2 Kꞌintza Aarón cyucꞌix ke tcyꞌajal, ax icx kꞌintza keju cyxbalun pal, tucꞌix aseyt te xjansabl, tucꞌix jun tor tuꞌn tcub te chojbil il, cyucꞌix cabe tman ẍneꞌl ex jun tal chiꞌl pan mintiꞌ t-samel cyuj tuꞌn tjaw mal cycꞌuꞌj, 3 ex chmoꞌn oca cycyakil xjal ttzi ja xbalun te mojbabl tibil.

4 Tbinchatzun Moisés ic tzaꞌnx otok tma Kman, ex octzun cychmon cyib cycyakil xjal ttzi ja xbalun te mojbabl tibil. 5 Xitzun tmaꞌn Moisés cye cycyakil xjal cyjaꞌ: Atzun jlu ma tma Kman tuꞌn tbant.

6 Xitzun tmaꞌn Moisés tuꞌn tpon lakꞌeꞌ Aarón cyucꞌix ke tcyꞌajal ex e baj tchiꞌn tuꞌn aꞌ. 7 Te tibajxi oc tkꞌoꞌn Moisés aju ẍjowꞌ tiꞌj Aarón, ex oc tcꞌaloꞌn cꞌalbil cꞌuꞌjbaj tcꞌuꞌj ex te tiꞌjxi oc tkꞌoꞌn jun mant tiꞌj ex te tiꞌjxi lu oc tkꞌoꞌn ju tcapiẍay pal tiꞌj ex oc tcꞌaloꞌn tcꞌuꞌj tuꞌnxju cꞌalbil te capiẍay. 8 Ex tiꞌjxi capiẍay oc tkꞌoꞌn jun xbalun tbanilxix, ttzi t-xuꞌc, ex tujxitzun ju xbalun lu ocx tkꞌoꞌn Urim ex Tumim. 9 Oc tkꞌoꞌn jun xbalun te cꞌalbil twiꞌ, ex tiꞌjtzun xbalun lu oc tkꞌoꞌn jun tal tzꞌlom kꞌan pwak ttxꞌotxꞌil tibaj twitz Aarón, te jun techal ka otok tzꞌoc toclen te pal ic tzaꞌnx otok tma Kman.

10 Te tibajxi tzaj tiꞌn Moisés aseyt te xjansabl ex cub tkoꞌn chꞌin tibaj ja xbalun ex cyibaj cycyakil tiꞌxti ateꞌ tuj, ex cyjaꞌtzun tten e xjanset tuꞌn. 11 Ax ju aseyt lu xi ttxꞌitoꞌn wuk maj tibaj altar, ex cub tkoꞌn chꞌin tibaj altar ex cyibaj cycyakil macbil in che ajben tucꞌil, ax icx cub tkoꞌn chꞌin tibaj pil ex tibaj tkꞌukbil tuꞌntzun cyxjanset.

12 Cubtzun tkoꞌn Moisés aseyt te xjansabl tibaj twi Aarón tuꞌntzun t-xjanset tuꞌn toc te pal. 13 Te tibajxi e tzaj tiꞌn Moisés ke tcyꞌajal Aarón, ex oc tkꞌoꞌn cyẍjoꞌw ex oc tcꞌaloꞌn cycꞌuꞌj tuꞌn cꞌalbil cꞌuꞌjbaj, ex oc tkꞌoꞌn jun xbalun te cꞌalbil cywiꞌ, ic tzaꞌnx otok tma Kman.

14 Te tibajxi xi tmaꞌn Moisés tuꞌn ttzaj kꞌit tal tor tuꞌn t-xi kꞌot te chojbil il, atzunte Aarón cyucꞌix ke tcyꞌajal cub cykꞌoꞌn cykꞌab tibaj twiꞌ tal tor. 15 Ocxtzun tkesin Moisés tjakꞌ tkul tal tor, tzaj tiꞌn chꞌin chicꞌ cyuꞌn ke twiꞌ tal tkꞌab ex oc t-suꞌn cyiꞌj ke tcach altar tucꞌix tiꞌjele tuꞌntzun t-xjanset, atzunju chicꞌ cyaj sobryin cuꞌx tkoꞌn t-xe tkan altar. Cyjaꞌtzun tten xjanset altar tuꞌntzun tchjet cyil xjal cyuꞌn ke chojbil che xel kꞌot tibaj.

16 Ax icx tzaj tiꞌn Moisés tcyakil seb tocsaꞌn cyiꞌj ke tuj tcꞌuꞌj tor, tucꞌix seb tocsaꞌn tiꞌj ttxꞌotxꞌ ex cycabil tchenakꞌ ex seb tocsaꞌn cyiꞌj, ex cub tpatun tcyakil jlu tibaj altar; 17 atzunju tchibjal tal tor tucꞌix ttzꞌumal ex ttxaꞌ, cub tpatun tiꞌjxi campament ic tzaꞌnx otok tma Kman.

18 Te tibajxi tzaj tiꞌn Moisés jun tman ẍneꞌl tuꞌn tcub patit te jun oyaj, atzunte Aarón cyucꞌix ke tcyꞌajal cub cykꞌoꞌn cykꞌab tibaj twiꞌ tman ẍneꞌl. 19 Ocxtzun tkesin Moisés tjakꞌ tkul tman ẍneꞌl, ex oc ttxꞌitoꞌn tchcꞌel tiꞌjele tcꞌuꞌj altar, 20 cub tpaẍuꞌn tman ẍneꞌl tuj piẍun, ex ocx tpatun twiꞌ tuj kꞌakꞌ, tucꞌix chibj otok baj tpaẍuꞌn ex tucꞌix t-sebyil; 21 ex baj ttxꞌjoꞌn ke tuj tcꞌuꞌj tman ẍneꞌl tuꞌn aꞌ, cyucꞌix ke tkan ex ke tcux, ex cub tpatun tcyakil jlu tibaj altar te jun oyaj patun in cub at tcꞌocꞌjal in tzalaj Kman tiꞌj, ic tzaꞌnx otok tma Kman te Moisés.

22 Xi tmaꞌntl Moisés tuꞌn ttzaj kꞌit juntl tman ẍneꞌl, aju tuꞌn tajben te xjansabl, atzunte Aarón ex ke tcyꞌajal cub cykꞌoꞌn cykꞌab tibaj twiꞌ tman ẍneꞌl. 23 Te tibajxi ocx tkesin Moisés tjakꞌ tkul tman ẍneꞌl, tzaj tiꞌn chꞌin chicꞌ ex oc t-suꞌn tiꞌj tjeꞌ t-ẍcyin Aarón tuj tbankꞌab, tucꞌix tiꞌj tman tal tbankꞌab ex tiꞌj tman tal tkan tuj tbankꞌab. 24 Ax icx xi tmaꞌn Moisés tuꞌn cyul lakꞌeꞌ ke tcyꞌajal Aarón, ex oc t-suꞌn chꞌin chicꞌ tiꞌj tjeꞌ cyẍcyin tuj cybankꞌab, tucꞌix cyiꞌj ke tal tman cybankꞌab tucꞌix cyiꞌj ke tal tman cykan tuj cybankꞌab; atzun chicꞌ cyaj sobryin oc ttxꞌitoꞌn tiꞌjele tcꞌuꞌj altar.

25 Tzajtzun tiꞌn Moisés t-sebyil, tucꞌix tjeꞌ, tucꞌix tcyakil seb tocsaꞌn cyiꞌj ke tuj tcꞌuꞌj, tucꞌix ju tocsaꞌn tiꞌj ttxꞌotxꞌ, cyucꞌix cycabil tchenakꞌ ex ju seb tocsaꞌn cyiꞌj, ex tcux tuj tbankꞌab. 26 Tuj tal chiꞌl tcubil pan mintiꞌ t-samel cyuj tuꞌn tjaw mal cycꞌuꞌj, aju in cub ten twitz Kman, jatz tiꞌn Moisés jun pan mintiꞌ t-samel tuj tuꞌn tjaw mal tcꞌuꞌj, tucꞌix jun pan at aseyt tuj, ex jun tal pan xaxj, ex cub tkꞌoꞌn junx tucꞌil seb ex tcux alumaj tuj tbankꞌab; 27 tcyakiltzun jlu xi tkꞌoꞌn tuj tkꞌab Aarón ex tuj cykꞌab ke tcyꞌajal, tuꞌntzun t-xi cyyucun jlu te jun chojbil twitz Kman. 28 Tzajtzun tiꞌn Moisés tcyakil jlu tuj cykꞌab, ex cub tpatun tibaj altar junx tucꞌil oyaj patun in cub, te jun oyaj te xjansabl at tcꞌocꞌjal ex patun in cub te Kman.

29 Te tibajxi tzaj tiꞌn Moisés ttzi t-xuꞌc tman ẍneꞌl ex xi tyucun twitz Kman. Atzun jlu tuꞌn tel kꞌit tiꞌj tman ẍneꞌl te xjansabl, ex tuꞌn t-xi kꞌot te Moisés, ic tzaꞌnx otok tma Kman.

30 Tzaj tiꞌn Moisés chꞌin aseyt te xjansabl tucꞌix chꞌin chicꞌ tcubsaꞌn tibaj altar, ex xi ttxꞌitoꞌn tibaj Aarón ex tiꞌj t-xbalun, ax icx xi ttxꞌitoꞌn cyibaj ke tcyꞌajal ex tiꞌj cyxbalun. Cyjaꞌtzun tten o xjansanjtz Aarón tucꞌix t-xbalun, junx cyucꞌil ke tcyꞌajal tucꞌix cyxbalun.

31 Te tibajxi jlu xi tmaꞌn Moisés te Aarón ex cye tcyꞌajal: Cytxcoꞌn jaxe taꞌl chibj ttzi ja xbalun te mojbabl tibil, ex axtzun cxel cychyoꞌne tucꞌil pan te xjansabl tcuꞌx tuj chiꞌl, ic tzaꞌnx o tzaj tmaꞌn Kman weye tej tmante cyjaꞌ: A Aarón cyucꞌix ke tcyꞌajal che xel chyoꞌnte chibj lu. 32 Atzunju chibj ex pan csobryil, il tiꞌj tuꞌn tcub patit tcyakil. 33 Ex tuj wuk kꞌij miꞌn che el lakꞌeꞌye ttzi ja xbalun te mojbabl tibil; max che elel lakꞌeꞌye oc tjapun baj xjansabl cyeye, porque wuk kꞌij cxel tiꞌn tuꞌn cyxjansete. 34 O tzaj tmaꞌn Kman tuꞌn tbant jlu, ic tzaꞌn ma bant jaꞌlo, tuꞌntzun tnajset cyile. 35 Cyjaꞌtzun wuk kꞌij ax che cyjel tene kꞌijl ex konicꞌan ttzi ja xbalun te mojbabl tibil. Cynimanxe orden lu tuꞌntzun miꞌn cycyime, porque atzunju orden lu o ncꞌame tuꞌn Kman, chi Moisés, xi tmaꞌn cye.

36 Atzunte Aarón cyucꞌix ke tcyꞌajal o cybincha tcyakil ic tzaꞌnx otok tzaj tmaꞌn Kman te Moisés.