Ke tumel tuꞌn t-xi cybinchaꞌn cyib xjal twitz Dios ex tuꞌn cycub cyꞌiwlet
30
Octzun ttzaj cyibaje tcyakilju ma txi nmaꞌne cyeye, ka cyꞌiwbil ex ka mya baꞌn, ex oc cyximane cyiꞌj jlu cyuj ke nasyon jatum che pol lajoꞌne tuꞌn Kman Dios, 2 ka ma che ajtz meltzꞌaje tucꞌil cyucꞌix ke cycꞌwaꞌle, ex ka tuꞌn tcyakil cyanmiye ex tuꞌn tcyakil cycꞌuꞌje ma txi cynimane aju yol in xi nmaꞌne cyeye jaꞌlo, 3 che ajetztzun kꞌiꞌne juntl maj tuꞌn Kman Dios, ctzajel kꞌakꞌan tcꞌuꞌj cyiꞌje, ex che ajetz chmoꞌne tuꞌn juntl maj, nok jatum otok che pon sputje tuꞌn cyuj txkantl nasyon. 4 Masque otok che ex lajoꞌne tuj cytanmiye ex otok che pon sputje cyuj lugar mas najchak wen, pero che ajetz kꞌiꞌne tuꞌn Kman Dios ex max ma chixin che ajetz chmoꞌne tuꞌn. 5 Che ajetz kꞌiꞌne tuꞌn Kman Dios juntl maj tuj txꞌotxꞌ aju cyetzbil cyxeꞌchele ojtxi, che oqueltzune tajwil juntl maj, baꞌn cꞌelel tcyakil te cyeye tuꞌn, ex cchmetel mas nim cybaje ic tzaꞌn cye ktzan cyxeꞌchele. 6 Cchꞌexpetel cyanmiye tuꞌn Kman Dios ax icx cye cyiyjile che ul itzꞌj te tibajxi, tuꞌntzun cycꞌujlanteye Kman Dios tuꞌn tcyakil cycꞌuꞌje ex tuꞌn tcyakil cyanmiye, tuꞌntzun tten cychwinklale. 7 Cbeltzun tkꞌoꞌn Kman Dios tcyakil mya baꞌn lu cyibaj ke aj kꞌoj cyiꞌje, akeju o che el icꞌunte cyeye ex o che baj yajlaꞌne cyuꞌn; 8 atzun cyeye che ajetz meltzꞌaje tucꞌil Kman, cxel cynimane, ex cꞌoquel tilil cyuꞌne tuꞌn cyjapun cycyakil ke tmandamyent cyuꞌne, akeju in cheꞌx nmaꞌne cyeye jaꞌlo. 9 Che beltzun cyꞌiwlaꞌne tuꞌn Kman Dios tiꞌj tcyakilju cbantel cyuꞌne, che ul itzꞌj nim cycꞌwaꞌle ex nim cyalune ex cchmetel nim twitz cyawale. Ctzalajel Kman Dios cyiꞌje juntl maj, ex oc tbinchaꞌ baꞌn cyeye, ic tzaꞌn o tzalaj nej cyiꞌj ke cyxeꞌchele ex o tbincha baꞌn cye. 10 Tzul tkꞌoꞌn tcyakil jlu cyeye ka ma txi cynimane Kman Dios, ka ma che japun ke tmandamyent ex ke tley cyuꞌne, akeju tzꞌiban tuj uꞌj te ley lu, ex ka ma che ajtz meltzꞌaje tucꞌil tuꞌn tcyakil cycꞌuꞌje ex tuꞌn tcyakil cyanmiye.11 Aju mandamyent in xi nmaꞌne cyeye jaꞌlo mya cyuw te cyeye, ex mya mlay bant cyuꞌne. 12 Mya max taꞌ tuj cyaꞌj, tuꞌntzun cymanteye cyjaꞌ: ¿Alcye jun jacu jax tuj cyaꞌj tuꞌn ttzaj tbiꞌn ex tuꞌn ttzaj tmaꞌn ke, tuꞌntzun tjapun kuꞌn? 13 Ax icx mya max taꞌ jlajxi mar, tuꞌntzun cymanteye cyjaꞌ: ¿Alcye jun jacu tzicꞌx jlajxi mar tuꞌn ttzaj tbiꞌn ex tuꞌn ttzaj tmaꞌn ke, tuꞌntzun tjapun kuꞌn? 14 Nikaꞌ taꞌ mandamyent cyucꞌile; ax taꞌ tuj cytziꞌye, ex ax taꞌ tuj cyanmiye, tuꞌntzun tjapun cyuꞌne.
15 Cybintze jaꞌlo: Cbel nkꞌoꞌne cabe tumel cywitze tuꞌn tjaw cyscꞌoꞌne alcye cyajbile; ka chwinklal ex ka camic; ka tuꞌn cytene baꞌn ex ka tuꞌn cytene mya baꞌn. 16 Ka ma txi cybiꞌne aju in xi nmaꞌne cyeye jaꞌlo, ka ma cycꞌujlaye Kman Dios, ka ma che oc lpeꞌye tiꞌj, ka ma che japun ke tmandamyent cyuꞌne cyucꞌix ke tley ex ke tcawbil, che ankꞌiltzune, cchmetel nim cycꞌwaꞌle, ex che cyꞌiwlanjtzele tuꞌn tuj txꞌotxꞌ ctzajel tkꞌoꞌn cyeye tuꞌn cyoque te tajwil. 17 Katzun ma tzꞌel cypaꞌn cyibe tiꞌj Kman, ka mintiꞌ ma txi cybiꞌne tyol, ka ma txi cykꞌoꞌne ambil tuꞌn cyxi lpeꞌye cyiꞌj junxitl dios tuꞌn cycꞌulune cywitz ex tuꞌn cycub ẍmejeꞌye cywitz, 18 biꞌx cxel nmaꞌne cyeye jaꞌlo, ax toc il tiꞌj che najele, ex mlay che tene nim kꞌij tuj txꞌotxꞌ ctzyetel cyuꞌne cyicꞌxlenxiye tuj nima Jordán. 19 Tuj kꞌij lu in che oc nkꞌoꞌne cyaꞌj tucꞌix txꞌotxꞌ te testiw cyiꞌje, ka ax toc ma txi nmaꞌne tuꞌn tjaw cyscꞌoꞌne cyxol cabe tumel lu: Ka chwinklal ex ka camic, ka cyꞌiwbil ex ka mya baꞌn. Cyjaꞌtzun cyscꞌon jawe chwinklal, tuꞌntzun cyankꞌine cyucꞌix ke cyiyjile che ul itzꞌj te tibajxi. 20 Cycꞌujlame Kman Dios, cynimanxe, ex cucx che lpeꞌque tiꞌj, porque a kꞌolte cychwinklale, ex tuꞌn che tele nim kꞌij twitz txꞌotxꞌ tzaj ttziyan tuꞌn ttzaj tkꞌoꞌn cye cyxeꞌchele Abraham, Isaac ex Jacob.