ke cyuj cyẍcyin kꞌan pwak cytxꞌotxꞌil ex xi cyiꞌn tucꞌil Aarón. 4 O tcꞌam Aarón tcyakil jlu, ex ocx tkꞌoꞌn tuj kꞌakꞌ tuꞌn tcub ulj. Tiꞌjtzun jlu baj tbinchaꞌn jun tilbilal tal tor tuꞌn tzꞌkab ex cymatzun xjal: Akeye aj Israel, lu kdios lu aju etz kꞌinte ke tuj Ejipt, che chi.

5 Tej tqueꞌyinte Aarón jlu, jaw tbinchaꞌn jun altar twitz tilbilal tal tor, ex xi tmaꞌn tkanil lu: Nchiꞌj cub icꞌset ninkꞌij te nimbil te Kman, chi Aarón.

6 Tujtzun juntl kꞌij, junyaꞌx e jaw weꞌ, xi cykꞌoꞌn oyaj patun in che cub ex oyaj te mojbabl tibil, ex e cub keꞌ waꞌl ex cꞌal. Te tibajxi e oc ten bixal. 7 Tzajtzun tmaꞌn Kman te Moisés cyjaꞌ:

—Chux tcuꞌxa, porque ke t-xjalila, akeju e jeꞌtz tiꞌna tuj Ejipt, ma che binchan il; 8 jurat naj ma tzꞌel cypaꞌn cyib tiꞌj be xi nmaꞌne cye. Ma cub cybinchaꞌn jun tilbilal tal tor kꞌan pwak ttxꞌotxꞌil ex lu ke in che cꞌulun twitz, in cub cykꞌoꞌn oyaj twitz ex in cymaꞌn cyjaꞌ: Akeye aj Israel, lu kdios lu aju etz kꞌinte ke tuj Ejipt, che chi.

9 Ax icx tzaj tmaꞌntl Kman te Moisés:

—Ma tzꞌel nnicꞌe cyiꞌj ke xjal lu, ax toc miban che bin. 10 Atzun jaꞌlo miꞌn colina cyiꞌj porque ctzajel nimxix ntxꞌuꞌjile cyiꞌj, ex che bajel naj wuꞌne, pero tiꞌja cꞌelel jlet jun nintz nasyon wuꞌne, chi Dios.

11 Octzun ten Moisés cubsal twitz Kman aju Tdios, ex xi tmaꞌn te cyjaꞌ:

—Nman, ¿tikuꞌn ctzajel nimxix ttxꞌuꞌjila cyiꞌj ke xjal etzan tuꞌna, akeju tuꞌna e jeꞌtz tuj Ejipt tuꞌn tipumala nimxix? 12 ¿Tzaꞌn tten cxel tkꞌoꞌna ambil cye aj Ejipt tuꞌn cymante cyjaꞌ: O che ex tiꞌn Dios ke aj Israel tuꞌn tbinchante mya baꞌn cyiꞌj, tuꞌn cycub tbyoꞌn cywi witz, ex biꞌx tuꞌn cynaj tuꞌn twitz txꞌotxꞌ? Che chilo aj Ejipt. Colinxa tuꞌn ttzaj ttxꞌuꞌjila cyiꞌj, ex chꞌexpuma aju mya baꞌn ma cub t-ximana tuꞌn tbinchanteya cyiꞌj ke xjal etzan tuꞌna. 13 Naꞌntza Abraham, Isaac ex Israel ke tmajena, akeju tuꞌnx tiba xi tmaꞌna jun yol axix toc cye cyjaꞌ: Cchmetel nimxix cyiyjile wuꞌne ic tzaꞌn cyajlal ke cheꞌw twitz cyaꞌj, ex cxel nkꞌoꞌne cye tcyakilju txꞌotxꞌ o txi ntziyane cyeye, ex cꞌoquel te cyetzbil te jumajx, chiya cye, chi Moisés.

14 Bajtzun tchꞌexpuꞌn Kman aju mya baꞌn otok cub t-ximan tuꞌn tbinchante cyiꞌj ke xjal etzan tuꞌn. 15 Cuꞌtztzun Moisés twi witz, kꞌiꞌn tuj tkꞌab ke cabe tzꞌlom abj jatum tzꞌiban ley cywitz cycabil plaj teyle junjun. 16 Tuꞌnx Dios otok che bant ke tzꞌlom abj ex tuꞌnx Dios otok che cub tzꞌiban ke yol cywitz.

17 Tej tbinte Josué tkꞌajkꞌajel cywi xjal in che schꞌintok, xi tmaꞌn te Moisés cyjaꞌ:

—Tkꞌajkꞌajel kꞌoj in binjtz tuj campament, chi Josué.

18 Atzunte Moisés xi ttzakꞌweꞌn:

—Aju tkꞌajkꞌajel lu, mya tkꞌajkꞌajel cywiꞌ keju ma che camban, mi tkꞌajkꞌajel cywiꞌ keju ma cub cyiꞌj; tkꞌajkꞌajel bitz aju in nbiꞌne, chi Moisés.

19 Tej tcubil Moisés tuj campament, o til aju tilbilal tal tor ex ke xjal in che bixuntok twitz. Tzaj tkꞌoj Moisés, e cub t-xoꞌn ke tzꞌlom abj cyocxtok cyuj tkꞌab, ex e baj tbuchin t-xe witz. 20 Tzaj tiꞌn tilbilal tal tor otok cub cybinchaꞌn xjal, ocx tkꞌoꞌn tuj kꞌakꞌ, baj tcheꞌn tejxi tkukix, xi tchitun kuk lu tibaj aꞌ, ex xi tkꞌoꞌn aꞌ lu te cycꞌa aj Israel. 21 Xitzun tmaꞌn Moisés te Aarón cyjaꞌ:

—¿Ti ma cybincha xjal lu tiꞌja, tuꞌnju ma txi tkꞌoꞌna ambil cye tuꞌn cybinchante jun il maꞌxix, chi Moisés.

22 Xi ttzakꞌweꞌn Aarón:

—Tat, miꞌn jaw kꞌojla wiꞌje. Baꞌn tuꞌna, ke xjal lu jurat in che binchan mya baꞌn. 23 Tzaj cymaꞌn weye cyjaꞌ: Binchan cuba jun kdiose tuꞌn tcub nej kwitze, porque mintiꞌ baꞌn kuꞌne ti ma baj tiꞌj Moisés aju etz kꞌinte keye tuj Ejipt, che chi. 24 Xi nmaꞌne cye cyjaꞌ: Alcye at kꞌan pwak tucꞌil, e ttzaj tiꞌn ex e ttzaj tkꞌoꞌn weye, nchiye. Tzaj cykꞌoꞌn weye, ocx nkꞌoꞌne tuj kꞌakꞌ, ex banttzun aju tilbilal tal wacẍ lu, chi Aarón.

25 Tej ttil Moisés otok txi cykꞌon cyib xjal tuꞌn cybinchante mya baꞌn, tuꞌnju otok txi tkꞌoꞌn Aarón ambil cye, ex tuꞌn jlu jacu cub cychꞌixwi cywitz ke aj kꞌoj cyiꞌj, 26 cub weꞌ Moisés ttzi be jatum in che ocx xjal tuj campament ex xi tmaꞌn: Alcye lepch tiꞌj Kman e ttzaj wucꞌile, chi Moisés.

Cycyakiltzun ke aj Leví oc cychmon cyib tucꞌil. 27 Xitzun tmaꞌn Moisés cye:

—Atzun jlu ma tzaj tmaꞌn Kman aju Cydios aj Israel: Tzyum t-spad teyle junjun, cyaj meltzꞌaje cyxol ke xjal tuj campament, ex cyxiꞌye ttziꞌyile ja. Teyle junjun e tcub tbyoꞌn terman, tamiw ex tvesin, chi Moisés.

28 O bant cyuꞌn aj Leví ic tzaꞌn otok tma Moisés, ex balo ox mil xinak e cyim tuj kꞌij lu. 29 Xitzun tmaꞌn Moisés cye aj Leví cyjaꞌ: Jaꞌlo ma che el paꞌne tuꞌn cyajbene oꞌcx te Kman, tuꞌnju ma txi cynimane tuꞌn tcub cybyoꞌne cycyꞌajale ex cyermaniye, ex tuꞌntzun jlu oc che cyꞌiwlanjtzele tuꞌn Kman jaꞌlo.

30 Tuj juntl kꞌij xi tmaꞌn Moisés cye xjal: Ma cybinchaye jun il maꞌxix. Jaꞌlo chin jawixe tucꞌil Kman, balo ka jacu chewix tcꞌuꞌj wuꞌne, tuꞌn tcub tnajsaꞌn cyile, chi Moisés.

31 Aj meltzꞌaj Moisés tucꞌil Kman ex xi tmaꞌn te cyjaꞌ:

—Ke xjal lu ma cybincha jun il maꞌxix tuꞌnju o cub cybinchaꞌn cydios kꞌan pwak cytxꞌotxꞌil. 32 In chin cubsane twitza tuꞌn tcub tnajsana cyil. Katzun miꞌn, kꞌuchan jatza nbiye tuj tuꞌja jatum o cuꞌx ttzꞌibana, chi Moisés.

33 Tzajtzun tmaꞌn Kman te:

—Oꞌcx cjawitz nkꞌuchane tuj wuꞌje cybi keju in che binchan il nwitze. 34 Txiꞌya jaꞌlo ex kꞌinxa ke xjal jatum o txi nmaꞌne teya. Cbel nej n-anjele twitza, ex octzun tpon kꞌij tuꞌn tcub cycastiw, cbel nkꞌoꞌne cycastiw tuꞌn tlaj cyil, chi Dios.

35 Tzajtzun t-samaꞌn Kman cꞌixbisabl cyibaj xjal tuꞌnju otok che cꞌulun twitz tilbilal tal tor otok cub tbinchaꞌn Aarón.