2 Ax icx ka at jun xjal ma tzꞌoc maconte jun tiꞌxti tzꞌil, ic tzaꞌn t-ximlal jun jil tzꞌil ex cyimni, ka jun txcup ex ka jun alumaj, ex ka t-ximlal jun jil tzꞌil jakuꞌn in xiꞌ tcꞌuꞌj twitz txꞌotxꞌ, ax icx ctzꞌilixtel xjal tuꞌn jlu, ex at til tiꞌj, masque mintiꞌ otok tnaꞌ oc ticꞌ tacl tiꞌj.

3 Ka at jun xjal ma tzꞌoc maconte t-ximlal jun xjal ttzꞌilsan tib nok tuꞌn alcyexcu ttzꞌilil, ex ka mintiꞌ ma tzꞌel tnicꞌ tiꞌj, ex ka te tibajxi cꞌelel tnicꞌ tiꞌj, at til tiꞌj jlu.

4 Ka at jun xjal ma txi tziyante jun yol jurat naj, ka baꞌn ex ka mya baꞌn ju yol, ex ka mya ximamaj tuꞌn, ex ka mintiꞌ ma tzꞌel tnicꞌ tiꞌj tujx or lu, pero ka te tibajxi cꞌelel tnicꞌ tiꞌj, at til tiꞌj jlu.

5 Aju xjal cbinchalte il nok alcyexcu jun cyxol ke jlu, il tiꞌj tuꞌn tjatz tpaꞌn aju il otok tbincha, 6 ex il tiꞌj tuꞌn ttzaj tkꞌoꞌn jun ttxu ẍneꞌl ex ka jun ttxu chip te weye te chojbil il otok tbincha; ex tuꞌntzun chojbil lu cchjetel til xjal tuꞌn pal.

7 Katzun mintiꞌ tpwak xjal tuꞌn tlakꞌet jun ttxu ẍneꞌl tuꞌn, baꞌn tuꞌn ttzaj tiꞌn cabe ẍpoꞌk ex ka cabe tal paloma te weye, te chojbil il otok tbincha: jun te chojbil il, atzun juntl te jun oyaj patun in cub. 8 Che tzajel tiꞌn tucꞌil pal, atzunte pal, tnejel cxel tkꞌoꞌn ẍpoꞌk aju cꞌajbel te chojbil il. Cjawil tbalkꞌiꞌn tiꞌj tkul, pero miꞌn tzꞌel ttzakan twiꞌ te jumajx; 9 ex cꞌoquel ttxꞌitoꞌn chꞌin chicꞌ te chojbil il tiꞌj jun pacꞌ tcꞌuꞌj altar, ex aju chicꞌ csobryil cbelex tyatzꞌoꞌn t-xe tkan altar, tuꞌnju chojbil il jlu. 10 Atzun tcabin ẍpoꞌk cbel patit te oyaj ic tzaꞌnx banimaj tiꞌj; cyjaꞌtzun tten cchjetel tuꞌn pal aju il otok tbincha xjal, ex cnajseteltzun til.

11 Katzun mintiꞌ tpwak xjal tuꞌn cylakꞌet cabe ẍpoꞌk ex ka cabe tal paloma, baꞌn tuꞌn ttzaj tiꞌn cabe libr arin tbanilxix te jun oyaj te chojbil til. Miꞌn txi tkꞌoꞌn aseyt tuj ex miꞌn cub tkꞌoꞌn storac tibaj, porque jun oyaj te chojbil il jlu. 12 Cpol tiꞌn tucꞌil pal, atzunte pal ctzajel tiꞌn jun yub arin ex cbel tpatun tibaj altar, junx cyucꞌil ke oyaj patun in che cub nwitze te jun oyaj cucx tuꞌn ttzaj naꞌt xjal tiꞌj. Jun oyaj te chojbil il jlu, 13 tuꞌntzun tchjet tuꞌn pal nok alcyex il otok tbincha xjal, ex cnajseteltzun til. Aju oyaj csobryil, te pal cꞌajbel, ic tzaꞌnx in binchet tiꞌj oyaj twitz awal.

14 Tzaj yolin Kman tucꞌil Moisés ex tma cyjaꞌ:

15 Ka at jun xjal nok minaben ma tzꞌel tiꞌn chꞌin cyiꞌj ke oyaj xjansamaj te Kman, il tiꞌj tuꞌn tetz tiꞌn cyxol ke t-xneꞌl jun tman ẍneꞌl mintiꞌ tpaltil tuꞌn t-xi tkꞌoꞌn te chojbil til. Il tiꞌj tuꞌn toc malet jteꞌ twiꞌ tuꞌn sak pwak ic tzaꞌnx malbil in ajben tuj tja Dios. A jlu jun chojbil tiꞌj til. 16 Cꞌajel tkꞌoꞌn aju otok tzꞌel tiꞌn cyiꞌj ke oyaj xjansamaj te Kman ex cxel tkꞌoꞌn tjweꞌyin tibaj; cxel tkꞌoꞌn te pal, ex tuꞌntzunju tman ẍneꞌl lu cchjetel til xjal tuꞌn pal, ex cnajseteltzun til.

17 Ka at jun xjal ma binchan il tuꞌnju in tbinchaꞌn jun tiꞌxti mya ic tzaꞌn in cymaꞌn ke nmandamyente, masque mintiꞌ otok tzꞌel tnicꞌ tiꞌj pero at til tiꞌj, ex il tiꞌj cchjetel tuꞌn. 18 Cyjaꞌtzun ctzajel tiꞌn jun tman ẍneꞌl mintiꞌ tpaltil cyxol ke t-ẍneꞌl, ex aya cꞌoquel malonte te jteꞌ twiꞌ, ex cxel tiꞌn tucꞌil pal te jun chojbil til, cyjaꞌtzun cchjetel tuꞌn pal aju il nok minaben otok tbincha xjal, ex cnajseteltzun til.

19 Jun chojbil tiꞌj il jlu, porque aju xjal lu at til nwitze.