Tma Kman tuꞌn cyicꞌ bet aj Israel
33
Tzaj tmaꞌn Kman te Moisés cyjaꞌ: Cyicꞌe tzalu, aya ex ke xjal e jeꞌtz tiꞌna tuj Ejipt; cyxiꞌye tuj txꞌotxꞌ xi ntziyane te Abraham, te Isaac ex te Jacob, tuꞌn t-xi nkꞌoꞌne cye cyiyjil che ul itzꞌj te tibajxi. 2 Cxel nsamaꞌne n-anjele tuꞌn tcub nej cywitze, ex che elex nlajoꞌne ke aj Canaán, ke aj Amorrey, ke aj Hetey, ke aj Ferezey, ke aj Hevey ex ke aj Jebusey. 3 Cyxiꞌye tuj txꞌotxꞌ kꞌinun txꞌotxꞌ ex tbanilxix. Atzun weye miꞌn chinxe cyxole; mya yajcu jacu che naje wuꞌne tuj be, tuꞌnju miban che bine, chi Dios.4 Tejtzun cybinte xjal tkanil mya baꞌn lu, tzaj nimxix cybis, ex mi jun baj tbinchan tib cyuꞌn ke tiꞌxti tbanilxix, 5 tuꞌnju otok tzaj tmaꞌn Kman te Moisés tuꞌn t-xi tmaꞌn cye aj Israel cyjaꞌ: Akeye xjal miban che bine, ka ma chinxe cyucꞌile, te jun rat jacu che naje wuꞌne. Cyiꞌmele biꞌx jaꞌlo ke tiꞌxti tbanilxix nnoꞌc cykꞌoꞌne cyiꞌje, tuꞌntzun nlonteye ti cbantel wuꞌne cyiꞌje.
6 Eltzun cyiꞌn aj Israel ke tiꞌxti tbanilxix cyoc cyiꞌj, tej cyicꞌ t-xe witz Horeb.
Aju ja xbalun te mojbabl tibil tucꞌil Dios
7 Etztzun tiꞌn Moisés ja xbalun ex jaw tbinchaꞌn najchak tiꞌjxi campament, ex Ja Xbalun te Mojbabl Tibil tbi oc tkꞌoꞌn. Ka attok jun tajbil tuꞌn tyolin tucꞌil Kman, nnuꞌltok twitz ja xbalun aju tetz tiꞌjxi campament. 8 Oc t-xiꞌ Moisés tumlal ja xbalun, cycyakil xjal in che jaw weꞌtok, in che cub weꞌtok ttzi cyja, ex ax in xi bajtok cywitz tiꞌj Moisés ocxi tocx baj tuj. 9 Octzun tocx tuj, in cubtok muj ttzi ja xbalun ex ax in cub ten acux in yolintok Kman tucꞌil Moisés. 10 Octzun cyqueꞌyinte cycyakil xjal aju muj tcub ttzi ja xbalun, teyle junjun in cub mocꞌeꞌtok ax ttzi tja, tuꞌn tcꞌulun. 11 Acu Dios in yolintok tucꞌil Moisés ic tzaꞌn in yolin jun xjal tucꞌil tamiw. Oc tbaj yolin Moisés tucꞌil Kman, nnaꞌj meltzꞌajtok tuꞌn tpon tuj campament. Atzunte cuꞌxun Josué tcyꞌajal Nun, aju onil te Moisés, mintiꞌtok nneꞌl lakꞌeꞌ tuj ja xbalun.
Tzaj tyecꞌun Kman tajwalil te Moisés
12 Xi tmaꞌn Moisés te Kman cyjaꞌ:
—Bintza, in tzaj tmaꞌna weye: Kꞌinxa ke xjal lu, chiya, pero naꞌnx ttzaj tchicꞌbaꞌna weye alcye cxel t-samaꞌna wucꞌile. Ax icx in tmaꞌntla cyjaꞌ: Ojtzkiꞌna wuꞌne ex baꞌn ma tzꞌeꞌla tuj nwitze, chiya weye. 13 Katzun icju, ka baꞌn ma chin eꞌle tuj twitza, in chin cubsane twitza tuꞌn ttzaj tyecꞌuna tbeya weye, tuꞌntzun tel nnicꞌe tiꞌja ex tuꞌn tcnet t-xtalbila wuꞌne. Ximana tiꞌj, ke xjal lu teya ke, chi Moisés. 14 Tzajtzun tmaꞌn Kman cyjaꞌ:
—Ax kine chin xeꞌl tucꞌila, ex ctzajel nkꞌoꞌne ojlabl teya, chi Kman.
15 Xitzun tmaꞌn Moisés te cyjaꞌ:
—Katzun mya aya cxeꞌl kucꞌile, miꞌn ko ex tiꞌna tzalu. 16 ¿Tzaꞌn tten cꞌelel nicꞌbaj tiꞌja ka baꞌn ma ko eꞌle tuj twitza, akine ex ke xjal etzan tuꞌna? ¿Myapetzun tuꞌnju in beta kucꞌile ex tuꞌnju paꞌmaj koꞌye tuꞌna cyxol ke mastl nasyon tuj tcyakil twitz txꞌotxꞌ? Chi Moisés.
17 Tzajtzun tmaꞌn Kman te cyjaꞌ:
—Oc nbinchaꞌye aju ma tmaya, tuꞌnju baꞌn ma tzꞌeꞌla tuj nwitze ex ojtzkiꞌna wuꞌne, chi Dios.
18 Xitzun tmaꞌn Moisés te:
—Chin cubsale twitza, yecꞌuntza tajwalila weye.
19 Tzaj ttzakꞌweꞌn Kman:
—Cxel nyecꞌune ncꞌujlalile teya ex cxel nmaꞌne nbiye twitza. Ka waje tuꞌn ttzaj kꞌakꞌan ncꞌuꞌje tiꞌj jun xjal, ctzajel kꞌakꞌan ncꞌuꞌje tiꞌj; ex ka waje tuꞌn ttzaj tzꞌeꞌy wanmiye tiꞌj jun xjal, ctzajel tzꞌeꞌy wanmiye tiꞌj. 20 Mlay tzꞌoc tqueꞌyina nwitze, porque ka ma tzꞌoc tqueꞌyin jun xjal nwitze mlay tzꞌankꞌintl.
21 Ax icx tzaj tmaꞌntl Kman: