2 Ka at jun xjal ma binchan il nwitze tuꞌnju otok cub t-sbuꞌn jun tucꞌil tiꞌj jun tiꞌxti otok cyaj okxenan te, ex ka ma tzꞌel telkꞌaꞌn jun tiꞌxti te, ex ka otok tzꞌel tiꞌn jun tiꞌxti lajwers te, 3 ex ka ma tzꞌoc noj tiꞌj jun tiꞌxti otok cyaj tzꞌak ex ka ma cub tewan, ex ka ma txi tmaꞌn tzkan Dios ex nok tten tuꞌn, ex ka ma bant juntl mya baꞌn tuꞌn, aju in bant cyuꞌn xjal, 4 at til tiꞌj jlu. Cyjaꞌtzun il tiꞌj tuꞌn taj tkꞌoꞌn aju otok tzꞌel telkꞌaꞌn, ex ka aju otok tzꞌel tiꞌn lajwers, ex ka aju otok cyaj okxenan te, ex ka aju tiꞌxti otok tzꞌoc noj tiꞌj, 5 ex ka aju otok txi tmaꞌn tzkan Dios tiꞌj ex nok tten tuꞌn. Oc t-xi tkꞌoꞌn chojbil til, il tiꞌj tuꞌn taj tkꞌoꞌn tcyakil te tajwil, ex mya oꞌcx jlu; ax icx cxel tkꞌoꞌn tjweꞌyin tibaj twi tiꞌxti otok tzꞌel telkꞌaꞌn. 6 Aju chojbil ctzajel tkꞌoꞌn weye; cyxol ke t-ẍneꞌl cꞌeletz tiꞌn jun tman ẍneꞌl mintiꞌ tpaltil, ex aya cꞌoquel malonte te jteꞌ twiꞌ, ex cxel tiꞌn tucꞌil pal te jun chojbil tiꞌj til. 7 Cchjeteltzun til xjal tuꞌn pal nwitze, nok alcyexcu il otok tbincha, ex cnajseteltzun til.

8 Tzaj yolin Kman tucꞌil Moisés ex tma:

9 Kꞌmanxa te Aarón ex cye tcyꞌajal aju ley cyiꞌj ke chojbil patun in che cub: Aju alumaj cxel kꞌot te chojbil, tuj enter konicꞌan il tiꞌj tuꞌn tcyaj cykꞌoꞌn tibaj xkꞌaꞌl tcubsaꞌn tibaj altar, ocxi tjawil kꞌij, ex il tiꞌj tuꞌn miꞌn tyupj kꞌakꞌ. 10 Atzunte pal cꞌoquel tkꞌoꞌn t-xbalun tucꞌix tcalsonsiy banimaj tiꞌj nokꞌ lino; ex ctzajel tiꞌn ttzaꞌjil alumaj, aju otok cub tzꞌeꞌy tibaj altar, ex cbel tkꞌoꞌn ttxlaj altar. 11 Te tibajxi cꞌelel tchꞌexpuꞌn t-xbalun ex cꞌelex tiꞌn tzaꞌj tuj jun lugar sak tiꞌjxi campament.

12 Miꞌnx cuꞌx yupit kꞌakꞌ in cꞌant tibaj altar. Tcyakil prim cbel tkꞌoꞌn pal siꞌ tibaj, ex cbel tkꞌoꞌn pal alumaj patun in cub tibaj kꞌakꞌ, ax icx cbel tpatun tibaj altar cysebyil ke chojbil te mojbabl tibil wucꞌile. 13 Cucx ccꞌantel kꞌakꞌ tibaj altar. Miꞌnx cuꞌx yupit.

14 Atzun ke ley lu cyiꞌj ke oyaj tiꞌj twitz awal: Ake pal che tzajel oyinte nwitze, twitz altar. 15 Ex atzun jun cye ctzajel tiꞌn jun yub arin tucꞌix chꞌin aseyt, junx tucꞌil tcyakil storac otok pon kꞌiꞌn te oyaj, ex cbel tpatun tibaj altar, te jun oyaj cucx tuꞌn ttzaj naꞌt xjal tiꞌj, jun oyaj patun in cub at tcꞌocꞌjal in chin tzalaje tiꞌj. 16 Ex atzunju csobryil tiꞌj oyaj lu cxel twaꞌn Aarón cyucꞌix ke tcyꞌajal, pero miꞌn txi cykꞌoꞌn t-samel tuj tuꞌn tjaw mal tcꞌuꞌj. Atzun che waꞌl tiꞌj tuj jun lugar xjansamaj, ttxaꞌn tpeꞌn ja xbalun te mojbabl tibil. 17 Miꞌn baj cytzkꞌajsaꞌn tucꞌil t-samel tuj tuꞌn tjaw mal tcꞌuꞌj. O txi nkꞌoꞌne chꞌin cye cyiꞌj oyaj patun in che cub in tzaj kꞌoꞌn weye. Ex a jlu xjanxix ic tzaꞌnx ke chojbil tiꞌj il ex tiꞌj cypaltil xjal. 18 Cycyakil ke xinak tiyjil Aarón che ul itzꞌj te tibajxi, at cyoclen tuꞌn cywaꞌn tiꞌj oyaj in cub patit te weye, ex a jlu jun ley cucx ctel te jumajx. Nok alcyexcu jun tiꞌxti ma tzꞌoc tacl cyiꞌj ke oyaj lu, biꞌx cxjansetel.

19 Tzaj yolin Kman tucꞌil Moisés ex tma:

20 Atzun ke toyaj Aarón jlu, ex ke cyoyaj tiyjil, aju tuꞌn ttzaj cykꞌoꞌn weye oc cyxjanset tuꞌn cyoc te pal: Cabe libr arin mas tbanil, te oyaj tiꞌj twitz awal; mij cxel cykꞌoꞌn te prim ex mijtl te kale; aju oyaj lu tcyakil kꞌij cxel cykꞌoꞌn. 21 Il tiꞌj tuꞌn tbaj cybinchaꞌn oyaj lu tuj jun sartén, otok baj xyokꞌit wen tucꞌil aseyt, ex ctzajeltzun cykꞌoꞌn paẍuꞌmajtl, te jun oyaj at tcꞌocꞌjal in chin tzalaje tiꞌj. 22 Ictzun ctembil tuꞌnju tnejel pal tiyjil Aarón, aju cxjansetel tuꞌn toc te t-xel Aarón; a jlu jun ley wuꞌne cucx ctel, ex aju oyaj lu biꞌx cbel patit te jumajx. 23 Tcyakil cyoyaj ke pal tiꞌj twitz awal biꞌx che bel patit te jumajx; mi jun baꞌn tuꞌn t-xi waꞌnte te.

24 Tzaj yolin Kman tucꞌil Moisés ex tma:

25 Kꞌmanxa te Aarón ex cye ke tcyꞌajal aju ley cyiꞌj ke chojbil il: Il tiꞌj tuꞌn tcub cybyoꞌn alumaj cxel kꞌot te chojbil nwitze tujx lugar jatum in che cub byet ke alumaj patun in che cub; aju chojbil lu xjanxix te. 26 Aju pal cxel kꞌonte chojbil il, baꞌn tuꞌn tchyoꞌn tiꞌj, pero il tiꞌj tuꞌn t-xi tchyoꞌn tuj jun lugar xjan ttxaꞌn tpeꞌn ja xbalun te mojbal tibil. 27 Nok alcyexcu jun tiꞌxti cꞌoquel tacl tiꞌj tchibjal alumaj lu, biꞌx cxjansetel, ex ka ma tzꞌoc txꞌitj chꞌin chicꞌ tiꞌj jun xbalun, baꞌn tuꞌn tjatz txꞌjoꞌn tiꞌj tuj jun lugar xjan. 28 Ka txꞌotxꞌ ttxꞌotxꞌil cꞌil jatum cjawix txquet taꞌl chibj te oyaj lu, il tiꞌj biꞌx cbel paꞌt cꞌil; katzun kꞌan cꞌuxbil ttxꞌotxꞌil cꞌil, oꞌcxtzun tuꞌn tbaj jakut twitz ex tuꞌn ttxꞌjet tuꞌn aꞌ.

29 Aju chojbil il xjanxix te. Oꞌcx ke pal cyucꞌix ke cycyꞌajal baꞌn tuꞌn cychyoꞌn tiꞌj. 30 Pero mlay txi cychyoꞌn jun alumaj in xi kꞌit tchcꞌel tuj ja xbalun te mojbabl tibil tuꞌn tnajset il. Aju chojbil lu, il tiꞌj tuꞌn tocx patit tuj kꞌakꞌ.