Ke ley cyiꞌj ke chojbil tiꞌj cypaltil xjal
7
Ke chojbil tiꞌj cypaltil xjal xjanxix ke, ex atzun ke ley cyiꞌj jlu: 2 Aju alumaj cxel kꞌot te chojbil tiꞌj cypaltil xjal, il tiꞌj tuꞌn tcub byet tujx lugar jatum in che cub byet alumaj patun in che cub, ex aju tchcꞌel cꞌoquel txꞌitet tiꞌjele tcꞌuꞌj altar. 3 Il tiꞌj tuꞌn t-xi kꞌot tcyakil t-sebyil alumaj: Aju seb toc tiꞌj tjeꞌ tucꞌix ju tocsaꞌn cyiꞌj ke tuj tcꞌuꞌj, 4 cyucꞌix cycabil tchenakꞌ tucꞌix seb tocsaꞌn cyiꞌj, tucꞌix seb tocsaꞌn ttzal tiꞌj, tucꞌix seb tocsaꞌn tiꞌj ttxꞌotxꞌ; a jlu junx cꞌelel kꞌit cyucꞌil ke tchenakꞌ. 5 Atzunte pal cbel patunte jlu tibaj altar te jun oyaj patun in cub te weye. Jun chojbil jlu tiꞌj cypaltil xjal. 6 Aju chojbil lu xjanxix te, oꞌcx cye pal baꞌn tuꞌn cychyoꞌn tiꞌj, pero cxel cychyoꞌn tuj jun lugar xjan porque ate jlu xjanxix te.7 Aju chojbil tiꞌj cypaltil xjal junx taꞌ tucꞌil chojbil tiꞌj il, ex aju ley junx taꞌ cyiꞌj cycabil: aju pal cxel kꞌonte chojbil til xjal, baꞌn tuꞌn tchyoꞌn tiꞌj. 8 Ax icx aju ttzꞌumal alumaj, te pal cxel kꞌot, aju cbel patunte alumaj otok pon tiꞌn jun xjal te chojbil patun in cub. 9 Ax icx cycyakil oyaj tiꞌj twitz awal tzkꞌajsamaj tuj jorni, ex tcyakilju tzkꞌajsamaj tuj cꞌil ex ka tzkꞌajsamaj tuj sartén, tex pal cxel kꞌot, aju otok txi oyinte oyaj. 10 Ax icx ctembil cycyakil oyaj tiꞌj twitz awal mya tzkꞌajsamaj, tzaꞌnxix ju xyokꞌamaj tucꞌil aseyt ex ju tzkijsamaj, cꞌajbel cye cycyakil tiyjil Aarón, ex parej cxel kꞌot cye.
Ke ley cyiꞌj ke chojbil te mojbabl tibil tucꞌil Dios
11 Atzun ke ley lu cyiꞌj ke chojbil te mojbabl tibil ctzajel cykꞌoꞌne weye: 12 Ka ma tzaj cykꞌoꞌn xjal jun chojbil te akꞌbil chjonte, ax icx baꞌn tuꞌn ttzaj cykꞌoꞌn pan xyokꞌamaj tucꞌil aseyt, tucꞌix jun wik tal pan xaxj tocsaꞌn aseyt tiꞌj, tucꞌix ju pan at aseyt tuj binchamaj tiꞌj arin tbanil, ex akeju pan lu miꞌn txi cykꞌoꞌn t-samel cyuj tuꞌn tjaw mal cycꞌuꞌj. 13 Ax icx, oc cyxi cykꞌoꞌn chojbil te akꞌbil chjonte ex te mojbabl tibil, tucꞌix pan at t-samel tuj tuꞌn tjaw mal tcꞌuꞌj cxel cykꞌoꞌn. 14 Cyiꞌj cycyakil oyaj lu cꞌelel kꞌit jun pan tiꞌj junjun txcaj, ex ctzajel toyin weye te jun oyaj; ex te tibajxi, tex pal cꞌajbel aju cbel txꞌitonte tchcꞌel alumaj te chojbil te mojbabl tibil.
15 Aju tchibjal alumaj cxel kꞌot te akꞌbil chjonte ex te mojbabl tibil, biꞌx tuꞌn tbaj cychyoꞌn tujx kꞌij oc t-xi oyit; mintiꞌ jun piẍ tuꞌn tcyaj ten te juntl kꞌij. 16 Ex katzun te chojbil tiꞌj jun yol otok japun tuꞌn xjal aju alumaj cxel kꞌot, ex ka jun oyaj nok tuꞌn tex xjal tgan, baꞌn tuꞌn t-xi cychyoꞌn tujx kꞌij oc t-xi oyit, atzunju csobryil baꞌn tuꞌn t-xi cychyoꞌn tuj juntl kꞌij; 17 ex katzun atx tchibjal alumaj cyjel ten tuj toxin kꞌij, il tiꞌj tuꞌn tcub patit tcyakil tuj kꞌakꞌ. 18 Katzun at jun ma txi chyoꞌnte tchibjal chojbil te mojbabl tibil tuj toxin kꞌij, aju chojbil lu mlay cꞌmet wuꞌne ex mlay tzꞌajben te xjal, porque aju chibj lu otok tzꞌoc te tzꞌil. Alcye ma txi chyoꞌnte jlu at til tiꞌj.
19 Tcyakil chibj ma tzꞌoc tacl tiꞌj jun tiꞌxti tzꞌil, mlay txi chyoꞌt, nok oꞌcx tuꞌn tcub patit.
Cycyakil xjal cysaksan cyib, baꞌn tuꞌn cychyoꞌn tiꞌj chibj te chojbil lu.
20 Ka at jun xjal ttzꞌilsan tib ma txi chyoꞌnte chibj otok txi kꞌoꞌn te chojbil te mojbabl tibil, aju otok tzaj kꞌoꞌn weye, biꞌx cꞌelex lajet tuꞌntzun miꞌn ttentl cyxol t-xjalil.
21 Ka at jun xjal ma tzꞌoc maconte jun tiꞌxti tzꞌil, ka t-ximlal jun xjal ttzꞌilsan tib ex ka te jun alumaj tzꞌil, ex ka nok alcyex juntl ttzꞌilil puro icꞌbil, ex ka ma txi tchyoꞌn chibj otok txi kꞌot te chojbil te mojbabl tibil aju otok tzaj kꞌoꞌn weye, biꞌx cꞌelex lajet xjal lu tuꞌntzun miꞌn ttentl cyxol t-xjalil.
Ke ley tiꞌj cysebyil ex cychcꞌel alumaj
22 Tzaj yolin Kman tucꞌil Moisés ex tma:
23 Kꞌmanxa cye aj Israel tuꞌn miꞌn t-xi cychyoꞌn t-sebyil jun tor, mi t-sebyil jun tal ẍneꞌl ex mi t-sebyil jun chip. 24 Aju cysebyil alumaj nok elajx in che cyim ex ka byoꞌn in che cub cyuꞌn ke txcup te tjakꞌ cꞌul, baꞌn tuꞌn tajben cyuꞌn, nok alcyexcu tajben, pero miꞌn txi cychyoꞌn.
25 Nok alcye jun xjal ma txi chyonte t-sebyil alumaj aju ctzajel kꞌoꞌn weye te jun oyaj patun in cub, biꞌx cꞌelex lajet tuꞌntzun miꞌn ttentl cyxol t-xjalil.
26 Nok jaxja che najale, miꞌn txi cychyoꞌne cychcꞌel ke chyuꞌj ex mi cychcꞌel alumaj. 27 Aju xjal cxel chyoꞌnte cychcꞌel nok alcyex alumaj, biꞌx cꞌelex lajet tuꞌntzun miꞌn ttentl cyxol t-xjalil.
Aju cye pal cychiꞌ tuꞌn tel kꞌit tiꞌj chojbil
28 Tzaj yolin Kman tucꞌil Moisés ex tma:
29 Kꞌmanxa cye aj Israel jlu: Ka at jun xjal ctzajel kꞌonte jun chojbil te mojbabl tibil wucꞌile, il tiꞌj tuꞌn ttzaj tkꞌoꞌn chꞌin weye. 30 Tuꞌnx tkꞌab ctzajel tkꞌoꞌn weye aju oyaj patun in cub. Ctzajel tkꞌoꞌn seb tucꞌix ttzi t-xuꞌc alumaj. Aju ttzi t-xuꞌc ctzajel tkꞌoꞌn weye, cxel tyucun nwitze; a jlu jun oyaj yucun ctzajel kꞌot nwitze. 31 Atzunte pal cbel patunte seb tibaj altar, atzun ttzi t-xuꞌc alumaj, a Aarón cxel chyonte te cyucꞌix ke tcyꞌajal. 32 Aju cxel kꞌot te pal tiꞌj chojbil te mojbabl tibil, a aju tcux alumaj tuj tbankꞌab cxel kꞌot te jun oyaj te. 33 Aju tcux alumaj cxel kꞌot te chojbil te mojbabl tibil, te pal cꞌoquel aju cxel kꞌonte t-sebyil tucꞌix chicꞌ, 34 porque cyiꞌj ke chojbil te mojbabl tibil in tzaj cykꞌoꞌn aj Israel weye, o tzꞌel npaꞌne aju ttzi t-xuꞌc, aju in xi yucun nwitze, ex aju tcux, aju in tzaj cyoyin weye, ex o txi nkꞌoꞌne te Aarón ex cye ke tcyꞌajal tuꞌn cycꞌmonte tiꞌj cyoyaj aj Israel. Aju ley lu te jumajx tuꞌn tten.
35 Cyiꞌj ke oyaj in che cub patit te chojbil weye, atzun jlu te Aarón cꞌoquel ex cye ke tcyꞌajal, atxix tuj kꞌij tej cyxjanset wuꞌne tuꞌn cyajben te pal te weye, 36 ex o txi nmaꞌne cye aj Israel tuꞌn t-xi cykꞌoꞌn jlu, atxix tuj kꞌij tej cybaj xjansaꞌn ke pal, ex a jlu jun ley cucx ctel te jumajx.
37 Atzun ke ley lu cyiꞌj ke chojbil patun in che cub, cyiꞌj ke oyaj tiꞌj twitz awal, cyiꞌj ke chojbil il ex ke chojbil tiꞌj cypaltil xjal, cyiꞌj ke oyaj te xjansabl ex cyiꞌj ke chojbil te mojbabl tibil. 38 Akeju ley lu tuꞌn Kman tzaj tmaꞌn te Moisés twi witz Sinaí, tej ttzaj tmaꞌn tuꞌn t-xi cykꞌoꞌn aj Israel cyoyaj te, tuj lugar tzkij txꞌotxꞌ Sinaí.