Aju il tbincha Nadab ex Abiú
10
Ate Nadab tucꞌix Abiú, akeju tcyꞌajal Aarón, teyle junjun tzaj tiꞌn t-ẍlaꞌc, cuꞌx cykꞌoꞌn kꞌakꞌ tuj tucꞌix storac, ex cub cykꞌoꞌn junxitl kꞌakꞌ twitz Kman, aju mintiꞌ otok tma Kman tuꞌn tcub kꞌot. 2 Etztzun jucpaj jun kꞌakꞌ twitz Kman ex biꞌx e tzꞌeꞌy tuꞌn. Cyjaꞌtzun tten e cyim twitz Kman. 3 xitzun tmaꞌn Moisés te Aarón:—Atzun jlu o yolin Kman tiꞌj tej tmante cyjaꞌ:
Cxel nyecꞌun wibe ka xjan kine cye keju che pol lakꞌeꞌ nwitze, ex cxel nyecꞌune wajwalile cye cycyakil aj Israel, chi Kman.
Atzunte Aarón mintiꞌtl o kꞌajt.
4 Tzajtzun txcoꞌn Misael tucꞌix Elzafán tuꞌn Moisés, akeju tcyꞌajal Uziel aju terman tman Aarón, ex xi tmaꞌn cye:
—Cytzaje ex cyiꞌn exe cyximlal cyermaniye twitz tja Dios, ex cyiꞌnxe tiꞌjxi campament.
5 E pontzun lakꞌeꞌ ex e jeꞌx cyiꞌn ke cyimni tucꞌix cyẍjoꞌw tiꞌjxi campament, ic tzaꞌnx otok tma Moisés.
Aju ilxix tiꞌj tuꞌn tbant cyuꞌn pal
6 Xitzun tmaꞌn Moisés te Aarón ex te Eleazar ex Itamar akeju tcyꞌajal:
—Miꞌn txi cychitpuꞌne ttzmal cywiꞌye ex miꞌn tzꞌel cysbitꞌune cyxbalune cyiꞌje te jun techal cybise, tuꞌntzun miꞌn cycyime ex tuꞌn miꞌn ttzaj tkꞌoj Dios cyiꞌj tnam xjal. Atzun cye aj Israel, baꞌn tuꞌn cybisun cyiꞌj cabe cyermaniye ma che cyim tuꞌn kꞌakꞌ ma tzaj t-samaꞌn Kman. 7 Ax icx miꞌn che el lakꞌeꞌye ttzi ja xbalun te mojbabl tibil tuꞌntzun miꞌn cycyime, porque o che xjansete tuꞌn aseyt te Kman.
Banttzun cyuꞌn ic tzaꞌnx xi tmaꞌn Moisés cye.
8 Ax icx tzaj yolin Kman tucꞌil Aarón ex tma:
9 Aya ex ke tcyꞌajala, oc cyocxe tuj ja xbalun te mojbabl tibil, miꞌn txi cycꞌaꞌne vin ex mi kꞌeꞌn, tuꞌntzun miꞌn cycyime; atzun jun ley jlu cyjel ten cyucꞌile te jumajx tuꞌn tajben cyeye, ex wikinwik tuꞌn tcyaj cymaꞌne cye cycꞌwaꞌle, 10 tuꞌntzun tel cynicꞌe tiꞌj alcye xjan ex alcye mya xjan, alcye sak ex alcye tzꞌil, 11 ex tuꞌn tbant cykꞌoꞌne xnakꞌtzbil cye aj Israel tiꞌj tcyakil ley xi nkꞌoꞌne te Moisés, chi Kman.
12 Ax icx xi tmaꞌn Moisés te Aarón, te Eleazar ex te Itamar, akeju cabe tcyꞌajal Aarón otok che cyaj ten:
—Cyiꞌnxe aju oyaj tiꞌj twitz awal, aju ma cyaj sobryin cyiꞌj ke oyaj ma che cub patit te Kman, ex ax cywaꞌnxe twitz altar, pero miꞌn txi cykꞌoꞌne t-samel tuj tuꞌn tjaw mal tcꞌuꞌj, porque a jlu xjanxix. 13 Cxel cywaꞌne tuj jun lugar xjan, porque atzun jlu cꞌoquel te teya ex cye ke tcyꞌajala tiꞌj oyaj patun in cub te Kman. Atzun jlu ma tzaj kꞌmaꞌn weye. 14 Aju ttzi t-xuꞌc alumaj in xi yucut twitz Kman, tucꞌix tcux in xi yecꞌut te, baꞌn tuꞌn t-xi cychyoꞌne tuj jun lugar sak, aya cyucꞌix ke tcyꞌajala ex ke tmeꞌjela, porque atzun jlu cꞌajbel cyeye cyiꞌj ke chojbil in xi cykꞌoꞌn aj Israel te mojbabl tibil. 15 Junx ctzajel kꞌit t-sebyil alumaj tuꞌn tcub patit, ex tcux in xi yecꞌut twitz Kman ex ttzi t-xuꞌc in xi yucut twitz. A jlu teya cꞌajbel ex te cye ke tcꞌwaꞌla te jumajx, ic tzaꞌnx o tzaj tmaꞌn Kman.
16 Xi tkanin Moisés tiꞌj tman chip aju otok xi kꞌot te chojbil il, ex o tbi ka otok cub patit. Tzajtzun tkꞌoj tiꞌj Eleazar ex tiꞌj Itamar, akeju cabe tcyꞌajal Aarón otok che cyaj ankꞌin, ex xi tmaꞌn cye: 17 —¿Tikuꞌn mintiꞌ ma txi cychyoꞌne tuj jun lugar xjan aju chojbil in xi kꞌot te chojbil il? A jlu xjanxix te, ex o tzaj tkꞌoꞌn Kman cyeye tuꞌntzun tel cyiꞌne aju cyil tnam xjal ex tuꞌn tnajset cyil cyuꞌne twitz Kman. 18 Ex tuꞌnju mintiꞌ ma txi cyiꞌne chicꞌ tuj tja Dios, iltok tiꞌj tuꞌn t-xi cychyoꞌne aju chojbil lu tuj jun lugar xjan, ic tzaꞌn xi nmaꞌne cyeye, chi Moisés.
19 Atzunte Aarón xi ttzakꞌweꞌn: