Ke chojbil te mojbabl tibil tucꞌil Dios
3
Ka at jun ma tzꞌetz kꞌinte jun vac ex ka jun tor cyxol ke twacẍ tuꞌn ttzaj tkꞌoꞌn weye te jun chojbil te mojbabl tibil wucꞌile, aju alumaj ctzajel tkꞌoꞌn il tiꞌj mintiꞌ tpaltil. 2 Aju xjal cxel kꞌonte oyaj cbel tkꞌoꞌn tkꞌab tibaj twi alumaj, ex cꞌoquex tkesin tjakꞌ tkul twitz ja xbalun te mojbabl tibil. Atzun cye pal, akeju tiyjil Aarón, cꞌoquel cytxꞌitoꞌn chicꞌ tiꞌjele tcꞌuꞌj altar.3 Ex aju seb tocsaꞌn cyiꞌj ke tuj tcꞌuꞌj alumaj ctzajel tkꞌoꞌn xjal te jun chojbil te mojbabl tibil wucꞌile, te jun oyaj patun in cub, 4 cyucꞌix ke tchenakꞌ tucꞌix seb tocsaꞌn cyiꞌj, tucꞌix seb tocsaꞌn ttzal tiꞌj, tucꞌix seb toc tiꞌj ttxꞌotxꞌ; a jlu cꞌelel tiꞌn junx cyucꞌil ke tchenakꞌ. 5 Atzun cye pal akeju tiyjil Aarón, cbel cypatun tcyakil jlu tibaj altar, tibaj chojbil tcub tibaj siꞌ in cꞌant tuꞌn kꞌakꞌ te jun oyaj patun in cub, at tcꞌocꞌjal in chin tzalaje tiꞌj.
6 Katzun ẍneꞌl toyaj xjal ctzajel tkꞌoꞌn te jun chojbil te mojbabl tibil wucꞌile, baꞌn tuꞌn ttzaj tkꞌoꞌn jun tman ẍneꞌl ex ka jun ttxuꞌ, pero il tiꞌj mintiꞌ tpaltil. 7 Katzun tal ẍneꞌl toyaj ctzajel tkꞌoꞌn oc tpon tiꞌn nwitze, 8 cbel tkꞌoꞌn tkꞌab tibaj twiꞌ tal ẍneꞌl, ex te tibajxi cꞌoquex tkesin tjakꞌ tkul twitz ja xbalun te mojbabl tibil. Atzun cye pal akeju tiyjil Aarón, cꞌoquel cytxꞌitoꞌn chicꞌ tiꞌjele tcꞌuꞌj altar.
9 Ax icx cxel tkꞌoꞌn xjal t-sebyil alumaj, tucꞌix tjeꞌ ctzajelx tkesin max t-xe tkꞌukbil, tucꞌix seb tocsaꞌn cyiꞌj ke tuj tcꞌuꞌj, te jun chojbil te mojbabl tibil wucꞌile, ex te jun oyaj patun in cub, 10 cyucꞌix ke tchenakꞌ tucꞌix seb tocsaꞌn cyiꞌj, tucꞌix seb tocsaꞌn ttzal tiꞌj, tucꞌix seb toc tiꞌj ttxꞌotxꞌ; a jlu cꞌelel tiꞌn junx cyucꞌil ke tchenakꞌ. 11 Atzun cye pal cbel cypatun tcyakil jlu tibaj altar, ic tzaꞌn wabj patun in cub te jun oyaj te nimbil weye.
12 Katzun chip toyaj xjal ctzajel tkꞌoꞌn, oc tpon tiꞌn nwitze 13 cbel tkꞌoꞌn tkꞌab tibaj twi chip, ex te tibajxi cꞌoquex tkesin tjakꞌ tkul twitz ja xbalun te mojbabl tibil; atzun cye pal akeju tiyjil Aarón, cꞌoquel cytxꞌitoꞌn chicꞌ tiꞌjele tcꞌuꞌj altar.
14 Cxel tkꞌoꞌn xjal tcyakil seb tocsaꞌn cyiꞌj ke tuj tcꞌuꞌj chip te jun oyaj patun in cub te nimbil weye, 15 cyucꞌix ke tchenakꞌ tucꞌix seb tocsaꞌn cyiꞌj, tucꞌix seb toc ttzal tiꞌj, tucꞌix seb toc tiꞌj ttxꞌotxꞌ; a jlu cꞌelel tiꞌn junx cyucꞌil ke tchenakꞌ. 16 Atzunte pal cbel tpatun tcyakil jlu tibaj altar, ic tzaꞌn wabj patun in cub te jun oyaj at tcꞌocꞌjal in chin tzalaje tiꞌj. Porque weye tcyakil cysebyil alumaj, il tiꞌj tuꞌn ttzaj kꞌot weye.
17 Cyjel ten ju ley lu cyucꞌile te jumajx, tuꞌn tajben te cyeye ex cye cyiyjile nok alcyex lugar che tele: Miꞌn txi cychyoꞌne seb ex mi chicꞌ.