3 Ka a tnejel pal ma binchan il, ex tuꞌn jlu in tzaj tiꞌn mya baꞌn cyibaj tnam xjal, il tiꞌj tuꞌn ttzaj tkꞌoꞌn weye jun tal tor mintiꞌ tpaltil, te chojbil il otok tbincha. 4 Ctzajel tiꞌn nwitze ttzi ja xbalun te mojbabl tibil; atzun cbel tkꞌoꞌn tkꞌab tibaj twiꞌ tal tor, ex cꞌoquex tkesin tjakꞌ tkul alumaj nwitze. 5 Te tibajxi, axju tnejel pal cxel kꞌinte chꞌin tchcꞌel tal tor tuꞌn tpon tiꞌn tuj ja xbalun te mojbabl tibil; 6 atzun cbelex tmuꞌn twiꞌ tal tkꞌab tuj chicꞌ ex cbel ttxꞌitoꞌn wuk maj nwitze tumlal xbalun tcub tuj tmij njaye. 7 Ax icx cꞌoquel t-suꞌn chꞌin chicꞌ cyiꞌj ke tcach altar te patbil storac at tcꞌocꞌjal, aju tcubsaꞌn nwitze tuj ja xbalun te mojbabl tibil, ex tcyakiltzunju chicꞌ csobryil cbelex tkoꞌn t-xe tkan altar te patbil chojbil, aju tcubsaꞌn twitz ja xbalun te mojbabl tibil. 8 Cꞌelel tiꞌn tiꞌj tal tor te chojbil il tcyakil seb tocsaꞌn cyiꞌj ke tuj tcꞌuꞌj, 9 cyucꞌix ke cabe tchenakꞌ, tucꞌix seb tocsaꞌn ttzal tiꞌj ex seb tocsaꞌn tiꞌj ttxꞌotxꞌ; a jlu cꞌelel tiꞌn junx cyucꞌil ke tchenakꞌ, 10 ic tzaꞌnx nneꞌl kꞌit tiꞌj tal tor, in xi kꞌot te oyaj te mojbabl tibil wucꞌile. Ex ax te pal cbel patunte tibaj altar te patbil chojbil. 11 Atzunju ttzꞌumal tal tor tucꞌix tcyakil tchibjal, tucꞌix twiꞌ, cyucꞌix ke tkan, cyucꞌix ke tuj tcꞌuꞌj ex ttxaꞌ, 12 ex ka tcyakilcu t-ximlal tal tor, cꞌelex tiꞌn tuj jun lugar sak tiꞌjxi campament, tuj lugar jatum nneꞌx ket tzaꞌj, ex tibajtzun tzaꞌj lu, cbel tkꞌoꞌn siꞌ ex cꞌoquel tkꞌoꞌn tkꞌakꞌal.

13 Katzun cycyakil aj Israel ma che binchan il ex ka ma che icꞌ cyibaj ke nmandamyente, tuꞌnju mintiꞌ baꞌn cyuꞌn ka mya baꞌn aju otok cybincha, ex ka ma cybincha jun tiꞌxti kꞌmaꞌmaj tuꞌn miꞌn cybinchante, ex ka mi jun ma tzꞌel tnicꞌ tiꞌj ka otok che binchan il; masque icju, at cyil tiꞌj. 14 Octzun tel cynicꞌ tiꞌj il otok cybincha, il tiꞌj tuꞌn t-xi cykꞌoꞌn jun tal tor te chojbil cyil. Cxel cyiꞌn twitz ja xbalun te mojbabl tibil, 15 atzun ke cytijil xjal te tnam cbel cykꞌoꞌn cykꞌab tibaj twiꞌ tal tor nwitze, ex axtzun cꞌoquex cykesin tjakꞌ tkul alumaj. 16 Atzunte tnejel pal cxel tiꞌn chꞌin tchcꞌel tal tor tuj ja xbalun te mojbabl tibil, 17 cbelex tmuꞌn tal tkꞌab tuj chicꞌ ex cxel ttxꞌitoꞌn wuk maj nwitze tumlal xbalun tcub tuj tmij njaye. 18 Ax icx cꞌoquel t-suꞌn chꞌin chicꞌ cyiꞌj ke tcach altar tcubsaꞌn nwitze tuj ja xbalun te mojbabl tibil. Ex tcyakil chicꞌ csobryil, cbelex tkoꞌn t-xe tkan altar te patbil chojbil, aju tcubsaꞌn twitz ja xbalun te mojbabl tibil. 19 Ax icx cꞌelel tiꞌn tcyakil t-sebyil tal tor, ex cbel tpatun tibaj altar. 20 Ax cbantel tiꞌj tal tor lu ic tzaꞌn in bant tiꞌj tal tor in xi kꞌot te chojbil il; cyjaꞌtzun tten cchjetel cyil xjal tuꞌn pal, ex cnajsetel cyil. 21 Cꞌelex tiꞌn tal tor tiꞌjxi campament ex cbel tpatun, icx ctembil tuꞌn ic tzaꞌnx otok tbincha tiꞌj tnejel tal tor, porque chojbil cyil tnam xjal alumaj lu.

22 Katzun jun nejenel ma binchan il, ex ka ma tzicꞌ cyibaj ke nmandamyente, akine Tdios, tuꞌnju mintiꞌ baꞌn tuꞌn ka mya baꞌn, ex otok tbincha jun tiꞌxti kꞌmaꞌmaj tuꞌn miꞌn tbinchante, at til tiꞌj jlu. 23 Octzun tel tnicꞌ tiꞌj aju il otok tbincha, il tiꞌj tuꞌn t-xi tiꞌn jun tman chip mintiꞌ tpaltil te chojbil til. 24 Cbel tkꞌoꞌn tkꞌab tibaj twiꞌ tman chip, ex cꞌoquex tkesin tjakꞌ tkul alumaj nwitze tuj lugar jatum in che cub byoꞌn ke alumaj patun in che cub, porque chojbil il jlu. 25 Atzunte pal ctzajel tiꞌn tuꞌn twiꞌ tal tkꞌab chꞌin tchcꞌel alumaj otok txi kꞌot te chojbil il, ex cꞌoquel t-suꞌn cyiꞌj ke tcach altar te patbil chojbil, ex tcyakilju chicꞌ csobryil cbelex tkoꞌn t-xe tkan altar, 26 ex cbel tpatun pal tcyakil t-sebyil alumaj tibaj altar, ic tzaꞌn in tenba t-sebyil alumaj in xi kꞌot te chojbil te mojbabl tibil wucꞌile. Cyjaꞌtzun cchjetel til nejenel tuꞌn pal, ex cnajseteltzun til.

27 Katzun nok elajx jun xjal ma binchan il, ex ka ma tzicꞌ cyibaj ke nmandamyente tuꞌnju mintiꞌ baꞌn tuꞌn ka otok tbincha jun tiꞌxti kꞌmaꞌmaj tuꞌn miꞌn tbinchante, ax at til tiꞌj. 28 Octzun tel tnicꞌ tiꞌj il otok tbincha, il tiꞌj tuꞌn ttzaj tiꞌn jun ttxu chip mintiꞌ tpaltil te chojbil il otok tbincha. 29 Cbeltzun tkꞌoꞌn tkꞌab tibaj twiꞌ ttxu chip, aju cxel tkꞌoꞌn te chojbil til, ex cꞌoquex tkesin tjakꞌ tkul alumaj tuj lugar jatum in cub patit chojbil. 30 Atzunte pal ctzajel tiꞌn chꞌin chicꞌ tuꞌn twiꞌ tal tkꞌab ex cꞌoquel t-suꞌn cyiꞌj ke tcach altar te patbil chojbil, ex tcyakil chicꞌ csobryil cbelex tkoꞌn t-xe tkan altar. 31 Ax icx cꞌelel tiꞌn tcyakil t-sebyil, ic tzaꞌnx nneꞌl kꞌit tiꞌj alumaj in xi kꞌot te chojbil te mojbabl tibil wucꞌile, ex cbel tpatun tibaj altar te jun oyaj at tcꞌocꞌjal in chin tzalaje tiꞌj. Cyjaꞌtzun cchjetel til xjal tuꞌn pal, ex cnajseteltzun til. 32 Katzun jun ẍneꞌl ma tzaj tiꞌn xjal te chojbil til, il tiꞌj tuꞌn ttzaj tiꞌn jun ttxu ẍneꞌl mintiꞌ tpaltil. 33 Cbel tkꞌoꞌn tkꞌab tibaj twiꞌ ttxu ẍneꞌl, ex cꞌoquex tkesin tjakꞌ tkul alumaj te chojbil il, tuj lugar jatum in che cub byoꞌn ke alumaj patun in che cub. 34 Atzunte pal ctzajel tiꞌn tuꞌn twiꞌ tal tkꞌab chꞌin tchcꞌel alumaj otok txi kꞌot te chojbil il, ex cꞌoquel t-suꞌn cyiꞌj ke tcach altar te patbil chojbil, ex tcyakil chicꞌ csobryil cbelex tkoꞌn t-xeꞌ tkan altar, 35 ex cꞌelel tiꞌn tcyakil t-sebyil, ic tzaꞌnx nneꞌl kꞌit tiꞌj tal tman ẍneꞌl in xi kꞌot te jun chojbil te mojbabl tibil wucꞌile, ex cbel tpatun t-sebyil tibaj altar, junx cyucꞌil ke oyaj patun in che cub nwitze. Cyjaꞌtzun cchjetel til xjal tuꞌn pal, ex cnajseteltzun til.