4 Tejtzun cyjapun baj ke kꞌij te bis, o yolin José cyucꞌil aj sanjelal ateꞌtok tuj tja Faraón ex xi tmaꞌn cye cyjaꞌ:

—Ka baꞌn ma chin ele tuj cywitze, cybinchame xtalbil tuꞌn t-xi cymaꞌne te Faraón cyjaꞌ: 5 Tej chꞌixtok tcyim nmane, tzaj tmaꞌn weye tuꞌn t-xi nmaꞌne jun yol axix toc twitz Dios te, ex tma tuꞌn tocx nmakuꞌne tuj toyꞌ pic aju tuꞌnx o bant, atzun taꞌ tuj txꞌotxꞌ Canaán. Cyjaꞌtzun in xi nkanine xtalbil te Faraón, tuꞌn ttzaj tkꞌoꞌn ambil weye tuꞌn nxiꞌye makulte ktzan nmane, ex chin ul meltzꞌaje, che chicuye te Faraón, chi José.

6 Xitzun ttzakꞌweꞌn Faraón:

—Txiꞌya makulte ktzan tmana ic tzaꞌnx o tma teya, che chicuye te José, chi Faraón.

7 Xiꞌtzun José makulte ktzan tman, ax icx e jeꞌx ke aj sanjelal tucꞌil, akeju attok cyoclen tuj tja Faraón ex tuj txꞌotxꞌ Ejipt. 8 Ax icx e jeꞌx keju ateꞌtok tuj tja Jacob, cyucꞌix keju ateꞌtok tuj tja José ex ke terman. Oꞌcx ke cycꞌwaꞌl cyucꞌix ke cyalun e cyaj ten tuj txꞌotxꞌ Gosén. 9 Ax icx e jeꞌx carwaj ex xjal tibaj chej tucꞌil. Cyjaꞌtzun nim xjal e jeꞌx tucꞌil. 10 Tejtzun cypon tuj tpeꞌn Atad, jatum nneꞌltok ttxcꞌomil triw, aju tcubtok tuj tjawitz kꞌij jlajxi nima Jordán, atzun cub cychmon cyib tiꞌj cyimni ex e cub ten okꞌel tucꞌil nimxix bis. Atzun o bisun José, ex o tzꞌokꞌ tiꞌj ktzan tman wuk kꞌij.

11 Tejtzun cylonte ke aj Canaán, akeju najltok tuj txꞌotxꞌ lu, cyma cyjaꞌ: Nim cybis aj Ejipt tiꞌj jun cycyimni, che chi. Tuꞌntzun jlu, Abel-mizraim tbi lugar lu oc kꞌoꞌn. Aju lugar lu tcub tuj tjawitz kꞌij jlajxi nima Jordán.

12 Cybincha ke tcyꞌajal Jacob ic tzaꞌnx o tma cye. 13 Atzun xi cyiꞌn tuj txꞌotxꞌ Canaán, ex atzun ocx cymakuꞌn tuj toyꞌ pic tuj cojbil Macpela tbi, tuj txꞌotxꞌ otok tzꞌel tlakꞌoꞌn Abraham te Efrón aju aj Hetey, tuꞌn tajben te mukbil. Aju txꞌotxꞌ ex aju toyꞌ pic lu, atzun taꞌ twitz Mamre tuj tjawitz kꞌij. 14 Tej tocx tmakuꞌn José ktzan tman, aj meltzꞌaj tuj Ejipt cyucꞌix ke terman ex cycyakil ke xjal otok cheꞌx tucꞌil.

15 Tej cylonte ke terman José otok cyim cyman, cyma cyjaꞌ: Oclo ko elel ticꞌun José, ex oclo ctzajel tkꞌoꞌn mya baꞌn te t-xel ju mya baꞌn kbincha tiꞌj ojtxi. 16 Xitzun cykꞌoꞌn tkanil te José, che chi cyjaꞌ: Tej naꞌnxtok tcyim ktzan kman cyaj tmaꞌn keye 17 tuꞌn t-xi kmaꞌne teya cyjaꞌ: Binchama xtalbil, najsama aju mya baꞌn ex aju il o binchanjtz tiꞌja cyuꞌn ke ttzica. Ax toc mya baꞌn o cybincha tiꞌja, chi. Tuꞌntzun jlu, in ko cubsane twitza tuꞌn tcub tnajsaꞌna kile, akoꞌye tmajen Dios aju Tdios kman, che chi.

Oc ten José okꞌel acux in che yolintok ke sanjel. 18 Ax icx cywitzelcu ke terman José e pon tucꞌil, e cub mocꞌeꞌ twitz, pon tacl tibaj cywitz max twitz txꞌotxꞌ ex xi cymaꞌn te cyjaꞌ:

—Lu koꞌye lu, tmajena koꞌye, che chi.

19 Xitzun tmaꞌn José cye cyjaꞌ:

—Miꞌn che xobe, baka Dios kine. 20 Cub cyximane tuꞌn tbant mya baꞌn wiꞌje, atzunte Dios o tzꞌoc tkꞌoꞌn te baꞌn, tuꞌn tbant aju in kil jaꞌlo, tuꞌn cyclet nimcu xjal tuꞌn miꞌn cycyim. 21 Tuꞌntzun jlu miꞌn che xobe. Che xel ncꞌaꞌchine cyucꞌix ke cycꞌwaꞌle, chi José.

Cyjaꞌtzun kꞌukbanjtz cycꞌuꞌj tuꞌn José, tuꞌnju o yolin cyucꞌil tucꞌil nimxix tcꞌujlalil.

22 Najantltzun José tuj Ejipt junx cyucꞌil ke tiyjil tman. O ankꞌin José 110 abkꞌi, 23 ex o til ke tal tchman Efraín aju tcyꞌajal. Ax icx ke tcꞌwaꞌl Maquir aju tcyꞌajal Manasés e cub kꞌoꞌn cywi tkan José tej cyul itzꞌj.

24 Xitzun tmaꞌn José cye terman cyjaꞌ: Weye chin cymele, atzunte Dios cꞌonilte cyeye ex che elex kꞌiꞌne tuꞌn tuj txꞌotxꞌ lu, tuꞌntzun cypone tuj txꞌotxꞌ tzaj ttziyan te Abraham, te Isaac ex te Jacob, chi José. 25 Xitzun tmaꞌn José cye tuꞌn t-xi cymaꞌn jun yol axix toc twitz Dios ex tma cyjaꞌ: Ax toc tzul Dios onilte cyeye. Octzun tjapun jlu, bix txi cyiꞌne nbakile, chi José.

26 Cyimtzun José otok japun twiꞌ 110 abkꞌi. Bajtzun binchaꞌn t-ximlal tuꞌn miꞌn tkꞌay ex cuꞌx kꞌoꞌn tuj jun cax tuj Ejipt.