Tej ttzyet takꞌnan Aarón te pal
9
Tuj twajxakin kꞌij txquettzun Aarón tuꞌn Moisés cyucꞌix ke tcyꞌajal ex ke cytijil xjal cyxol aj Israel, 2 ex xi tmaꞌn te Aarón cyjaꞌ: Kꞌintza jun tal tor te chojbil il, tucꞌix jun tman ẍneꞌl tuꞌn t-xi kꞌot te jun oyaj patun in cub, cycabil alumaj lu mintiꞌ cypaltil, ex che tkꞌonxa te Kman. 3 Ax icx kꞌmanxa cye aj Israel tuꞌn ttzaj cyiꞌn jun tman chip te chojbil il, tucꞌix jun tal tor ex jun tal tman ẍneꞌl ma te jun abkꞌi ke ex mintiꞌ cypaltil, tuꞌntzun cyxi kꞌot te jun oyaj patun in cub, 4 tucꞌix jun tor ex jun tman ẍneꞌl tuꞌntzun cycub byet twitz Kman te jun chojbil te mojbabl tibil. Ax icx il tiꞌj tuꞌn ttzaj cyiꞌn jun oyaj tiꞌj twitz awal, chꞌin arin xyokꞌamaj tucꞌil aseyt, porque cbel tyecꞌun tib Kman cywitze jaꞌlo, chi Moisés, xi tmaꞌn cye.5 Xitzun cyiꞌn aj Israel aju otok txi tmaꞌn Moisés cye; pon cyiꞌn max ttzi ja xbalun te mojbabl tibil, ex cycyakiltzun tnam xjal e pon lakꞌeꞌ ex e cub weꞌ twitz Kman. 6 Atzunte Moisés xi tmaꞌn cye cyjaꞌ: Atzun jlu ma tzaj tmaꞌn Kman, cybinchame ex cbel tyecꞌun tib t-spicꞌumal Kman cywitze.
7 Xi tmaꞌn Moisés te Aarón: Lakꞌetza tiꞌj altar ex kꞌonxa chojbil tila, tucꞌix ju alumaj cxel tkꞌoꞌna te chojbil patun in cub te najsbil tila ex te najsbil cyil aj Israel. Ax icx kꞌonxa cyoyaj aj Israel te najsbil cyil, ic tzaꞌn o tma Kman.
8 Pontzun lakꞌeꞌ Aarón tiꞌj altar ex ocx tkesin tjakꞌ tkul tal tor tuꞌn t-xi tkꞌoꞌn te chojbil til. 9 Atzun ke tcyꞌajal e pon lakꞌbante chicꞌ, ex cuꞌxtzun tkꞌoꞌn Aarón twi tal tkꞌab tuj chicꞌ ex oc t-suꞌn cyiꞌj ke tcach altar, atzunju chicꞌ cyaj sobryin cuꞌx tkoꞌn t-xe tkan altar. 10 Cubtzun tpatun Aarón tibaj altar aju t-sebyil alumaj chojbil il, cyucꞌix ke tchenakꞌ tucꞌix ju seb tocsaꞌn tiꞌj ttxꞌotxꞌ, ic tzaꞌnx otok tma Kman te Moisés. 11 Atzunju tchibjal tucꞌix ttzꞌumal cub tpatun tiꞌjxi campament.
12 Ax icx ocx tkesin Aarón tjakꞌ tkul alumaj te oyaj patun in cub, ex atzun ke tcyꞌajal e pon lakꞌbante chicꞌ ex oc ttxꞌitoꞌn Aarón tiꞌjele tcꞌuꞌj altar. 13 Xitzun cyiꞌn ke tcyꞌajal Aarón twiꞌ alumaj patun in cub, tucꞌix ju tchibjal otok baj cypaẍuꞌn, ex cub tpatun Aarón jlu tibaj altar, 14 e baj ttxꞌjoꞌn ke tuj tcꞌuꞌj, cyucꞌix ke tkan, ex e cub tkꞌoꞌn tibaj tchibjal alumaj tibaj altar ex cub tpatun tcyakil.
15 Ax icx xi tkꞌoꞌn Aarón cyoyaj aj Israel. Tzaj tiꞌn tman chip, aju tuꞌn t-xi kꞌot te chojbil cyil tnam xjal, ocx tkesin tjakꞌ tkul ex xi tkꞌoꞌn te chojbil il, ic tzaꞌnx otok tbincha tiꞌj tal tor xi tkꞌoꞌn nej. 16 Ax icx xi tkꞌoꞌn alumaj patun in cub, ic tzaꞌnx kꞌmaꞌmaj. 17 Ax icx xi tkꞌoꞌn aju oyaj tiꞌj twitz awal; tzaj tiꞌn jun yub arin ex cub tpatun tibaj altar; part ju oyaj in cub patit te prim.
18 Ax icx ocx tkesin Aarón tjakꞌ tkul tor ex tman ẍneꞌl, aju xi cykꞌoꞌn aj Israel te jun chojbil te mojbabl tibil. Atzun ke tcyꞌajal e pon lakꞌbante chicꞌ, atzunte oc ttxꞌitoꞌn chicꞌ tiꞌjele tcꞌuꞌj altar. 19 Ax icx xi cyiꞌn t-sebyil tor, tucꞌix t-sebyil tman ẍneꞌl, tucꞌix tjeꞌ, tucꞌix seb tocsaꞌn cyiꞌj ke tuj tcꞌuꞌj, cyucꞌix te tchenakꞌ ex tucꞌix seb tocsaꞌn tiꞌj ttxꞌotxꞌ, 20 ex cubtzun cykꞌoꞌn t-sebyil alumaj tibaj ttzi t-xuꞌc. Atzunte Aarón cub tpatun seb tibaj altar, 21 atzun keju ttzi t-xuꞌc ex ke tcux alumaj tuj tbankꞌab, nok xi tyucun Aarón twitz Kman, ic tzaꞌnx otok tma Kman te Moisés.
22 Xitzun tnukpiꞌn tkꞌab Aarón cyibaj aj Israel ex e cub tcyꞌiwlaꞌn, ex t-xilenxi tkꞌoꞌn chojbil tiꞌj il, tucꞌix oyaj patun in cub ex chojbil te mojbabl tibil, eltzun lakꞌeꞌ tiꞌj altar. 23 Ocxtzun Moisés tucꞌix Aarón tuj ja xbalun te mojbabl tibil, ex tej cyetz e oc ten cyꞌiwlalte cye aj Israel. Cubtzun tyecꞌun tib t-spicꞌumal Kman cywitz cycyakil aj Israel; 24 etztzun jucpaj jun kꞌakꞌ twitz Kman ex baj tzꞌeꞌy alumaj tuꞌn, aju attok tcubil patit cyucꞌix ke seb cycubsaꞌn tibaj altar.
Tejtzun cylonte aj Israel jlu, e jaw schꞌin cycyakil tuꞌn tzalajbil, e cub ẍmejeꞌ ex pon tacl tibaj cywitz max twitz txꞌotxꞌ.