Aju tbanil txꞌotxꞌ jatum che najal aj Israel
8
Cycyakil ke mandamyent ma cheꞌx nmaꞌne cyeye jaꞌlo, tzꞌoc tililx cyuꞌne tuꞌn cyjapun cyuꞌne, tuꞌntzun cyankꞌine, ex tuꞌn tchmet nim cybaje, ex tuꞌn cyoque tajwil txꞌotxꞌ aju tzaj ttziyan Kman cye cyxeꞌchele. 2 Cynaꞌntze tcyakilju baj tej cybete 40 abkꞌi tuj tzkij txꞌotxꞌ ẍakluꞌn keye tuꞌn Kman Dios, tuꞌntzun cymansixe ex tuꞌn tel nicꞌbaj cyiꞌje, tuꞌntzun tojtzkinte alcye cyximbetze tuj cyanmiye, ka tuꞌn cyjapun ke tmandamyent cyuꞌne ex ka miꞌn. 3 Masque o che yajlanjtze tuꞌn ex o tzaj weꞌyaj cyiꞌje, pero te tibajxi o tzaj tkꞌoꞌn cywaye maná. Aju wabj lu mintiꞌ ojtzkiꞌntok cyuꞌne ex mi cyuꞌn ke cyxeꞌchele. O tbincha Dios tcyakil jlu tuꞌntzun tel cynicꞌe tiꞌj, ka mya oꞌcx tuꞌn wabj jacu tzꞌankꞌin xjal, ax icx jacu tzꞌankꞌin tuꞌn tcyakil yol in tmaꞌn Kman. 4 Tuj 40 abkꞌi lu mintiꞌ baj cyxbalune ex mintiꞌ e xi mal cykane tuꞌn betin. 5 Tzꞌelx cynicꞌe tiꞌj jlu, e cub cawine tuꞌn Kman Dios ic tzaꞌn jun mambaj in cawin cyiꞌj tcꞌwaꞌl. 6 Che japunx ke tmandamyent Kman Dios cyuꞌne, che lpeꞌque cyiꞌj ke t-xnakꞌtzbil ex tenx cychiylal tuj cywitze. 7 Porque che oquex kꞌiꞌne tuꞌn Kman tuj jun txꞌotxꞌ tbanilxix, jatum at nim aꞌ in bet cyuj ke tkan xak, at aꞌ in jatz jlet tuj txꞌotxꞌ, ex in jatz pulwin cyuj chkꞌajlaj ex cywiꞌ ke witz. 8 Tuj txꞌotxꞌ lu in tzaj triw ex sebad, at tkan uva, tkan higo, tkan carnad ẍokꞌ, tkan olivo, ex at cychiꞌye aseyt ex cyloꞌye taꞌl cab tuj cꞌul. 9 Mlay che apane weꞌyaj tuj txꞌotxꞌ lu, ex mintiꞌ jun tiꞌxti miꞌnwt canun cyeye; atzun ateꞌ ke abj at tbanil cꞌuxbil cyuj, ex jacu tzꞌetz cꞌuxbil cobre cyuꞌne cyuj ke witz. 10 Oc cybaj waꞌne ex oc tnoj cycꞌuꞌje wen, cxel cykꞌoꞌne chjonte te Kman Dios tuꞌnju tbanil txꞌotxꞌ otok tzaj tkꞌoꞌn cyeye.Xi tmaꞌn Moisés cye aj Israel tuꞌn miꞌn ticꞌ tnaꞌl Dios cyuꞌn
11 Cykꞌoꞌnque cwent cyiꞌje tuꞌn miꞌn ticꞌ tnaꞌl Kman Dios cyuꞌne. Che japunx ke tmandamyent cyuꞌne, ke tley ex ke tcawbil, akeju ma cheꞌx nmaꞌne cyeye jaꞌlo; 12 porque oc cybaj waꞌne ex oc cynoje wen, ex oc tjaw cybinchaꞌne cyjaye tbanilxix ex oc cynajane cyuj, 13 oc cychmet cywacẍe ex cyẍneꞌle, oc tchmet kꞌan pwak ex sak pwak cyucꞌile, ex oc tchmet cykꞌinumable, 14 mya yaj jaw cyniman cyibe tuj cyanmiye tuꞌn tcyakil jlu, ex jacu tzicꞌ tnaꞌl Kman Dios cyuꞌne, aju etz kꞌinte cyeye tuj Ejipt jatum ateꞌtoke te majen. 15 A ẍaklunte cyeye tuj jun nintz tzkij txꞌotxꞌ ex xobajilxix, jatum ateꞌtok nim lobaj in che cyim xjal cyuꞌn, jatum ateꞌ nim siꞌnin, ex jatum tzaj nim txketleꞌn cyiꞌje ex misicyer aꞌ at; pero etz tiꞌn Kman aꞌ tuj jun pic cyuwxix ex tzaj tkꞌoꞌn te cycꞌaye. 16 Tej cytene tuj lugar lu, tzaj tkꞌoꞌn Kman cywaye maná, aju mintiꞌ ojtzkiꞌn cyuꞌn ke cyxeꞌchele. O tbincha Dios tcyakil jlu tuꞌntzun cyoque mans, tuꞌn ticꞌ twitz cyiꞌje, ex tuꞌn tel baꞌn te cyeye te tibajxi.
17 Miꞌnwt cymaye tuj cyanmiye cyjaꞌ: Tcyakil kꞌinumabl lu ma cnet tuꞌn kexe kipumal, 18 nok oꞌcx tzulx tiꞌj cycꞌuꞌje, ate Dios in tzaj kꞌonte cyipumale tuꞌn tcnet cykꞌinumable, tuꞌntzun tjapun aju yol o cyaj bant tiꞌj tuꞌn cyucꞌil ke cyxeꞌchele.
19 Katzun ma tzicꞌ tnaꞌl Kman Dios cyuꞌne, ka ma che oc lpeꞌye cyiꞌj junxitl dios ex ka ma che cub ẍmejeꞌye tuꞌn cycꞌulune cywitz, biꞌx jaꞌlo in xi nmaꞌne cyeye, jumajx che najele, 20 ic tzaꞌn ke nasyon che najel tuꞌn Kman, akeju che oquel cycꞌulbaꞌne tuj cybeye. Ax icxtzun cyeye che najele ka miꞌn ma txi cynimane tyol Kman Dios.