O cyile tcyakilju o tbincha Kman tuj txꞌotxꞌ Ejipt tiꞌj Faraón, ex cyiꞌj ke xjal at cyoclen ttxlaj ex tiꞌj tcyakil ttanmi, 3 ex akeye testiw cyiꞌj ke nmak cꞌixbisabl, ke techal ex ke binchben nim cyipumal e bant. 4 Pero asta jaꞌlo, naꞌnx ttzaj tkꞌoꞌn Kman cynable, naꞌnx ttzaj tkꞌoꞌn ambil tuꞌn tel cynicꞌe tiꞌj, mi tuꞌn tex tuj cywiꞌye ti t-xilen tcyakil jlu. 5 Tuj 40 abkꞌi akine ma chin ẍaklunte cyeye tuj tzkij txꞌotxꞌ. Tuj tyemp lu mintiꞌ o baj cyxbalune ex mi cyxajbiye, 6 mintiꞌ o che waꞌne pan in bant tiꞌj triw, mintiꞌ o che cꞌane taꞌl twitz uva, ex mintiꞌ o che cꞌane kꞌeꞌn tuꞌntzun tel cynicꞌe tiꞌj Kman Dios.

7 Tej kul tuj lugar lu, etz tzokpaj Sehón kiꞌj, aju rey te tnam Hesbón, tucꞌix Og aju rey te txꞌotxꞌ Basán, pero cub cyiꞌj kuꞌn; 8 tzyettzun cytxꞌotxꞌ kuꞌn, ex o txi kkꞌoꞌn te cyetzbil ke tiyjil Rubén, ke tiyjil Gad, tucꞌix mij tiyjil Manasés. 9 Tuꞌntzun jlu, cynimanxe ex japunx cyuꞌne aju yol ma cyaj bant tiꞌj cyucꞌile, tuꞌntzun tel baꞌn cyeye tuj tcyakilju cbantel cyuꞌne.

10 Jaꞌlo, lu keye cybuyin cyibe cycyakile twitz Kman Dios: Ke nejenel cye junjun cꞌloj cyiyjile, ke tij xjal, ke xjal at cyoclen, ex cycyakil ke xinak aj Israel, 11 cyucꞌix ke cꞌwaꞌl, ke xuꞌj ex ke stranjer xjal akeju ax najl cyxole, tzaꞌnx ke xjal txꞌemil cysiꞌye ax icx ke xjal ikal cyaꞌye; 12 tuꞌntzun tocx cykꞌon cyibe axix toc tjakꞌ yol cyjel bant tiꞌj tuꞌn Kman Dios cyucꞌile jaꞌlo. 13 Aju yol cyjel bant tiꞌj cyucꞌile jaꞌlo atzun jlu: Akeye che oquel te jun cꞌloj xjal etzan tuꞌn, atzunte cꞌoquel te Cydiose, ic tzaꞌnx o tma cyeye ex ic tzaꞌnx tzaj ttziyan cye cyxeꞌchele Abraham, Isaac ex Jacob. 14 Pero mya oꞌcx cyucꞌile cyjel bant tiꞌj yol ma tzaj ttziyan Kman, 15 akeye cycubsaꞌne twitz; ax icx cyucꞌil keju che ul itzꞌj te tibajxi. 16 Baꞌn cyuꞌne tzaꞌn tten o ko ankꞌin tuj Ejipt, ex tzaꞌn tten o ko icꞌ cyuj ke nasyon e cnet kuꞌn tuj kbe. 17 Atzun o cyile ke cydios xjal mya ax toc dios ke, ex ke tilbilal icꞌbilxix binchamaj tiꞌj tzeꞌ, tiꞌj abj, tiꞌj sak pwak ex tiꞌj kꞌan pwak, akeju in che cꞌulun xjal lu cywitz. 18 Ten cycwente cyiꞌje, mintiꞌwt jun xinak ex mi jun xuꞌj, mintiꞌwt jun ja xjal ex mi jun cꞌloj cyiyjil aj Israel, cyaj colinte Kman Dios tuꞌn toc ten cꞌulul cywitz cydios ke nasyon lu. Miwt tzꞌoc jun cyeye ic tzaꞌn jun cꞌul cꞌa ex venen tlocꞌ.

19 Tbajlenxi cybiꞌne ke yol lu cyiꞌj mya baꞌn ctzajel cyiꞌje, ka at jun cyeye oc tnaꞌnte puro baꞌn taꞌ ex ma cub t-ximan cyjaꞌ: Tcyakil cꞌelel baꞌn weye masque nbinchaye nok alcyex wajbile, ka chi; tuꞌn tlaj xjal lu, oc che najel cycyakil xjal. 20 Mlay cub tnajsaꞌn Kman til xjal lu, mlay cub tuj twitz aju il otok tbincha, nok oꞌcx ctzajel tkꞌoj tiꞌj; ctzajel tiꞌj xjal lu tcyakilju mya baꞌn tzꞌibamaj tuj uꞌj lu, ex biꞌx che najel ke tiyjil twitz txꞌotxꞌ tuꞌn Kman. 21 Cꞌelel tpaꞌn Kman aju xjal lu cyiꞌj cycyakil cꞌloj cyiyjil aj Israel, tuꞌn ttzaj mya baꞌn tiꞌj ic tzaꞌnx tcyakil mya baꞌn ma cyaj bant tiꞌj, aju tzꞌiban tuj uꞌj te ley lu. 22 Ke cyiyjile che ul itzꞌj tuj kꞌijlalil tzul, ax icx ke stranjer xjal che tzajel cyuj txꞌotxꞌ najchak, oc cyilaꞌ ke cꞌixbisabl ex ke yabil che tzajel t-samaꞌn Kman tibaj txꞌotxꞌ lu. 23 Tuj tcyakil txꞌotxꞌ lu oc cyilaꞌ puro azufre ex atzꞌan ex otok baj tzꞌeꞌy txꞌotxꞌ, mlay bant tuꞌn toc awal tuj, ex misicyer jun tiꞌxti ctzajel tpokꞌsaꞌn; milpe jun wiꞌ cꞌul cchꞌiyil tuj. Ic cꞌoquel ic tzaꞌn o tenba tej cynaj ke tnam Sodoma, Gomorra, Adma ex Zeboim, akeju e baj tzꞌeꞌy tuꞌn tkꞌoj Kman ex tuꞌn ttxꞌuꞌjil.

24 Cycyakiltzun xjal cyuj mastl nasyon che kanil tiꞌj cyjaꞌ: ¿Tikuꞌn o tbincha Dios jlu tiꞌj txꞌotxꞌ lu? ¿Tikuꞌn o tzaj nimxix ttxꞌuꞌjil? 25 Ctzajeltzun tzakꞌweꞌn cye cyjaꞌ: Tuꞌnju o cyaj cycolin aju yol cyaj bant tiꞌj tuꞌn Dios cyucꞌil, aju Cydios cyxeꞌchel, aju bant tiꞌj tuꞌn cyucꞌil tej cyetz kꞌiꞌn tuꞌn tuj Ejipt, 26 ex tuꞌnju e cꞌulun ex e cub ẍmejeꞌ cywitz txkantl dios, akeju mintiꞌ ojtzkiꞌn cyuꞌn ex mintiꞌ o tzaj kꞌoꞌn jun tiꞌxti cye cyuꞌn. 27 Tuꞌntzun jlu tzaj tkꞌoj Dios tiꞌj txꞌotxꞌ lu ex tzaj tkꞌoꞌn tcyakil mya baꞌn tibaj, aju tzꞌiban tuj uꞌj lu. 28 Tucꞌil tkꞌoj ex nimxix ttxꞌuꞌjil, e jeꞌx tlajoꞌn ke xjal tuj cytxꞌotxꞌ tuꞌn cyxi kꞌiꞌn tuj juntl txꞌotxꞌ, ic tzaꞌn in baj jaꞌlo, che chilo xjal cxel cytzakꞌweꞌn.

29 Tcyakilju mintiꞌ ma tzaj tyecꞌun Dios ke, te Kman Dios ke; atzun keju o che tzaj yecꞌun, ke ke jlu ex cye ke kcꞌwaꞌl te jumajx, tuꞌntzun cyjapun kuꞌn cycyakil ke mandamyent in tmaꞌn tuj uꞌj te ley lu.