Ke oyaj tiꞌj twitz awal
2
Ka at jun ma tzaj kꞌinte jun oyaj te Kman tiꞌj twitz awal, baꞌn tuꞌn ttzaj tiꞌn aju arin mas tbanilxix, ex cbel tkoꞌn aseyt tibaj tucꞌix storac; 2 ex cxel tiꞌn cyucꞌil ke pal akeju tcyꞌajal Aarón, ex atzun jun cye cxel tiꞌn jun yub arin tucꞌix aseyt, junx tucꞌil tcyakil storac, ex cbel tpatun tibaj altar te jun oyaj cucx tuꞌn ttzaj naꞌt xjal tiꞌj; jun oyaj patun in cub at tcꞌocꞌjal in chin tzalaje tiꞌj. 3 Ex atzunju csobryil tiꞌj oyaj, cꞌajbel te Aarón ex ke tiyjil. Aju oyaj lu xjansamajxix junx cyucꞌil ke oyaj patun in che cub te nimbil weye.4 Ka ma txi cykꞌoꞌne jun oyaj tiꞌj twitz awal tzkꞌajsamaj tuj jorni, cybinchame ke pan tiꞌj tbanil arin xyokꞌamaj tucꞌil aseyt, pero miꞌn txi cykꞌoꞌne t-samel tuj tuꞌn tjaw mal tcꞌuꞌj, ex ka aju pan xaxj mintiꞌ t-samel tuj tuꞌn tjaw mal tcꞌuꞌj ex suꞌn aseyt cyiꞌj.
5 Ka ma txi cykꞌoꞌne cyoyaje twitz awal tzkꞌajsamaj tuj sartén, cykꞌonxe aju arin mas tbanil, xyokꞌamaj tucꞌil aseyt ex mintiꞌ t-samel tuj tuꞌn tjaw mal tcꞌuꞌj; 6 cbel cypiẍune ex cbel cykꞌoꞌne aseyt tibaj, jun oyaj jlu tiꞌj twitz awal.
7 Ka ma txi cykꞌoꞌne cyoyaje twitz awal tzkꞌajsamaj tuj xcꞌoꞌn, cykꞌonxe aju arin mas tbanil tucꞌix aseyt tuꞌn t-xiꞌ tuj. 8 Octzun tbant tten cyoyaje ctzajel cykꞌoꞌne weye cyiꞌj ke tiꞌxti lu, baꞌn tuꞌn t-xi cykꞌoꞌne te pal, atzunte pal cxel kꞌinte te max twitz altar. 9 Cꞌeleltzun tiꞌn pal chꞌin tiꞌj oyaj lu tuꞌn tcub tpatun tibaj altar te jun oyaj cucx tuꞌn ttzaj naꞌt xjal tiꞌj, patun in cub, at tcꞌocꞌjal in chin tzalaje tiꞌj. 10 Ex atzunju csobryil tiꞌj oyaj cꞌajbel te Aarón ex cye tiyjil. Aju oyaj lu xjansamaj cyxol ke oyaj in che cub patit te nimbil weye.
11 Miꞌn txi cykꞌoꞌne t-samel tuꞌn tjaw mal tcꞌuꞌj tuj oyaj aju ctzajel cykꞌoꞌne weye tiꞌj twitz awal, porque mi jun wik t-samel ex mi taꞌl cab cbel cypatune te jun oyaj weye. 12 Baꞌn tuꞌn ttzaj cykꞌoꞌne weye aju oyaj at t-samel tuj tuꞌn tjaw mal tcꞌuꞌj ex ka taꞌl cab, ic tzaꞌn ke oyaj tiꞌj tnejel twitz awal, pero mlay cub patit tibaj altar ic tzaꞌn oyaj at tcꞌocꞌjal.
13 Baꞌn tuꞌn toc cykꞌoꞌne atzꞌan cyiꞌj cycyakil cyoyaje twitz awal, ex miꞌn tzicꞌ tnaꞌl cyuꞌne tuꞌn toc atzꞌan tiꞌj cyoyaje; porque aju atzꞌan in ajben tuꞌn ttzaj naꞌt aju yol o cyaj bant tiꞌj wuꞌne cyucꞌile. Cyiꞌj cycyakil cyoyaje baꞌn tuꞌn toc cykꞌoꞌne atzꞌan.
14 Ka ma tzaj cykꞌoꞌne cyoyaje weye tiꞌj tnejel twitz cyawale, baꞌn tuꞌn ttzaj cykꞌoꞌne jun cheꞌl txꞌiꞌlimaj tuj kꞌakꞌ, ex paꞌmx twiꞌ. 15 Cbel cykꞌoꞌne aseyt tucꞌix storac tibaj, tuꞌnju oyaj tiꞌj twitz awal jlu. 16 Cbeltzun tpatun pal chꞌin twitz awal otok baj paꞌmx twiꞌ, tucꞌix chꞌin aseyt ex tcyakil storac, te jun oyaj cucx tuꞌn ttzaj naꞌt xjal tiꞌj, patun in cub te nimbil weye.